د. جەلال كەمال: سێ قارەمانی دێ ل شەڤانێن رەمەزانێ هێنە رێكخستن
ئەڤرۆ
د داخویانیەكێ دا سەرۆكێ ئێكەتیا باسكێت بۆلا پارێزگەها دهۆكێ بۆ رۆژناما ئەڤرۆ دیار كر بڕیارە بۆ شەڤانێن رەمەزانێ سێ چالاكیێن جۆدا یێن یاریێ بۆ یانە و تیمێن ل سنۆرێ پارێزگەهێ و ئیدارا سەربەخوەیا زاخۆ بهێتە رێكخستن و چاڤەڕێ نڤێسارێن تیمێن پشكدارین ژبۆ دیاركرنا دەم و ژڤان و جهێ یاریان.
زێدەتر د. جەلال كەمال گۆت: پێخەمەت پێشئێخستنا وەرزشا یاریا باسكێت بۆلێ و پشتەڤانی بۆ تیم و یانەیێن ل پارێزگەها ددهۆكێ وئیدارا سەربەخوەیا زاخۆ مە بڕیار دایە سێ قارەمانیێن جۆدا بهێنە رێكخستن ئەو ژی ل سەر ئاستێ لاوان بۆ 5*5 ژ دایكبوویێ 2006ێ، دیسان بۆ شێوازێ 3*3 ل سەر ئاستێ پێشكەفتیان، هەروەسان قارەمانیەكا دی یا تایبەت بۆ وەرزشڤانێن دێرین ب هەمان شێوازێ 3*3ێ دێ هێتە رێكخستن كو بڕیارە ئەڤ قارەمانیە ل شەڤانێن رەمەزانا پیرۆز كو دهێتە چاڤەڕێ كرن ل چارێ نیسانا بهێت دەستپێبكەت و هەتا نوكە نێزیكی پێنج یانەیان بەرهەڤیا خوە دیاركرینە بۆ پشكداریێ و ئەم دێ چاڤەڕێ بین هەتا دووماهی ژڤان كو 31ێ ڤێ هەیڤێ یە.
ژلایەكێ دووڤە ناڤهاتی ئەو چەندە ژی دیاركر مەرەما سەرەكی یا ڤەكرنا قارەمانیێ زێدەتر بلندكرنا ئاستێ یاریزانێن یانە و تیمێن ل پارێزگەها دهۆكێ و باشترین بەرهەڤی بۆ قارەمانی و خولێن داهاتی، هەروەسان ژبەركو هەموو یاریزان مفایی ژێ وەربگرن و بەردەوامیێ بدەنە یاریا باسكێت بۆلێ بەرۆڤاژی كو د ماوێ هەیڤا رەمەزانێ دا د راوەستیایی بن.