د سالڤەگەڕا نەهێ یا ئەنجامدانا ڕیفراندۆما سەربەخوەیا كوردستانێ دا، سەرۆك مەسعود بارزانی پەیامەك بەلاڤكر.
سەرۆك بارزانی د هەژمارا فەرمی یا خوە دا ل سەر تۆرا جڤاكی یا (ئێكس)، ب هەلكەفتا دەربازبوونا نەهـ سالان ل سەر پرۆسەیا ڕیفراندۆما سەربخوەیێ، پەیامەكا كورت و پڕ ڕامان نڤیسییە و تێدا دبێژیت»دەنگەك بۆ دیرۆكێ، یادەك بۆ نڤشان».

ئەبراهام حەمادە، ئەندامێ كۆنگرێسێ ئەمریكی د پەیوەندییەكا تەلەفۆنی دا ل گەل نێچیرڤان بارزانی، سەرۆكێ هەرێما كوردستانێ، سوپاسییا ڕۆلێ وی كر د پەیوەندیكرن ب سەركردەیێن دەڤەرێ و پشتەڤانیكرنا وی بۆ بزاڤێن سەرۆكێ ئەمریكی دۆنالد ترەمپی ژ بۆ چارەسەركرنا ئالۆزییان، د هەمان دەم دا پشتڕاستی دا كو هەڤپشكییا ئەمریكا ل گەل هێزێن پێشمەرگەی دێ بەردەوام بیت.
ئەڤ پەیوەندییە د دەمەكێ دایە كو بڕیارە هەتا 30ی ڤێ مەهێ هێزێن ئەمریكی خوە ژ ئیراقێ ڤەكێشن.
حەمادە د پەیامەكێ دا سوپاسییا سەرۆكێ هەرێما كوردستانێ كر كو بەردەوام ل گەل سەركردەیێن سەرەكی یێن دەڤەرێ ل سەر هێلێ یە ژ بۆ دروستكرنا تێكگەهشتنێ و ئارامكرنا ڕەوشێ.
وی ئەندامێ كۆنگرێسێ ئەمریكی باسێ وێ چەندێ كر، هێزا پێشمەرگەیێ كوردستانێ هەڤپەیمانەكا سەرەكی بوو د شكاندنا داعشێ دا.
دیاركر ژی، سەرەرای ڤەكێشانا هێزێن ئەمریكی ژ ئیراقێ، هەڤپەیمانی و هەڤپشكییا سەربازی یا د ناڤبەرا واشنتۆنێ و پێشمەرگەی دێ بەردەوام بیت و ب دووماهی ناهێت.
هەروەسا، حەمادە سوپاسییا نێچیرڤان بارزانی كر ژ بۆ پشتەڤانیكرنا وی ل بزاڤێن دۆنالد ترەمپی، سەرۆكێ ئەمریكا ب مەرەما دیتنا چارەسەرییەكا بنەرەتی و بەردەوام بۆ ڕەوشا دەڤەرێ د چارچۆڤەیێ (ئۆپەراسیۆنا تورەیی داستان ئاسا).

سەرۆكێ حوكمەتا هەرێما كوردستانێ د سالڤەگەرا نەهێ یا ڕیفراندۆما سەربەخوەیا كوردستانێ دا، پەیامەك بەلاڤ كر و تێدا پیرۆزباهی ل گەلێ كوردستانێ كر.
مەسرور بارزانی، سەرۆكێ حوكمەتا هەرێما كوردستانێ د هەژمارا خوە یا تایبەت د تۆرا جڤاكیۆا «ئێكس» دا، د پەیامەكێ دا ب هەلكەفتا سالڤەگەرا ڕیفراندۆما سەربەخوەیا كوردستانێ نڤیسیە «سالڤەگەرا سەركەفتنا ئیرادەیا گەل، پیرۆز و پایەدار بیت».

د سالڤەگەڕا ڕیفراندۆمێ دا، كۆسرەت رەسول عەلی، ڕیفراندۆما سەربخوەیێ ب ئێك ژ رۆژێن دیرۆكی یێن خوەش یێن ژیانا خوە دبینیت.
