ئابۆرێ ئیراقێ ل پێشبەری وەرچەرخانەكا نوو، زەید ل گەل ترەمپی بادەکێن پەترۆلێ و وزەیێ گەنگەشە دكەت
د ئێكەمین سەردانا دەرڤەی ئیراقێ دا ژ دەمێ وەرگرتنا پوستێ خۆ، عەلی فالح زەیدی سەرۆك وەزیرێن ئیراقێ ل واشنتۆنێ یە ودێ ل گەل دۆنالد ترەمپی سەرۆكێ ئەمریكایێ دێ كۆم بیت و ئەڤ سەرەدانە ل دەمەكێ دایە كو پێشڤەچوونەكا سەربازی یا توند د ناڤبەرا ئەمریكا و ئیرانێ دا هەیە كو هەردو هەڤپشكێن سەرەكیێن ئیراقێ نە و ئەڤ سەرەدانە ل دەمەكێ دایە كو بەغدا رووبڕووی ئاستەنگەكا مەزن بوویە بۆ پاراستنا هەڤسەنگییا پەیوەندییان د ناڤبەرا واشنتۆن و تەهرانێ دا ب تایبەت كو چەندین سالە ئیراق بۆیە گۆڕەپانا هەڤڕكییا ناڤخۆییا وان دو ئالییان.
د ڤێ سەرەدانا خۆ یا كو دێ حەفتییەكێ بەردەوام بیت شاندەكێ فەرمی د گەل زەیدی دایە و دێ ل گەل بەرپرسێن ئەمریكی و نوونەرێن كۆمپانیێن پەترۆل و وزەیێ كۆم بیت ئەڤە ژی د چارچۆڤەیا بزاڤێن وی دایە بۆ بهێزكرنا هەڤكارییا ئابۆری ل گەل ئەمریكا و راكێشانا وەبەرهێنانێ و زەیدی كو كەسایەتییەكێ بازرگانە سۆزا وێ چەندێ دایە ئابۆێ ئیراقێ ڤەژەنیت و دەستهەلاتا دەولەتێ ب هێزتر بكەت و حوكمەتا وی سۆز دایە چەك تنێ د دەستێ هێزێن ئەمنی یێن حوكمەتێ دا بیت و دووماهیێ ب هەژموونا وان گرۆپێن چەكدار یێن نێزیكی ئیرانێ بینیت.
ل دۆر ڤێ چەندێ زەیدی د گۆتارەكێ دا كو بەری سەرەدانا وی ل رۆژنامەیا (واشنتۆن پۆست) هاتییە بەلاڤكرن نڤیسییە حوكمەتا وی پێگیرە ب گرەنتیكرنا قۆرخكرنا بكارئینانا رەوا یا هێزێ ژ ئالیێ دەولەتێ ڤە و دووپاتی ل وێ ژی كریە كو ئیراقێ رێیا گەشەپێدانێ هەلبژارتییە ل شوونا تێكهەلیێ د سەنگەر و ململانێیێن هەرێمی دا و حوكمەتا ئیراقێ دووماهییا ئیلۆنا بهێت وەك دووماهی مۆلەت بۆ گرۆپێن چەكدار دیار كریە بۆ رادەستكرنا چەكێن وان ئەڤە ژی هەڤدەمە ل گەل دووماهیهاتنا ئەركێ هەڤپەیمانییا نێڤدەولەتی ب سەرۆكاتییا ئەمریكا ل ئیراقێ
ژ ئالییەكێ دی ڤە بەرپرسەكێ سیاسیێ ئیراقی راگەهاندییە ئاراستەیا حوكمەتێ بۆ بهێزكرنا پەیوەندیێن ئابۆری ل گەل ئەمریكایێ ب رامانا پشت تێكرنێ ل ئیرانێ ناهێت و دووپات كر كو بەغدایێ دڤێت ئەو هەڤسەنگییا دێرین یا د ناڤبەرا ئەمریكا و ئیرانێ دا بپارێزیت .
هەروەسا ئالنگاریێن ناڤخۆیی هەنە كو حوكمەتا ئیراقێ دبینیت قۆرخكرنا چەكی د دەستێ دەولەتێ دا مەرجەكێ سەرەكییە بۆ راكێشانا وەبەرهێنانا بیانی و ب دەستڤەئینانا ئارامییا ئابۆری و سەرباری كو هندەك گرۆپێن چەكدار ئامادەییا خۆ بۆ هاریكارییا حوكمەتێ دیار كریە لێ هێشتا گرۆپێن دی رەت دكەن دەست ژ چەكێن خۆ بەردەن د دەمەكێ دا كو گرۆپێن چەكدار یێن نێزیك ل ئیرانێ خودتم هەژموونەكا بەرفرهە یا سیاسی و سەربازینە و داخوازا ڤەكێشانا هێزێن ئەمریكا ژ ئیراقێ دكەن.
د دەمێ شەڕێ ئیرانێ ل گەل ئەمریكا و ئیسرائیلێ وان گرۆپان بۆ پشتەڤانییا تەهرانێ سەدان هێرش كرینە سەر بنكە و دەزگەهێن ئەمریكا ل ناڤخۆییا ئیراقێ و هەرێما كوردستانێ و شەڤەكێ بەری چوونا زەیدی بۆ واشنتۆنێ وەزارەتا دەرڤەیا كوێتێ ئەو روودانە پرۆتەستۆ كرن كو ب دەستدرێژییەكا تاوانكارانە ژ ئالیێ ئیرانێ و میلیشیایێن هەڤپەیمانێن وێ ل ئیراقێ بۆ سەر بنكەیێن سنۆری و سەكۆیەكێ پەترۆلی ل كوێتێ، هەژمارتی.
