د ڕێورەسمێن ڤەكرنا چەند پڕۆژەیان دا ل زاخۆ، سەرۆكێ حوكمەتا هەرێما كوردستانێ ڕاگەهاند: «گەلەك یێ دلخوەشم كو سەرەدانا ئیدارەیا سەربەخوە یا زاخۆ و ب تایبەتی ناحیا باتێلێ دكەم، كو ئەڤرۆ ل ڤێرە ئەم ب دلخوەشی ڤە د پشكدارین بۆ ڤەكرن و دەستپێكرنا سێ پڕۆژەیێن گرنگ یێن كەرتێ پێشەسازیێ، ب تایبەتی د پیشەسازییا ترۆمبێلان دا».
ل ڕۆژا ئێك شەمبی 25/10/2026، ب بەرهەڤبوونا مەسرور بارزانی، سەرۆكێ حوكمەتا هەرێما كوردستانێ، ڕێورەسمێن ڤەكرنا تایێ سەرەكی یێ كۆمپانییا (نیسان) و پڕۆژەیێ (Motor Plex iraq) و پڕۆژەیێ (Global Development) ل زاخۆ بڕێڤە چوون.
سەرۆكێ حوكمەتا هەرێمێ د وی ڕێورەسمی دا پەیڤەك پێشكێشكر ، ئەڤە دەقێ وێ یە:
هوون هەموو ب خێر بهێن ل سەر سەران و سەر چاڤان، ب خێرهاتنەكا تایبەت بۆ قونسلێ چاپۆنێ و ڕێڤەبەرێ قونسلخانەیا چینێ و نوونەرێ كۆمپانییا جیتۆر ل ڤێرە دكەم، هوون هەموو ب خێر بهێن سەر چاڤان. گەلەك یێ دلخوەشم كو ئەڤرۆ سەرەدانا ئیدارەیا سەربەخوە یا زاخۆ و ب تایبەتی ناحیا باتێلێ دكەم، كو ل ڤێرە ئەم ب دلخوەشی ڤە د پشكدارین بۆ ڤەكرن و دەستپێكرنا سێ پڕۆژەیێن گرنگ یێن كەرتێ پێشەسازیێ، ب تایبەتی د پێشەسازییا ترۆمبێلان دا.
دەستخوەشی و سوپاسییا موهەنەد گرۆپ و ب تایبەتی كاك ئەحمەد مشیر و هەروەسا كاك ئەحمەد ڕێكانی دكەم بۆ پشكداربوونا وان د وەبەرهێنانا ڤان پڕۆژەیان دا ل گەل كۆمپانیایێن چینی و چاپۆنی، كو بێگومان هاریكارییەكا ئێكجار مەزنە بۆ پێشڤەبرنا كەرتێ پێشەسازیێ ل سەر ئاستێ هەرێما كوردستانێ.
ژ بلی وێ چەندێ كو ئەڤ كەرتە گەلەك دێ بەر ب پێش ڤە چیت، دەلیڤەیێن كارێ ژی یێن زۆر بۆ خەلكێ ڤێ دەڤەرێ و ب شێوەیەكێ گشتی بۆ كوردستانێ دێ هێنە تەرخانكرن. پێشڤەبرنا كەرتێ پێشەسازیێ بەرنامەیێ حوكمەتا هەرێما كوردستانێ بوویە ل گەل هەمەجۆركرنا داهاتێن هەرێما كوردستانێ و هەمەجۆركرنا ئابۆرێ هەرێمێ. مە ڤیایە گرنگییەكا زێدەتر بدەینە كەرتێ پێشەسازیێ. دەستخوەشیێ ل سەرپەرشتێ ئیدارەیا سەربەخوە یا زاخۆ ژی دكەم بۆ وان هێسانكارییان دا كو كەرتێ پێشەسازیێ ل سنۆرێ ئیدارەیا سەربەخوە یا زاخۆ بەر ب پێش بچیت. دەستخوەشیێ ل هەوە دكەم.
