ئه‌ڤ خزمه‌تگوزاريا فه‌يسبووكى دێ هێته داخستن
ئه‌ڤرۆنيوز:
كۆمپانيا فه‌يسبووك يا ئه‌مريكى، كو خودانا پرۆگرامێ تۆرا په‌يوه‌نديان (ماسنجه‌ر فه‌يسبووك)، دێ خزمه‌تگوزاريه‌كا وى پرۆگرامى ژكارئێخيت.
ل رۆژا دوشه‌مبى 8/1/2018، كۆمپانيا فه‌يسبووك، دراگه‌هاندنه‌كا فه‌رمى دا ئاشكراكر كو ل رۆژا 19/1/2018، خزمه‌تگوزاريا هاريكاريا كه‌سى (M) يا ماسنجه‌رێ فه‌يسبووكى، دێ ب شێوه‌كێ فه‌رمى هێته ژكارخستن.
خزمه‌تگوزاريا (M) بۆ وێ چه‌ندێ بوو، دناڤ ماسنجه‌رێ فه‌يسبووكى دا دشيان دابيت كه‌لوپه‌لان ژ بازارێن ئۆنلاين بهێن كرين، يان جهه‌كى ل خوارنگه‌هه‌كێ بۆ خوه دابين بكه‌ى وخوارنێ ژ خوارنگه‌هان بكرى، هه‌روه‌سا پلێتا فرۆكێ ژى ب رێيا ڤێ خزمه‌تگوزاريێ دهاته كرين.
كۆمپانيا فه‌يسبووكى ئه‌گه‌رێ داخستنا ڤێ خزمه‌تگوزاريێ ب رۆهنى ئاشكرا نه‌كريه، به‌لێ ئاماژه ب وێ چه‌ندێ كر كو بۆ باشتركرنا پرۆگرامێ خوه ئه‌و خزمه‌تگوزاريه دێ هێته داخستن، پێشبينى ژى دهێته كرن كو ل شوونا خزمه‌تگوزاريا (M)، ل داهاتى دا فه‌يسبووك خزمه‌تگوزاريه‌كا دى بۆ بكارئێنه‌رێن ماسنجه‌رێ فه‌يسبووكى به‌رده‌ست بكه‌ت.
پرۆگرامێ ماسنجه‌رێ فه‌يسبووكى ل سالا 2011 هاتبوو كاراكرن، نوكه ژى بكارئێنه‌رێن زۆر ل سه‌رانسه‌رى جيهانێ يێن هه‌ين، كۆمپانيا فه‌يسبووك خودانا وى يه، هه‌روه‌سا دهێته هژمارتن ئێك ژ باشترين پرۆگرامێن تۆرا په‌يوه‌نديان.
