ژ دایكبوونا بارزانیێ نەمر و سەرهلدانا باژێڕێن دهۆك و سێمێلێ ب چالاكیان هاتنە ساخكرن

ئەڤرۆ

دهۆك، نەوزاد هلۆری:

ب هەلكەفتا 120 سالیا ژ دایكبوونا بارزانیێ نەمر و 32 سالیا سەرهلدانا باژێڕێن دهۆك و سێمێلێ ل دهۆكێ‌ ئاهەنگەكا جەماوەری و هاتە سازكرن و هەوەكا دارچاندنێ‌ ل جاددا بارزان هاتە ئەنجامدان، دیسا ل سەرانسەری پارێزگەهێ‌ ژی ب ب هەلكەفتا 120 سالیا ژ دایكبوونا بارزانیێ نەمر چەندین چالاكیێن جودا هاتنە ئەنجامدان.
ب هەلكەفتا 120 سالیا ژ دایكبوونا بارزانیێ نەمر و 32 سالیا سەرهلدانا باژێڕێن دهۆك و سێمێلێ دوهی 14/3/2023 ب بەرهەڤبوونا د. پشتیوان سادق، بەرپرسێ مەكتەبا رێكخستنا پارتی دیموكراتی كوردستان ل بادینان و د. عەلی تەتەر، پارێزگارێ دهۆكێ و جێگرێن بەرپرسێ مەكتەبا رێكخستنا پارتی و عەلی عەونی، بەرپرسێ لقێ ئێك و لایەنێن سیاسی و حزبی و ئیداری و جەماوەرێ دهۆك و سێمێلێ ئاهەنگەكا جەماوەری ل هولا كۆنگرەیان هاتە سازكرن.
پارێزگارێ دهۆكێ د پەیڤەكێ دا ئەڤ هەلكەفتە ل هەموو خەلكێ كوردستانێ و پارێزگەها دهۆكێ پیرۆز كر و تەكەز كر كو سەرهلدان بەرهەمێ شۆڕەشێن ئێك ل دووڤ ئێكێن گەلێ كوردستانێ بوو، هەروەسا هەموو خەلكێ كوردستانێ ب هەموو پێكهاتە ڤە پشكداری تێدا كریە و ژ ئەنجامێ سەرهلدانێ كوردستانەكا ئازاد یا خودان پەرلەمان و حكومەتەكا نیشتمانی هاتیە ئاڤاكرن و گۆت: «پێدڤیە هەستا نیشتمانی و پێكڤەژیانا ئولی و نەتەوەیی ل هەرێما كوردستانێ خورتتر بكەین و ب پارێزین».
عەلی عەونی، بەرپرسێ لقێ ئێك گۆتارا لایەنێن سیاسی ل پارێزگەها دهۆكێ پێشكێش كر و ئەڤ هەردو هەلكەفتە ل هەموو لایەنان و هەموو پێكهاتەیێن دەڤەرێ پیرۆز كر و گۆت: «دڤێت ئەم هەموو ب هەڤڕا دەستكەفتێن سەرهلدانێ باش ب پارێزین».
د دووڤ دا ئاهەنگا جەماوەری هاتە سازكرن و هەردو هونەرمەندان شاكر مەحەمەد ئەمین و رێكێش سەیرانی ب هاریكاریا تیپا رباد چەندین سترانێن شۆڕەشگێری پێشكێشكرن.
دیسا هەر ب هەمان هەلكەفتان دوهی هەوەكا دارچاندنێ‌ ل جاددا بارزان ب بەرهەڤبوونا پارێزگارێ دهۆكێ و بەرپرسێ لقێ ئێك یێ پارتی هاتە ئەنجامدان و هەژمارەكا زۆرا شتلێن داران هاتنە چاندن.
د. عەلێ تەتەر، پارێزگارێ دهۆكێ د كۆنگرەكێ‌ رۆژنامەڤانی دا ئەڤ هەردو هەلكەفتە ل خەلكێ كوردستانێ و پارێزگەها دهۆكێ پیرۆزكرن و گۆت: «سەرهلدان بەرهەمێ خەبات و تێكۆشین و ئێكرێزیا گەلێ كوردستانێ بوو، ئەڤرۆ ژی خەلكێ كوردستانێ خودانێ چەندین دەستكەفتێن نیشتمانی و نەتەوەیی یە، دخوازین هەموو لایەنێن سیاسی بگەهنە رێكەفتنێ و دەستكەفتێن خەلكێ كوردستانێ ب پارێزن».
ل دۆر ژینگەهێ‌ ژی گۆت: «ئەوێن ژیینگەهێ تێك بدەن دێ پێرابوونێن قانوونی هەمبەر وان گرینەبەر، لەوا داخوازێ ژ وەلاتیان دكەین د هاریكار بن و ژینگەهێ ب پارێزن».

کۆمێنتا تە