كۆسرەت رەسول عەلی، جێگرێ پێشتر یێ سەرۆكێ هەرێما كوردستانێ ڤیدیۆیەك د سالڤەگەڕا ڕیفراندۆمێ دا ل تورا جڤاكییا فەیسبووكی بەلاڤ كرییە و ل سەر نڤیسییە» شانازی بوو بۆ من، ئێك ژ ڕۆژێن دیرۆكی یێن خوەش یێن ژیانا من».كو سەرپەرشتیكرنا ڕیفراندۆمێ ل كەركووكێ و دەڤەرێن كوردستانی وەكو ئەركەكێ نیشتمانی و نەتەوەیی ب من هاتیە سپاردن».
كۆسرەت رەسول عەلی هەروەسا نڤیسییە «د ڕوونەكا دیرۆكی و دەگمەن دا، خەلكێ كەركووكێ و دەڤەرێن كوردستانی د ڕیفراندۆمێ دا دەنگ دان و كوردستانیبوونا وان دەڤەران سەلماندن».

د 7ێ حوزەیرانا 2017ێ دا ل سەلاحەدین، نوونەرێن بلند یێن پارتێن سیاسی یێن د ناڤ پەرلەمان و حوكمەتا هەرێما كوردستانێ دا ب بەرهەڤبوونا سەرۆك بارزانی و كۆسرەت ڕەسول، جێگرێ سەرۆكێ هەرێمێ یێ وێ دەمی و سەرۆكێ حوكمەتا هەرێمێ و سەرۆكێ كۆمسیۆنا بلند یا هەلبژارتنێن كوردستانێ، بڕیارا ئەنجامدانا ڕیفراندۆمێ هاتەدان و جڤاتا بلند هاتە پێكئینان. ئەو ئالیێن پشكدار د جڤاتێ دا پێم دهاتن ژ: پارتی دیموكراتی كوردستان، ئێكەتی نیشتمانی كوردستان، ئێكگرتووا ئیسلامی، بزاڤا ئیسلامی، حزبا زەحمەتكێشان، حزبا شیوعی، حزبا سۆسیالیست و پێكهینەرێن دی.
د هەمان كۆمبوونێ دا، ڕۆژا 25ێ ئیلۆنا 2017ێ وەكو ڕۆژا ئەنجامدانا ڕیفراندۆمێ ل هەرێما كوردستانێ و دەڤەرێن كوردستانی یێن دەرڤەی ئیدارەیا هەرێمێ هاتە دیاركرن و هەموو پارت و ئالیێن سیاسی یێن كوردستانێ ب پێكهینەران ڤە، ڕازیبوونا خوە بۆ ئەنجامدانا وێ دیار كر.
10 ڕۆژان بەری ئەنجامدانا وێ، د 15ێ ئیلۆنا 2017ێ دا، پەرلەمانێ كوردستانێ ب پترییا دەنگان بڕێڤەچوونا ڕیفراندۆمێ پەسەند كر. كۆمسیۆنا بلند یا هەلبژارتن و ڕاپرسیان ل هەرێما كوردستانێ سەرپەرشتییا بڕێڤەچوونا وێ كر.
بڕیارا ئەنجامدانا ڕیفراندۆمێ قووناغەكا دی یا گرنگ یا خەبات و قوربانیدانا گەلێ كوردستانێ بوو، ب تایبەت كو هەموو ئالییان پشتەڤانییا خوە بۆ پڕۆسەیێ دوپات كر و سۆز دا هەموو شیانێن خوە بۆ سەرئێخستنا وێ بكار بهینن.
گرنگییا وێ بڕیارێ د وێ چەندێ دا دەركەت كو نە تنێ هەرێما كوردستانێ، بەلكو دەڤەرێن كوردستانی یێن دەرڤەی ئیدارەیا هەرێمێ ژی ڤەگرت. بڕیار ل سەر بنەمایێ مافێ چارەنڤیسی بوو، كو مافەكێ ددانپێدانكری یێ نەتەوەیێن ئێكرتییە و گەلێ كوردستانێ ژی ژ ڕوویێ ئاخ، زمان، كلتوور، دیرۆك و ناسنامەیێ ڤە هەموو تایبەتمەندییێن مللەتەكی یێن هەین و مافێ وی هەیە بڕیارێ ل سەر چارەنڤیسێ خوە بدەت.
د 25/9/2017ێ دا، ڕیفراندۆما خەلكێ كوردستانێ بڕێڤەچوو. چار ملیۆن و 561 هزار و 255 كەسان مافێ دەنگدانێ هەبوو، سێ ملیۆن و 305 هزار و 925 كەسان پشكداری كر (پتری 72%)، ژ وان ژی دوو ملیۆن و 861 هزار و 471 كەسان ب «بەلێ» دەنگ دا (پتری 92%).
