ئاریشه‌یێن ئاڤ و جاده‌یێن بامه‌رنێ دێ هێنه چاره‌سه‌ركرن
ئه‌ڤرۆ نیوز، مه‌حمود نهێلی
سه‌رۆكێ باژێرڤانیا بامه‌رنێ بۆ ئه‌ڤرۆ نیوز دیاركر، ژبۆ چاره‌سه‌ركرنا ئاریشه‌یێن هاتنوچونێ و كێماسیا ئاڤێ وان ده‌ست ب چه‌ندین پرۆژه‌یێن خزمه‌تگوزارى كریه ل سنورێ باژێرڤانیا بامه‌رنێ و گۆژمێ 300 ملیون دیناران بۆ هاتینه ته‌رخانكرن.
ره‌شید محه‌مه‌د، سه‌رۆكێ باژێرڤانیا بامه‌رنێ دیار ژى كر، كو هنده‌ك جاده‌یێن وان یێن كه‌ڤنن و چه‌ندین ساله نه‌هاتینه نووژه‌نكرن و چێكرن و پێدڤى ب نووژه‌نكرنێ نه و گۆت: ( پتريا ڤان جاده‌یان دێ هێنه چێكرن و نووژه‌نكرن ).
ناڤهاتى خویا ژى كو ل سه‌نته‌رێ ناحیا بامه‌رنێ و هه‌روه‌سا ده‌وروبه‌ران ژى ئاریشا ئاڤا ڤه‌خوارنێ هه‌بوو كو ژ ئه‌نجامێ هشكه‌سالیێ و كێم بوونا ئاڤا بن ئه‌رد دروست ببوو و بۆ ڤێ یه‌كێ ژى مه ده‌ست ب سه‌خبێكرنا سه‌رۆكانیا ئاڤا ڤه‌خوارنێ كریه ل بامه‌رنێ و ب ڤێ چه‌ندێ ژى دێ ئاریشه‌یا ئاڤێ ل ده‌ڤه‌رێ تا رادیه‌كى چاره‌سه‌ركه‌ت.
گۆت ژى: ( چێكرنا دیوار و په‌رژانێ گورستانێ ژى ئێك ژ كارێن فه‌ر بوویه و نوكه دێ گورستانا بامه‌رنێ ژى هێته دیواركرن ب ره‌نگه‌كێ گه‌له‌ك باش).
خویاژى كر، دوورێن 300 ملیون دیناران بۆ ئه‌نجامدانا ڤان پرۆژه‌یان هاتینه ته‌رخاكرن، ئاماژه كر ژى كو وان چه‌ندین پرۆژه‌یێن دی یێن گرنگ بلند كرینه كو ل ده‌ڤه‌رێ بهێنه ئه‌نجامدان، لێ هێشتا رازیبوون ل سه‌ر نه‌هاتیه كرن.