پێكینانا هه‌ڤژینیێ ب سوتفه باشتره
ئه‌ڤرۆ، نه‌وزاد هلۆری:
هه‌ڤژینی پرۆسه‌كا ئالووزه و چو پیڤه‌رێن ئێكلاكه‌ر نینن كو جوداهیێ دناڤبه‌را هه‌ڤژینیا سه‌ركه‌فتی و سه‌رنه‌كه‌فتی بكه‌ت، به‌لێ پشكه‌ك ژ تاكێن جڤاكی ل وێ باوه‌ریێ نه كو ئه‌ڤینی خاله‌كا گرنگه بۆ نیاسینا هه‌ڤژینیێ به‌ری پێكئینانێ و پرانی ژی خوه ب هه‌ڤژینیا سوتفه گرێ دده‌ن.
پرژین حه‌سه‌ن، چالاكڤانه ل ده‌ڤه‌را شێلادزێ دیار كر كو هه‌ڤژینی مه‌زنترین پرۆسه‌یه د ژیانا هه‌ر تاكه‌كێ جڤاكی دا و دڤێت ل سه‌ر بنه‌مایه‌كێ هه‌ره گرنگ و بهێز بهێته ئاڤا كرن و گۆت: (دو بنه‌مایێن سه‌ره‌كی د جڤاكی دا هه‌نه و پتر ژ هه‌موویان د به‌ربه‌لاڤن و ل سه‌ر وان هه‌ردو بنه‌مایان هه‌ڤژینی دهێته پێكئینان، هه‌رچه‌نده هه‌ردو بنه‌ما ژی ئێكلاكه‌ر نینن كو جوداهیێ بێخینه دناڤبه‌را هه‌ڤژینیا سه‌ركه‌فتی و هه‌ڤژینیا سه‌رنه‌كه‌فتی به‌ری كو بهێته پێكئینان ئه‌و ژی پێكئینانا هه‌ڤژینیێ ل سه‌ر بنه‌مایێ ئه‌ڤینیێ و پێكئینانا هه‌ڤژینیێ ل سه‌ر بنه‌مایێ سوتفه و ژ نیشكه‌كێڤه). .
پرژینێ زێده‌تر گۆت: (هه‌كه پێكئینانا هه‌ڤژینیێ ل سه‌ر بنه‌مایێ ئه‌ڤینیێ بیت ئه‌و نیاسینه‌كا تمام دناڤبه‌را كچ و كورا دروست بویه و هه‌ردو هه‌ڤدو باش دنیاسن و خالێن بهێز و لاواز یێن هه‌ڤدو و ئاستێ هه‌ڤدو دزانن ئه‌و ژی هه‌كه ل سه‌ر بنه‌مایێ حه‌ز و ئاره‌زویێن سێكسی نه‌هێته دروستكرن و ئه‌ڤینه‌كا راسته‌قینه و ل سه‌ر بنه‌مایێ پێكڤه ژیانێ بیت د خوشی و نه‌خۆشیان دا، لێ هه‌كه پێكئینانا هه‌ڤژینیێ ل سه‌ر بنه‌مایێ سوتفێ بیت كه‌سێ سێ یێ وه‌كو واسته دناڤبه‌را وان دا هه‌یه و پرانیا جاران ژی دایباب یان خزم و كه‌سوكار یان هه‌ڤال ب ئه‌ركێ دانه نیاسینا كچێ یان كوری بو هه‌ڤدوو ڕادین).
چالاكڤانێ دیار كر كو بێگومان ئه‌ڤێ یه‌كێ ژی ئه‌رێنی و نه‌رێنیێن خوه هه‌نه، نه‌رێنی ئه‌وه كو دبیت هه‌ڤدو باش نه نیاسی بیت و جوداهیێن زور ل ئاستێ ره‌وشه‌نبیری و دارایی و جڤاكی و هه‌تا دووماهیێ هه‌بن و نه‌زانن، لایه‌نێ نه‌رێنی ئه‌وه كو خه‌لكه‌ك هایدارێ ره‌وشتێ هه‌ردویایه و دوورن ژ ئه‌ڤینه‌كا خراب و دێ ل سه‌ر بنه‌مایه‌كێ نوو و بهێز ژیانێ ده‌ستپێ كه‌ن و گۆت: (بێگومان مرۆڤ نه‌شێت بریارێ ل سه‌ر هه‌ردو بنه‌مایێن ل سه‌ری بده‌ت كا كیژ باشتره، تنێ ئه‌م دشێین بێژین كو ده‌م هات كچ و كور هه‌ڤدو بنیاسن و ب تمامی به‌ری كو هه‌ڤژینیێ پێك بینن، ژبه‌ركو هه‌ڤژینی ته‌مه‌نه و هه‌تا مرنێ ب خوشی و نه‌خوشی دڤێت ل گه‌ل هه‌ڤدو بژین).
(ل گوره‌ی راپرسیه‌كێ كو ل سه‌ر تورا جڤاكی یا فه‌یسبوكێ هاتیه ئه‌نجامدان و 339 كه‌سان پشكداری تێدا كریه،53.1% كو دبنه 180 كه‌س وه‌سا هزر دكه‌ن و ل وێ باوه‌ریێ نه كو پێكئینانا هه‌ڤژینیێ ل سه‌ر بنه‌مایێ سوتفه باشتره ژ پێكئینانا هه‌ڤژینیێ ل سه‌ر بنه‌مایێ ئه‌ڤینیێ ب رێژا 46.9%.).