بڕیارا ڕیفراندۆمێ مافەكێ یاسایی بوو، چونكی گەلێ كورد ژ دەمێ دروستبوونا دەولەتا ئیراقێ خەبات بۆ مافێن خوە و پێكڤەژیانا ئاشتییانە كربوو، لێ دەستهەلاتدارێن ئیراقێ هەموو سۆزێن خوەشكاندبوون.
پشتی ڕیفراندۆمێ ژی، د 16ێ ئۆكتۆبەرا 2017ێ دا، هێرش كرە سەر كەركووكێ و دەڤەرێن كوردستانی، كو بوو ئەگەرێ شەهیدبوونا پێشمەرگە و وەلاتییان و ئاوارەبوونا ب هزاران كەسان.

پەیڤدارێ حوكمەتا ئیراقێ ڕاگەهاند، 30 ئیلۆنێ شایستەیەكا سەروەریێ یە و دبیتە بنەمایەك بۆ ڤەگوهاستنا پەیوەندیێن ئیراقێ ل گەل دەولەتێن هەڤپەیمانییا نێڤدەولەتی بۆ پەیوەندیێن دوو قۆلی ل سەر بنەمایێ ڕێزگرتنێ ل سەروەری و بەرژەوەندییێن هەڤپشك، هەڤدەم ڕاگەهاند، حوكمەت بەردەوامە ل دووماهیكئینانا ئەركێ سەربازی یێ هەڤپەیمانان ب گورەی دەم و میكانیزمێن ڕێككەفتی.
حەیدەر عەبوودی، پەیڤدارێ حوكمەتا ئیراقێ، 2026 گۆت «30 ئیلۆنێ شایستەیەكا سەروەریێ یە بۆ دەولەتا ئیراقێ پشتگرێدانێ ب تێكگەهشتن و پێگیریێن فەرمیدكەت» ، گۆت ژی:»حوكمەت بۆ تەمامكرنا ڤی پڕۆژەی ڕێباز و ڕێكارەكا ڕۆهن وەرگرتییە و سەرەدەریێ د گەل دا دكەت وەكو نەگهۆڕەكێ نیشتمانی و پەیوەندییان ل گەل وەلاتێن هەڤپەیمانان بۆ چارچۆڤەیێ پەیوەندییێن دوو ئالییانە ل سەر بنەمایێ ڕێزگرتنێ ل سەروەرییا ئاخا ئیراقێ ڤەدگوهێزیت».
پەیڤدارێ حوكمەتا ئیراقێ باسی وێ چەندێ ژی كر، ئیراق د ڤێ دۆسییێ دا هەموو كەرەستە و كارتێن دەستووری، سیاسی و دیپلۆماسی ل بەر دەست دانە، ژ بلی شیانێن ب ڕێڤەبرنا ئاسایشا نیشتمانی ب ڕێیا دەزگەهێن فەرمی و هێزێن چەكدار.
هەروەسا گۆت ژی «حوكمەت بەردەوامە ل دووماهیكئینانا ئەركێ سەربازی یێ هەڤپەیمانان ب گورەی ژڤان و میكانیزمێن پەسەندكری، و ل دەرڤەیی ئیرادەیا دەولەتا ئیراقێ ژی چو گۆڕانكارییەك ل ڤێ ڕێڕەوا ڕوو نادەت».
هەڤدەم ڕاگەهاند، سەرۆكوەزیرێن ئیراقێ ل دەستپێكا دەستبكاربوونا خوە سەروەرییا دەولەتێ ل بەراهییا كارنامەیا خوە دانایە، و «ڕۆژا سەروەریێ» كریە دەستپێكا ڕاگەهاندنا قووناغەكا نوو كو دەستهەلاتا دەولەتێ ب تەمامی ب سەر ئاخا وێ دا بهێتە چەسپاندن، بڕیارا ئەمنی بهێتە ئێكخستن و دەستهەلاتا چەكداری تنی د دەستێ دەزگەهێن یاسایی و دەستووری دا بیت.