وەكو مە دیتی، گەلەك تشتێن باش هاتینە ئامادەكرن، ب تایبەتی ل ڤێرە كۆمپانییا نیسان دێ بیتە بەلاڤكەرا هەموو وان ترۆمبێلێن دهێنە ناڤ ئیراقێ و ژ ڤێرە بۆ هەموو پشكێن دی یێن ئیراقێ دێ هێنە ڤەگوهاستن. ئەڤ چەندە دەلیڤەیێن كاری بۆ خەلكێ هەرێما كوردستانێ و ب تایبەتی خەلكێ ڤێ دەڤەرێ زێدەتر پەیدا دكەت و خەلكێ مە دێ فێری كارێن زێدەتر بن د كەرتێ تایبەت دا. بەری دەمەكی ژی مە پڕۆژەیەكێ وەكو ڤی یێ كۆمپانییا (تۆیۆتا) ل دهۆكێ ڤەكر، بەری وێ ژی ل هەولێرێ پڕۆژەیەكێ ب ڤی شێوەی هاتبوو ڤەكرن. ئینشائەللا ئەڤە دەستپێكەكا گەلەك باش بیت بۆ پێشڤەبرنا كەرتێ پێشەسازیێ ل سەر ئاستێ هەرێما كوردستانێ و ل هەموو باژێڕ و پارێزگەهـ و دەڤەرێن هەرێما كوردستانێ.
كوردستان بخوە د جهەكێ گەلەك ستراتیژی دایە كو گەلەك بازاڕ و ماركێتێن ڕۆژهەلاتا ناڤین ب ئێك ڤە گرێ د دەت. ئەڤە دێ بیتە ڕێكخوەشكەر بۆ وێ چەندێ كو ئەم زێدەتر بشێین ڕۆلەكێ كاریگەر د پێشڤەبرنا ئابۆرێ دەڤەرێ دا ب بینین، و كوردستان ببیتە سەنتەرەك و گەلەك كۆمپانیایێن دی ژی چاڤ ل هەرێما كوردستانێ بكەن بۆ پێشڤەبرنا ئابۆری ل دەڤەرێ، و هەروەسا بۆ زێدەتر مفاوەرگرتنا وان كۆمپانیایێن كو ل هەرێما كوردستانێ وەبەرهێنانێ دكەن. داخوازێ ژ وەبەرهێنەرێن كوردستانێ ژی دكەم كو ئەو زێدەتر هزر د وێ چەندێ دا بكەن كا دێ چەوا وەبەرهێنانێ ل هەرێما كوردستانێ كەن و هەكە پێدڤی كر ل گەل كۆمپانیایێن بیانی (جۆینت ڤێنچەر) بكەن، هەم بۆ وێ چەندێ كو ئابۆرێ هەرێما كوردستانێ بەر ب پێش بچیت، هەم ژی شێوازێ زانستی د كەرتێ پێشەسازیێ دا بەر ب پێش ببەن.
مە شیانێن گەلەك باش د گەنجێن خوە دا دیتینە و هێزەكا گەلەك مەزنن بۆ پێشڤەبرنا هەرێما كوردستانێ د هەموو بواران دا. هەروەسا فێربوون و ئینانا وان زانستان ژ دەرڤە، دێ گەلەك یا هاریكار بیت بۆ باشتركرن و بلندكرنا ئاستێ تێگەهشتن و كاركرنێ ل سەر هەرێما كوردستانێ.
وەكو من زانی، د ڤی دەمی دا ب هەزاران دەلیڤەیێن كاری بۆ خەلكێ مە هاتینە پەیداكرن. ئەڤە ئارمانجا حوكمەتا هەرێما كوردستانێ بوویە كو زۆرترین دەلیڤەیێن كاری ب تایبەتی ب ڕێكا هەمەجۆركرنا ئابۆری چێكەین. بەری نوكە گەلەك گرنگی ب كەرتێ چاندنێ هاتبوو دان، نوكە ژی بۆ كەرتێ پێشەسازیێ مە هەمان بەرنامە یێ هەی. كەرتێ گەشتوگۆزارێ ژی ئێك ژ وان كەرتانە یێن مە گەلەك گرنگی پێ دای، و ئەڤە هەموو پێكڤە دێ بنە هاریكار هەم بۆ ڕێكخستن و زێدەكرنا دەلیڤەیێن كاری بۆ خەلكێ مە، هەم ژی بۆ پێشڤەبرنا ئابۆرێ هەرێما كوردستانێ. ب دلخوەشی ڤە من بهیست كو ناحیا باتێلێ ئێكانە ناحیەیە ل سەر ئاستێ هەموو ئیراقێ و هەرێما كوردستانێ كو ڕێژەیا بێكاریێ تێدا بوویە سفر. ئەڤە جهێ دەستخوەشیێ یە، پیرۆزباهیێ ل ناحیا باتێلێ و ئیدارەیا سەربەخوە یا زاخۆ و هەموو كوردستانێ دكەم. هەكە كەسەكی بخوە نەڤێت كار بكەت، نەخاسمە وەكو من بهیستی، هێشتا گەلەك دەلیڤەیێن كاری یێن هەین كو خەلكێ دی بهێت ل ڤێ ناحیێ و ڤێ دەڤەرێ ل دووڤ كاری بگەڕیت. ئەڤە جهێ دەستخوەشیێ یە و هیڤییا من ئەوە كو ل هەموو باژێڕێن كوردستانێ و ل هەموو دەڤەرێن كوردستانێ دیسان پێنگاڤێن باش بهێنە هاڤێتن بۆ پێشڤەبرنا ئابۆری و كەرتێ تایبەت ل سنۆرێ خوە، ئەوا دبیتە هاریكار بۆ حوكمەتا هەرێما كوردستانێ. پێدڤییە حوكمەت ژی هەر شیانەكا هەبیت بۆ پشتەڤانیكرن و هێسانكاریێ ل گەل كەرتێ تایبەت بكار بینیت دا كو ئەم زێدەتر بشێین ئابۆرێ هەرێما كوردستانێ بەر ب پێش ببەین.
ئەز گەلەك دلخوەش بووم ب دیتنا ڤان پڕۆژەیێن دی یێن كو هندەك ژ وان نوكە بەرێ بنیاتی بۆ دهێتە دانان. بێگومان ئەو ژی دێ دەلیڤەیێن كارێ یێن زێدەتر پەیداكەن. كۆمپانییا جیتۆر ژی كو كۆمپانییەكا چینییە، بۆ لێكدان و چێكرنا ترۆمبێلان ل ڤێرە ل هەرێما كوردستانێ دێ بیتە ئێكەمین نموونە ل سەر ئاستێ كوردستانێ و دێ پێشڤەچوونەكا مەزن د بوارێ پێشەسازییا ترۆمبێلان دا ل كوردستانێ كەت و دەلیڤەیێن كارێ یێن زێدەتر ل ڤێ دەڤەرێ پەیداكەت. ژ ئالییەكێ دی ڤە، دێ گەلەك زانست و شارەزاییێ د ڤی بواری دا پێشكێشی خەلكێ مە و ب تایبەتی گەنجێن مە كەت، و د بوارێ تەكنەلۆژیایێ و د بوارێ كەرتێ پێشەسازیێ دا بێگومان دێ ڕۆلەكێ گەلەك كاریگەر بینیت.
هەروەسا (مۆتۆر پلێكس) كو ئەو ژی كۆمەلگەهەكە بۆ پێشڤەبرنا كەرتێ پێشەسازییا ترۆمبێلان، یان فێركرن و هاریكاریكرنا گەنجێن مەیە كا دێ چەوا فێری شێوازێ هاژۆتنا ترۆمبێلان بن یان فێری ڕێنمایی و تایبەتمەندییێن كەرتێ پێشەسازییا ترۆمبێلان بن.

ل ڕۆژا ئێك شەمبی، 25 چریا ئێكێ 2026، مەسرور بارزانی، سەرۆكێ حوكمەتا هەرێما كوردستانێ، بەرێ بنیاتێ بۆ پڕۆژەیێ گەلیێ زاخۆ یێ گەشتیاری دانا و د چارچۆڤەیێ ڕێورەسمێ دانانا بەرێ بنیاتێ وی پڕۆژەی دا پەیڤەك پێشكێشكر ئەڤە دەقێ وێ یە :
گەلەك یێ دلخوەشم كو ئەڤرۆ ل گەل هەوە یێ پشكدارم د دانانا بەرێ بنیاتێ پڕۆژەیەكێ گەشتیاری یێ ستراتیژی دا، كو ل سەر ئاستێ هەرێما كوردستانێ و ئیراقێ دا نموونەیە و مەزنترین پڕۆژەیە. ب خێرهاتنەكا گەرم ل هەوە هەمووییان دكەم.
