ئاخ و سەقایێ زاخۆ بۆ چاندنا دارێن فستەقان یێن گونجایینە
زاخۆ، دلۆڤان هالۆ:
ڕێڤەبەرێ گشتی یێ چاندنێ ل ئیدارەیا سەربخوە یا زاخۆ دیاركر، ئاخ و سەقایێ زاخۆ بۆ چاندنا دارێن فستەقان یێ گۆنجاییە، و ژبەر ڤێ چەندێ ل زاخۆ و باتیفا چەندین جۆتیاران دەست ب چاندنا دارێن فستەقان كرینە، و سەركەفتن ژی تێدا ئیناینە.
سەلمان محەمەد، ڕێڤەبەرێ گشتی یێ چاندنێ ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر، ئێكەمین پێنگاڤا چاندنا دارێن فستەقان ل گۆندێ گۆفكا بنی ژ لایێ جۆتیارەكێ ناڤدار و نموونە یێ دەڤەرداریا باتیفا بناڤێ حەجی مەسعوود هاتیە هاڤێتن، كو ل سەر رووبەرەكێ بەرفرەهـ بیستانەكێ مەزن و تایبەت بۆ چاندنا دارێن فستەقان تەرخانكریە.
ناڤهاتی ئاماژە ب وێ چەندێ ژی كر، ل دەشتا سندیان ژی گەلەك دارێن فستەقان هاتینە چاندن، ب تایبەت ل گۆندێ پەرەخێ یێ سەر ب ناحیا دەركارێ ڤە ل ئیدارەیا سەربخوە یا زاخۆ.
گۆت ژی:»دارێن فستەقان مفادار و پڕ بەرهەمن، و داخوازیەكا زۆر ل سەر كڕینا فستەقان هەیە، لەورا ئەم پشتەڤانیا جۆتیارێن خوە دكەین ژ بۆ چاندنا دارێن فستەقان».