بریكارێ وەزارەتا پلاندانانێ یا حوكمەتا هەرێما كوردستانێ ڕاگەهاند، ئالییێن فیدرال دەستكاری د خشتەیا سەرژمێرییا گشتی دا كریە و ب تەمامی ڕەت دكەن پشكا هەرێمێ د بودجەی دا بۆ 12.67% بهێتە كێمكرن، د هەمان دەم دا دووپاتیێ ل سەر وێ چەندێ دكەت كو مافێ دەستووریێ هەرێما كوردستانێ یە پشكا وێ ل سەر بنەمایێ 14.14% بهێتە بنەجهكرن.
سیروان محەمەد، بریكارێ وەزارەتا پلاندانانێ یا حوكمەتا هەرێما كوردستانێ گۆت» بەغدا ب ڕێكا دەستەیا ئامارێ یا فیدرال، خشتەیەك بۆ وەزارەتا وان ڤریكرییە كو ب ڕێیەكا نەیاسایی دەستكاری د هەژمارا ئاكنجییێن هەرێما كوردستانێ دا كریە».
ناڤبری ئاماژە ب وێ چەندێ كر كو د وێ خشتەی دا هەژمارا ئاوارە، پەنابەر و بیانییێن ل هەرێمێ ئاكنجی هاتینە دەرێخستن و ئاوارە ژی هاتینە ڤەگەڕاندن بۆ پارێزگەهێن دی یێن ئیراقێ، ب وێ سەدەمێ ڕێژەیا ئاكنجییێن هەرێمێ بۆ 12.67% داكێشایە، ئەڤ چەندە ژی ژ ئالیێ جڤاتا وەزیرێن هەرێما كوردستانێ ڤە ب تەمامی هاتییە ڕەتكرن.
بریكارێ وەزارەتا پلاندانانێ ڕۆهن كر كو، هەرێما كوردستانێ پێداگیریێ دكەت كو ڕێژەیا 14.14% د بودجەیا سالا 2027 و سالێن بهێت دا ببیتە بنەما.
دەربارەی زیانێن دارایی یێن وێ بڕیارا بەغدایێ، گۆت»هەكە بودجەیا گشتی یا ئیراقێ ب 100 ترلیۆن دیناران بهێتە هەژمارتن، داكێشانا وێ ڕێژەیێ ژ 14.14% بۆ 12.67%، سالانە نێزیكی ترلیۆن و نیڤ دیناران زیانێ دگەهینیتە پشكا بودجەیا هەرێمێ، ئەڤ چەندە كارتێكرنێ ل سەر پڕۆژەیێن وەبەرهینانێ، شایستەیێن دارایی، قەر و بەخشینان دكەت».
سیروان محەمەد دوپاتی ل وێ چەندێ كر كو كێشە «سیاسییە نە تەكنیكییە»، چونكی بەرێ ل سەر داخوازا هەرێمێ سێ بڕیارێن جڤاتا وەزیرێن فیدرال بۆ ڕێكخستنا سەرژمێریێ و ب تایبەتی ل دەڤەرێن كوردستانی یێن دەرڤەی ئیدارەیا هەرێمێ و ئێكلاییكرنا داتایان دەرچووبوون، لێ وەزارەتا پلاندانانێ یا ئیراقێ پێگیری وێ بڕیارێ نەبوویە».
بریكارێ وەزارەتا پلاندانانێ دیاركر ژی، سەرەدەریكرنا بەغدا ب سیاسەتا «ئینفاقا فێعلی» غەدرەكا مەزنە و د بۆری دا بوویە ئەگەرێ ب هەدەردانا سێ بۆ چار مووچەیێن فەرمانبەرێن هەرێمێ، لەورا هەكە حوكمەتا فیدرال نەزڤڕیتە سەر دەستووری، سەركردایەتییا سیاسی یا هەرێما كوردستانێ دێ ڕاستەوخوە هێتە سەر هێلێ و پەنایێ بۆ هەموو پێرابوونێن یاسایی و دادگەها بلند یا فیدرال بەت».

ئەندامەكێ جڤاتا نوونەرێن ئیراقێ ژ فراكسیۆنا پارتی دیموكرتاتی كوردستان ڕاگەهاند، كو بێ تێگگەهشتن و ڕێككەفتن د ناڤبەرا هەولێرێ و بەغدایێ دا، پڕۆژەیاسایا بودجەیا گشتی یا 2027 یا ئیراقێ ناهێتە جڤاتا نوونەران و دەنگ ل سەر ناهێتەدان. بۆ ڤێ مەرەمێ ژی تێكگەهشتنەكا باش ل دەف سەرۆكایەتییا جڤاتا نوونەران هەیە.
