كوڕێن خابووری رژدن بۆ سه‌ركه‌فتنا سێیێ
ئه‌ڤرۆ، عه‌لی حاجی:
چاڤه‌ڕێ دهێته كرن سوبه‌هی پێنچ شه‌مبی تیما یانا زاخۆ ل باژێرێ به‌غدا بیته مێڤانا یانا زه‌ورا ئێك ژ بهێزترین یاریێن گه‌ڕا 31ێ بۆ یانێن پلا نایابا ئیراقێ یا ته‌پا پێی ئه‌وا بڕیاره ل ده‌مژمێر ده‌هی شه‌ڤ ل یاریگه‌ها زه‌ورا بهێته ئه‌نجامدان.
كوڕێن خابووری پشتی ب سه‌ركێشیا راهێنه‌رێ نوو یێ سوری فیراس ئه‌لخه‌تیب شیایه دو سه‌ركه‌فتنێن گرنك ل سه‌ر یانێن هه‌ولێر و نه‌فت ئه‌لبه‌سرا بینن و 43 خال كومكرنیه ل رێزا هه‌شتێ دهێت كو ئه‌ڤچه‌نده بوویه پالده‌ر و زاخا یاریزانێن زاخۆ بۆ یاریا سوبه‌هی به‌رده‌وامیێ بده‌نه ئه‌نجامێن خوه سه‌رباری ئه‌ركێ وان ب سانه‌هی نابیت هه‌مبه‌ری تیما زه‌ورا ئه‌وا 51 خالان رێزا پێنجێ دهێت.
لدور ڤێ یاریێ حه‌مید حاجی یاریزانێ زاخۆ بۆ رۆژناما ئه‌ڤرۆ گۆت: یاریا ل گه‌ل زه‌ورا گه‌له‌ك یا گرنگه و تاقیكرنه‌كا بزه‌حمه‌ته لێ هه‌موو یاریزان رژدن به‌رده‌وامیێ بده‌نه سه‌ركه‌فتنان و هاتنا راهێنه‌رێ نوو پلان و گۆهورین ئێخستیه د ئاستێ مه دا و به‌ره ب باشتر چووینه و ڤه‌گه‌ڕیانا یاریزانێن هنگاڤتی و پشته‌ڤانیا دارایی یا كارگێریێ ژی بۆ یاریزانا پالده‌ره‌كێ دی یێ سه‌ركه‌فتنێ یه سه‌رباری تیما زه‌ورا یا بهێزه و جه‌ماوه‌ری یه، له‌ورا سه‌ركه‌فتنا لسه‌ر خودانێن ئه‌ردی دێ رێزه‌كا باشتر پێشڤه‌چین و ژ هه‌ڤڕكێن خوه دووركه‌ڤین.
ژلایه‌كێ دووڤه سوبه‌هی یانا هه‌ولێر خودانا 36 خالان رێزا 10ێ دێ مێڤانداریا نه‌فت ئه‌لوه‌سه‌ت كه‌ت ئه‌وا ب55خالان رێزا سێیێ دهێت، ئه‌ینیا بهێت ئه‌مانه‌ت به‌غدا دێ بیته مێڤانا یانا نه‌وروز.