ئەز یێ پشتڕاستم پشتی ب دووماهیهاتنا ڤی پڕۆژەی، دێ بیتە ئەگەرێ گەشەپێدانا زێدەتر یا كەرتێ گەشتیاری ل دەڤەرا بەهدینان و ل هەرێما كوردستانێ ب شێوەیەكێ گشتی. دەستخوەشیێ ل كۆمپانییا مارمۆنتانا دكەم، برایێ عەزیز، حاجی سامان بۆ ڤی كارێ باش یێ كو ئەنجام دای. دەستخوەشیێ ل ئیدارەیا سەربەخوە یا زاخۆ دكەم بۆ وان هێسانكارییێن ئەنجام داین و هاریكارییا وان بۆ ڕاكێشانا وەبەرهێنەران ل سنوورێ ئیدارەیا سەربەخوە یا زاخۆ.
دەستخوەشیێ ل خەلكێ زاخۆ دكەم بۆ پشتەڤانییا وان یا بەردەوام و بۆ وێ حەژێكرنا نیشان دای بۆ ژینگەها خوە، باژێڕێ خوە و وەلاتێ خوە، ب ڕاستی جهێ دەستخوەشی و شانازیێ یە.
حوكمەتا هەرێما كوردستانێ د چارچۆڤەیێ كارنامەیا خوە دا، ب هاریكارییا كەرتێ تایبەت گرنگی مەزن دایە كەرتێ گەشتیاری. ئەڤە ژی د چارچۆڤەیێ سیاسەتا كابینەیا حوكمەتا هەرێما كوردستانێ دایە دا كو ئابۆرێ هەرێما كوردستانێ یێ هەمەجۆر بیت و ژێدەرێن داهاتی ل هەرێما كوردستانێ زێدەتر ببن.
هەرێما كوردستانێ ب تایبەتی دەڤەرا بەهدینان ژ ئالیێ گەشتیاری ڤە گەلەك جهێن خوەش و جوان یێن هەین و پێگەهەكێ گرنگ ژی یێ هەی، كو یا هەژییە و دەلیڤەیێن گەلەك باش ژی یێن هەین كو بشێت ببیتە ئێك ژ ژێدەرێن گرنگ یێن داهاتی ل سەر ئاستێ هەرێما كوردستانێ. هەروەسا گەلەك دەلیڤەیێن كاری ژی بۆ خەلكێ مە و گەنجێن مە پەیداكەت.
كوردستان خودان سروشتەكێ گەلەك جوان و گەلەك ژی دلڕەڤینە. بەری نوكە، ل ڤێ بهارێ ژی دەمێ ئەز هاتیمە زاخۆ، من سەرەدانا گەلەك ژ وان جهێن گەشتیاری كر، ب ڕاستی جهێن گەلەك جوان و خوەش تێدا هەنە. ئەوا ژ هەموویێ دلخوەشكەرتر، باوەر بكەن من چ گلێش ل دەوروبەرێن جادەیان نەدیت، ئەڤە جهێ دەستخوەشیێ یە.
هیڤیدارم خەلكێ مە مفا ژ ڤان پڕۆژەیێن گەشتیاری وەربگرن، هەروەسا مێڤان ژی دەمێ دهێنە ڤێرە، قەدرێ مێڤانان بگرن و داخوازێ دكەین ئەو ژی ڕێزێ ل ژینگەها هەرێما كوردستانێ بگرن د ڤان پڕۆژەیان دا دا كو ئەم بشێین پێكڤە پێنگاڤێن باشتر بۆ پێشڤەبرنا ئابۆرێ هەرێما كوردستانێ، ب تایبەتی ل ڤێ دەڤەرێ ب هاڤێژین.
ل سەردەمێ بەرێ مخابن گەلەك زیان ب سروشتێ كوردستانێ گەهشتییە، گەلەك گوندێن مە هاتینە وێرانكرن. حەتا نوكە ژی ژ بەر ئالۆزی و شەڕ و پێكدادان و نەبوونا ئارامی و ئاسایشێ ل هندەك خالێن سنۆری، هێشتا مە نەشیایە وان جهان ئاڤەدان بكەینەڤە. هیڤییا مە ئەوە د نێزیكترین دەم دا ئارامی و تەناهی بۆ وان جهان ژی بزڤڕیت و ئەڤ چەندە ژی جارەكا دی ببیتە پشكەك ژ پڕۆژەیێن گەشتیاری ل سنۆرێ ئیدارەیا سەربەخوە یا زاخۆ.