د. زیرەك زێباری، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان گۆت «شاندێن هەولێرێ و بەغدایێ نها ددانوستاندنێن بەردەوام دانە بۆ وێ چەندێ كو ل سەر پشكا هەرێما كوردستانێ د بودجەیا گشتی یا 2027 یا ئیراقێ دا بگەهنە ڕێككەفتنێ، هیڤیدارین ب زووترین دەم ئەڤ چەندە ئێكلایی ببیت، هەرچەندە هێشتا هندەك خالێن ناكۆك د ناڤبەرا مە دا هەنە كو دڤێت بهێنە چارەسەركرن».
دەربارەی خالێن ناكۆك ژی ڕۆهنكر «وان پشكا هەرێمێ ب ڕێژەیا 12.67% دانایە، لێ ئەم داخواز دكەین ل سەر بنەمایێ داتا و ئەنجامێن دووماهی سەرژمێرییا ئیراقێ بۆ 14.1% بهێتە بلندكرن، چونكی جوداهییەكا مەزن د ناڤبەرا ڤان دوو هەژمارەیان دا هەیە. ژ ئالییەكێ دی ڤە، دەربارەی پرسا هنارتنا پەترۆلێ، وان مەرج داناینە كو دڤێت هەرێما كوردستانێ ڕۆژانە 450 هزار بەرمیلێن پەترۆلێ بفرۆشیت، د دەمەكێ دا ئەڤ ڕێژەیە گەلەك زۆرە و پێدڤی ب گەرەنتییا ئەمنی و لۆژستی هەیە».
د. زیرەك زێباری دوپاتی ل وێ چەندێ كر كو ب گشتی سەقایەكێ ئەرێنی هەیە و ئالی ل سەر وێ خالێ هەڤڕانە كو دڤێت بودجەیا 2027 بێ ڕێككەفتن دگەل هەرێما كوردستانێ نەهێتە دەربازكرن.

لژنەیا تایبەت ب پرسا سۆتەمەنیێ ل پەرلەمانێ ئیراقێ كۆمبوو و چەندین پێشنیاز بەرهەڤ كرن كو تێدا داخواز دكەن بهایێ پانزینێ ل هەرێما كوردستانێ هەڤشێوەیێ پارێزگەهێن ئیراقێ لێ بهێت، هەروەسا لژنەیا دەمكی یا جڤاتا نوونەرێن ئیراقێ بۆ چارەسەركرنا كێشەیا سۆتەمەنیێ و بەرسڤدانا پێشنیازێن وەزارەتا نەفتێ و وەزارەتا سامانێن سروشتی، ل بەغدا كۆمبوو.
سیپان شێروانی، ئەندامێ لژنەیا نەفت و غازێ ل جڤاتا نوونەرێن ئیراقێ و ئەندامێ فراكسیۆنا پارتی دیموكراتی كوردستان ڕاگەهاند، ئەو كۆمبوونە تەمام بوویە و مە دەرهاڤێژ و پێشنیازێن خوە بەرهەڤ كرینە، هەروەسا ل دووف وان راسپاردەیێن ئاڕاستەی حوكمەتێ دبن، دبیت سەرەدەری ل گەل هەرێما كوردستانێ هەڤشێوەیێ پارێزگەهێن دی بیت یان پشكا دابینكرانا پانزینێ ژ داهاتێ نەفتا خاڤ بهێتە دیاركرن.
ناڤهاتی گۆت ژی: هەموو پێشنیاز د بەرژەوەندییا وەلاتییێن هەرێما كوردستانێ دانە» لەوما یان دڤێت كۆمپانییا بەلاڤكرنا بەرهەمێن نەفتی یا وەزارەتا نەفتا ئیراقێ پانزین و سۆتەمەنیێ بۆ هەرێما كوردستانێ دابین بكەت ب هەمان پیڤەر و بهایێن پارێزگەهێن دی (بەرامبەر وێ 50 هزار بەرمیلێن نەفتێ)، یان ژی هەكە نەفتا خاڤ بۆ هەرێمێ هاتە زێدەكرن، دبیت وەزارەتا نەفتا ئیراقێ تێچوویێ بەرهەمهینان و پارزینگەهان ب ستوویێ خوە ڤە بگریت داكو پانزین ب هەمان بهایێ دەڤەرێن دیتر بگەهیتە هەرێما كوردستانێ.
