ئالۆزیێن ل حەسەکێ مەترسیەکا مەزنە بۆ پاشەرۆژا کوردان ل سووریێ
ب، سه‌رجان مەحمود:
چەند رۆژن عەرەبێن ل باژێرێ حەسەکێ داخوازا ڤەگەرا هێزێن شامێ بۆ باژێری دکەن و ئێرشی مالێن کوردان دکەن، چاڤدێرێن سیاسی ژی هۆشداریێ ددەن هەکە رەوش نەهێتە کۆنترۆل کرن ئەو یەک دێ کاریگەریا خوە یا گەلەک خراب ل سەر پاشەرۆژا کوردان هەبیت.
نەشەت محەمەد چاڤدێرێ سیاسی یێ خەلکێ رۆژئاڤایێ کوردستانێ دیار کر، ئالۆزیێن ڤێ دووماهیێ ل حەسەکێ براستی ژی گەلەک مەترسیدارن، هندەک کەس وەسا دبینن کو دەستێ هێزێن دەرەکی د ئالۆزیان دا هەنە و دخوازن رەوشا سووریێ ئالۆز بکەن، دڤێت شام هەست ب بەرپرسیاریا خوە یا دیرۆکی بکەت و رێ نەدەت ئالۆزی دروست ببن، چونکی ئێرشکرنا ل سەر مال و جهێن کاری یێن کوردان ل حەسەکێ ب چو رەنگەکێ ناهێتە قەبوول کرن، ئەو یەک ل گەل وێ درووشما برایەتیا کوردان و عەرەبان ژی ناگونجیت و گرنگە شام یا پێدڤی بکەت دا رەوشا حەسەکێ ئارام بیت، چونکی ئالۆزیێن ل حەسەکێ دێ دەربازی دەڤەرێن دی ژی بن و وی دەمی دێ رەوش گەلەک خراب بیت.
ناڤهاتی ئەو یەک ژی دیار کر، کورد هەر رۆژ دبێژن وان ئاشتی و پێکڤەژیان دڤێت، مخابن هێشتا ژی هندەک گرۆپ و هێزێن توندرەو ل سووریێ هەنە کو ناخوازن کورد ژی وەکو عەرەبان بگەهنە مافێن خوە و بزاڤا دروستکرنا ئالۆزیان دکەن، دیارە وان نەڤێت کورد وەکو وەلاتیێن سووریێ خوەدان هەمان مافی بن یێ کو عەرەبان هەیە و گۆت: (هێزێن توندرەو ل سووریێ ب گشتی و ب تایبەتی ژی ل حەسەکێ دشێن ببنە مەترسی بۆ پاشەرۆژا هەموو سووریێ، نابیت شام ل هەمبەر رەوشا نها وەسا بێ هەلوەست بیت، هەرچەندە دو رۆژن رەوش هندەک ئارام بوویە، لێ کورد دلگرانن و وەسا دبینن هەکە جارەکا دی ئالۆزی دروست ببن دێ عەرەبێن توندرەو ئێرشی مالێن کوردان کەن، ئەو عەرەبێن کو هەتا دوهی کوردان ئەو ل هەمبەر ئێرشێن داعشێ پاراستن هەر هەمان عەرەبن ئەڤرۆکە ئێرشی مال و جهێن کاری یێن کوردان دکەن).
محەمەد ئەحمەد چاڤدێرێ سیاسی یێ خەلکێ حەسەکێ ژی دیار کر، مخابن هێشتا ژی هزرا توندرەویێ ل دەف گەلەک عەرەبان هەیە، ئەوێن چەند رۆژان بەری نها ل حەسەکێ ئێرشی کوردان کری دیارە ناخوازن رەوشا باژێری ئارام بیت، لێ دڤێت هەموو ئالی باش بزانن هەکە ل حەسەکێ رەوش ئالۆز بیت دێ ئەو یەک کاریگەریا خوە ل هەموو سووریێ کەت، هەکە ل جهەکێ زۆرداری ل کوردان بهێتە کرن کورد ل جهێن دی بێدەنگ نامینن، ڤێجا باشترە حوکمەتا شامێ و ئالیێن پەیوەندیدار ئێدی رێ نەدەن جارەکا دی عەرەبێن توندرەو ل حەسەکێ ئێرشی مال و جهێن کاری یێن کوردان بکەن، ئەو یەک دێ بیتە ئەگەرێ ئالۆزیێن گەلەک مەزن و گۆت: (هندەک کەس دبێژن هێزێن دەرەکی ئەگەرن، وی دەمی بلا کەسێن ئاقلمەند د ناڤ عەرەبێن ل حەسەکێ دا رێگریێ بکەن، بلا شام نەهێلیت، هەکە زیان بگەهیتە کوردان ل حەسەکێ، کوردێن ل باژێرێن دی یێن رۆژئاڤایێ کوردستانێ و سووریێ ژی بێدەنگ نامینن و بێگومان وی دەمی دێ رەوش گەلەک ئالۆز بیت).