ژ بلی وێ چەندێ كو كوردستانێ سروشتەكێ جوان یێ هەی، ژ ئالیێ دیرۆكی ژی ڤە گەلەك جهێن دیرۆكی و سەرنجڕاكێش یێن هەین ل سەر ئاستێ هەموو هەرێما كوردستانێ. ل دهۆك، زاخۆ، ئامێدی، ئاكرێ، سێمێل، بەردەرەش و هەموو جهان، دەڤەرا بەهدینان ب شێوەیەكێ گشتی، هەروەسا ل هەولێر، سۆران، ڕەواندز، شكەفتا شانەدەر، كەلها هەولێرێ، گەلەك جهێن دی یێن دیرۆكی یێن هەین كو خەلك دشێت سەرەدانا وان بكەت و مفای ژێ وەربگریت. پاشی ل دەڤەرا گەرمیان، سلێمانی، ڕانیە و قەلادزێ گەلەك جهێن دیرۆكی هەنە كو خەلك دشێن سەرەدانا وان بكەن. ژ بلی شوونوارێن دیرۆكی، گەلەك جهێن ئایینی ژی هەنە، وەكو مزگەفت، دێر، و پەرستگەهان كو دیسان دبنە ئەگەرەك بۆ سەرەدانیكرنا خەلكەكێ زۆر ژ دەرڤە و ناڤخوەیا هەرێما كوردستانێ سەرەدانا وان جهان بكەن.
لەوڕا كوردستان یا بەرهەڤە كو گرنگییا زێدەتر ب كەرتێ گەشتوگۆزارێ بهێتە دان. چەند ئەڤ پڕۆژە زێدەتر بهێنە بجهئینان، دەلیڤەیێن كاری ژی بۆ خەلكێ مە دێ زێدەتر بن و دشێن ئاستێ ژیانا خوە باشتر بكەن و ئاستێ كوالێتیا پێشكێشكرنا خزمەتگۆزارییان بلندتر بكەن. ل سەر حوكمەتێ ژی پێدڤییە هاریكارییا زێدەتر بكەت، ئاسانكارییا زێدەتر بكەت د پێدانا مۆلەتا دا و هاریكاریكرنا ڤان پڕۆژەیان، هەروەسا هەكە پڕۆژەیێن هەڤپشك ژی هەبن، هەر چ تشتێ پێدڤی بیت حوكمەت دێ یا هاریكار بیت بۆ وێ چەندێ كو گرنگیێ ب هەمەجۆركرنا ئابۆرێ هەرێما كوردستانێ بدەین.
د گەلەك دەلیڤەیان دا حوكمەتێ هێسانكاری كرییە، ب تایبەتی د چێكرنا ڕێكوپران دا یان زێدەكرنا خزمەتگۆزاریێن دیجیتالی، هەم بۆ دامەزراندنا كۆمپانیایان و هەم ژی بۆ خزمەتگۆزاریێن ڕۆژانە یێن خەلكی دەمێ دڤێت كارێن خوە ئەنجام بدەن. ئەڤ خزمەتگۆزاریێن دیجیتالی دێ گەلەك د هاریكار بن بۆ وێ چەندێ كۆمپانییا د زووترین دەم دا كارێن خوە ب دووماهی بینن و خەلك ژی مفا ژ لەزاتییا خزمەتگۆزاریێن دیجیتالی وەربگریت.
ل دووماهیێ داخوازا من ژ هەموو وەلاتییان و گەشتیارێن دهێنە ڤێرە ئەوە كو ڕێزێ ل سروشتێ هەرێما كوردستانێ بگرن، ڕێزێ ل ڤان پڕۆژەیان بگرن، پاقژیێ بپارێزن. سەبارەت ب مە ڤە هەرێما كوردستانێ، ژ بلی وێ چەندێ كو پاقژی سروشتێ وێ جوانتر دكەت، بەلكو هەر بهۆستەكا ئاخا مە یا پیرۆزە، ژ بەر كو خزمەت و خەبات و زەحمەتەكا زۆر بۆ هاتییە كێشان، خوونا شەهیدێن مە ل سەر ڕێژتییە بۆ پاراستنا وێ. لەوڕا پاقژڕاگرتنا ئاخا مە و وەلاتێ مە ئەركە، و هیڤیدارم هەموو وی ئەركی بجهـ بینن و سروشتێ خوە ب پاقژی ڕابگرن.