سیپان شێروانی ئاشكەرا كر ژی: د هەر دوو حالەتان دا، چ بەرهەمێ پارزینگەهان بهێتە دابینكرن چ نەفتا خاڤ، دڤێت وەزارەتا نەفتا ئیراقێ ب شێوازەكێ دابین بكەت كو بهایێ وێ هەڤشێوەیێ پارێزگەهێن ئیراقێ بیت، هەروسا ل دەمێ بجهئینانا ڤان خالان دا وەزارەتا سامانێن سروشتی یا هەرێمێ ژی دێ پێگیر بیت ب بەلاڤكرنا سۆتەمەنیێ ب هەمان بهایێ پارێزگەهێن ئیراقێ.

ئەندامەكێ پێشتر یێ جڤاتا نوونەرێن ئیراقێ داخوازێ دكەت، ل بودجەیا گشتی یا 2027 یا ئیراقێ دا، ڕێژەیا 14% وەكو پشكا هەرێما كوردستانێ بهێتە تەرخانكرن، ل بن ڕۆناهییا وێ سەرژمێریێ یا كو حوكمەتا فیدرال یا ئیراقێ ل سالا 2024 ئەنجامدای.
مەریوان قەرەنی، ئەندامێ پێشتر یێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان، گۆت: «ل ڤان ڕۆژان حوكمەتا فیدرال گەنگەشەیێ ل دۆر دانانا پڕۆژە یاسایا بودجەیا 2027 دكەت و بۆ ڤێ مەبەستێ ژی شاندێ حوكمەتا هەرێما كوردستانێ ل گەل تیمێن وەزارەتا دارایی و پلاندانانا ئیراقێ ل دانوستاندنان دایە ب مەبەستا دیاركرنا پشكا هەرێما كوردستانێ».
ڕۆهن ژی كر «واقعەك هەیە كو د ئیراقا نوو دا هەردەم هەست پێ هاتییە كرن، لێ ژ 2014ێ ڤە ب ڕۆهنی دیار بوویە و ژ 2018ێ ڤە ژی ب كریار هاتییە ب جهئینان ، ئەو ژی ئەوە كو ل 2018ێ دەستهەلاتدارێن بەغدایێ پشكا هەرێما كوردستانێ ژ 17% بۆ 12,67% كێم كر، ب وێ بەهانەیێ كو ئەو ب گوور ڕێژەیا ئاكنجییان بودجەی خەرج دكەن و ب قەبلاندنێن وان ژی ڕێژەیا ئاكنجییێن هەرێما كوردستانێ تنێ 12,67% بوو. لێ هەر ئەو سەرژمێرییا ئیراقێ ب خوە كری، دیار كر كو ڕێژەیا ئاكنجییێن هەرێما كوردستانێ 14% یە، لەوما پێدڤییە ژ بودجەیا 2027 ئەو ستەما ل هەرێما كوردستانێ هاتییە كرن بهێتە ڕاستڤەكرن».
باس ل وێ چەندێ ژی كر كو هەكە بودجەیا هەرێما كوردستانێ 14% ژی بهێتە دیاركرن، هێشتا دوو ستەمێن دی دمینن كو ئیراقێ بۆ كێمكرنا بودجەیا كوردستانێ داناینە، ئەو ژی بابەتێ خەرجییێن سیادی نە كو ئیراق سالانە پارەیەكێ زۆر ب ناڤێ خەرجییێن سیادی ژ بودجەی دبەت، پشتی لێدەركرنا وان خەرجییێن سیادی، ئەڤجا دهێن بودجەی ب سەر ئیراقێ دا دابەش دكەن. خالا دوویێ ژی بابەتێ خەرجییێن فعلی یە كو ئەو ژی دیسان بەهانەكە بۆ خوە ڤەدزینێ ژ خەرجكرنا بودجەیا كوردستانێ، لێ ل گەل وێ چەندێ ژی هەكە 14% بۆ كوردستانێ بهێتە تەرخانكرن، تا ڕادەیەكێ دادی ل دابەشكرنا بودجەی بۆ هەرێما كوردستانێ دێ ڤەگەڕیت.