ناڤهاتی ئەو یەک ژی دیار کر، ژ بەر پرۆسیسا ئینتیگراسیۆنێ نها چو هەرێمێن کوردی ل سووریێ نینن و کورد بووینە پشکەک ژ جڤاک و دەستهەلاتا سووریێ، لێ هەکە وەکو پێدڤی رێز ل کوردان و داخوازیێن وان نەهێتە گرتن دێ رەوش گەلەک ئالۆزتر لێ هێت، ئێرشێن توندرەوێن ل حەسەکێ سەلماند کو مەترسیێن گەلەک مەزن ل سەر پاشەرۆژا کوردان ل سووریێ هەنە، لێ هەکە بزاڤا ژناڤبرنا کوردان ل سووریێ بهێتە کرن وی دەمی کورد ژی دێ یا پێدڤی بۆ پاراستنا خوە کەن، دبیت د رەوشەکا وەسا دا ئێدی چو تشتەک ب ناڤێ ئینتیگراسیۆنێ ژی نەمینیت، ڤێجا گرنگە بەرپرسێن شامێ هزرا هەر تشتەکێ بکەن و سۆزێن کو بەری نها داینە بجه بینن و رێگریێ ل وان توندرەوان بکەن دا جارەکا دی روودانێن ل حەسەکێ دوبارە نەبن.
هژمارەک زێدە ژ چاڤدێرێن سیاسی یێن کورد ل هەر چار پارچەیێن کوردستانێ ژی نەرازیبوونا خوە ل هەمبەر روودانێن ل حەسەکێ نیشا دان و دیار کرن، مەترسیەکا گەلەک مەزن ل سەر پاشەرۆژا کوردان ل سووریێ هەیە، روودانێن ل حەسەکێ نیشا ددەت کو هێشتا ژی هندەک گرۆپێن توندرەو ناخوازن کورد ژی وەکو عەرەبان د ناڤ ئارامیێ دا بژین و وان دڤێت دیسان زۆرداریێ ل کوردان بکەن، دیارە توندرەوێن سووریێ دخوازن کورد هەردەم وەکو وەلاتیێن پلە دو ل سووریێ بژین، لێ ئەو سەردەم نەما و نها قووناغەکا نوو ل سووریێ دەستپێکریە کو تێدا رێککەفتن هاتیە کرن کورد ژی وەکو عەرەبان د رێڤەبرنا وەلاتی دا پشکدار بن، ڤێجا گرنگە شام رێککەفتنا کو بەری نها هاتیە کرن بجه بینیت و رێ نەدەت هندەک ئالی ئالۆزیان دروست بکەن.
ل گۆر باوەریا چاڤدێرێن سیاسی یێن کورد، دبیت دەستێ هێزەکا دەرەکی ژی د روودانێن ل حەسەکێ دا هەبیت، لێ هەر چاوا بیت دڤێت حوکمەتا سووریێ ب ئەرکێ خوە رابیت و رێ نەدەت هندەک گرۆپێن توندرەو مەترسیێ ل سەر پاشەرۆژا کوردان ل سووریێ دروست بکەن، چونکی نها سووریێ د رەوشەکا گەلەک تایبەت و هەستیار دایە، هەر ئالۆزیەکا نوو کو بیتە مەترسی بۆ کوردان دێ کاریگەریا خوە ل هەموو دەڤەرێن دی یێن سووریێ ژی کەت و دێ رەوشا سووریێ ب تەمامی تێک چیت.
