ئه‌ڤرۆ ئێكه‌تى و گۆڕان دێ بڕيارا دووماهيێ ل سه‌ر رێكه‌فتنا خوه ده‌ن
ئه‌ڤرۆ نيوز:
ئه‌ڤرۆ جڤاتا سه‌ركرداتيا ئێكه‌تى نشتيمانى كوردستان جڤاتا نشتيمانيا بزاڤا گۆڕان جودا بۆ بڕيار دان ده‌رباره‌ى ئيمزاكرنا رێكه‌فتناما د ناڤبه‌را وان دا دێ كۆم بن.
مسته‌فا چاوره‌ش، ئه‌ندامێ سه‌ركرداتيا ئێكه‌تى نشتيمانى كوردستان بۆ K24 راگه‌هاند: ئه‌ڤرۆ جڤاتا سه‌ركرداتيا ئێكه‌تى نشتيمانى كوردستان ده‌رباره‌ى ئيمزاكرنا رێكه‌فتنا ل گه‌ل گۆڕان دێ كۆم بيت.
گۆتژى: “د چه‌ند هه‌يڤێن بۆرى دا لژنه‌ك بۆ ڤێ رێكه‌فتنێ ل گه‌ل بزاڤا گۆڕان پێكئينايه و كار كريه، د كۆمبوونا ئه‌ڤرۆ يا جڤاتا سه‌ركرداتيێ دا دێ دانوستاندنێ ل سه‌ر خالێن وێ رێكه‌فتنێ كه‌ين، هه‌ر ئێك ژ مه دێ سه‌رنج و تێبينيێن خوه به‌رچاڤ كه‌ت”.
چاوره‌ش ئاماژه ب وێ چه‌ندێ ژى كر كو ئه‌و رێكه‌فتن دێ بۆ ته‌باى و ئێكرێزى و رێكخستنا ناڤمالا كوردى بيت و دژى چو لايه‌نێن سياسى نينه، ژ به‌ر هندێ “وه‌سان دبينم هه‌موو ئه‌ندامێن سه‌ركرداتيێ د كۆمبوونێ دا ده‌نگى پێ بده‌ن”.
ژ لايه‌كێ دى ڤه ميديا بزاڤا گۆڕان راگه‌هانديه كو ئه‌ڤرۆ جڤاتا نشتيمانيا گۆڕان ب سه‌رپه‌رشتيا نه‌وشيروان مسته‌فا رێكخه‌رێ بزاڤا گۆڕان كۆم بيت و ده‌نگى ل سه‌ر پرۆژێ رێكه‌فتنا ل گه‌ل ئێكه‌تى نشتيمانى كوردستان ده‌ن.
به‌رى نوكه ئێكه‌تى و گۆڕان لژنێن تايبه‌ت ل سه‌ر ئاستێ بلند بۆ رێكه‌فتنا ناڤبه‌را وان پێكئيناينه و حه‌فتيا بۆرى لژنه‌يێن هه‌ردولا كۆمبووينه و بڕياره ئه‌ڤرۆ ژى سه‌ركرداتيێن ئێكه‌تى و گۆڕان بڕيارا دووماهيێ د ده‌ربارێ ئيمزاكرنا رێكه‌فتنا ناڤبه‌را خوه بينن.