پەیڤدارێ حوكمەتا هەرێما كوردستانێ ڕاگەهاند: دانوستاندنێن د ناڤبەرا هەولێرێ و بەغدایێ دا ل سەر ڕەشنڤیسێ بودجەیا سالا 2027ێ چڕ بووینە و مەرەم ژێ مسۆگەركرنا داخوازیێن خەلكێ كوردستانێ یە، د هەمان دەم دا باس ل سەرەدانا مەیدانی یا سەرۆكێ حوكمەتا هەرێما كوردستانێ بۆ پارێزگەها دهۆكێ كر كو ب مەرەما دووڤچوونا ڕاستەوخوە بۆ ئاریشە و داخوازیێن ئاكنجییێن دەڤەرێ دهێتە ئەنجامدان.
پێشەوا هەورامانی، پەیڤدارێ حوكمەتا هەرێما كوردستانێ د داخویانییەكێ دا بۆ كەنالێ كوردستان24، ئاماژە ب وێ چەندێ كر، شاندەكێ حوكمەتا هەرێمێ نوكە ل بەغدایە و د دانوستاندنان دایە ل گەل بەرپرسێن وەزارەتا دارایی یا ئیراقێ، ب مەرەما بنەجهكرنا ماف و شایستەیێن دارایی یێن خەلكێ هەرێما كوردستانێ د ناڤ ڕەشنڤیسێ یاسایا بودجەیا گشتی یا سالا 2027ێ دا.
پەیڤدارێ حوكمەتا هەرێمێ ڕۆهنكر، كو ڕەشنڤیسێ نوكە یێ بودجەی وەكو پێدڤی د ئاستێ چاڤەڕێكرن و مافێن هەرێما كوردستانێ دا نینە، لەوڕا شاندێ دانوستاندكار یێ ڕژدە ل سەر وێ چەندێ كو گوهۆڕینێن پێدڤی تێدا بهێنە كرن هەتا بگەهنە ئەنجامەكێ دادیانە و پشتڕاستكەر.
د هەمان دەم دا ئاشكرا كر، ل نێزیك، شاندەكێ حوكمەتا ئیراقێ دێ سەرەدانا هەولێرێ كەت و ل گەل مەسرور بارزانی، سەرۆكێ حوكمەتا هەرێما كوردستانێ كۆمبیت بۆ باسكرن و گەنگەشەكرنا هەمان پرسێ.
د پشكەكا دی یا داخویانییا خوە دا، پێشەوا هەورامانی ڕۆناهی ئێخستە سەر سەرەدانا سەرۆكێ حوكمەتا هەرێمێ بۆ دەڤەرا بەهدینان و گۆت: چەند ڕۆژەكە مەسرور بارزانی ل باژێڕێ دهۆكێ یە و چەند ڕۆژێن دی ژی دێ ل دەڤەرێ مینیت، ب مەرەما وێ چەندێ كو ژ نێزیك ڤە و ب هووری گوهـ ل داخوازی و تێبینییێن هەموو تەخ، چین و پێكهاتەیێن جودا بگریت.
پەیڤدارێ حوكمەتا هەرێمێ ئاماژە ب وێ چەندێ ژی كر، سەرۆكێ حوكمەتێ كۆمبوونەكا بەرفرەهـ ل گەل یەكەیێن كارگێڕی یێن پارێزگەها دهۆكێ ئەنجام دا و تێدا دووپات كر كو ئارمانجا سەرەدانا وان، ئاگەهداربوونە ژ ئاریشە و پێدڤییان و دیتنا باشترین میكانیزمە بۆ پێشكێشكرنا خزمەتگۆزاریێن زێدەتر بۆ خەلكێ دەڤەرێ.
پێشەوا هەورامانی ڕاگەهاند ژی: سەرۆكێ حوكمەتا هەرێمێ بڕیار دا ب پێكهینانا لیژنەیەكا تایبەتمەند بۆ باسكرن و گەنگەشەكرنا هەموو وان داخوازییێن ژ ئالیێ تەخ و چینێن دهۆكێ و یەكەیێن ئیداری یێن پارێزگەهێ ڤە هاتینە پێشكێشكرن. د هەمان دەم دا پشتڕاستی دا كو حوكمەت ب هەموو شیانێن خوە ڤە وان داخوازییان ب گرنگ وەردگریت و د چارچۆڤەیێ دەستهەلات و شیانێن خوە دا دێ بزاڤا بجهئینانا وان كەت،