ئه‌ڤ رێبازه خوڕاگره
ئحسان ئامێدی
هه‌رێما كوردستانێ ل ژێر گڤاشتن و گه‌فێن هه‌مه جۆره، سیاسینه، ئابۆرینه، ئاسایشینه، ده‌ستوورینه، یاسایینه، ناڤخوه‌یینه، ئیراقینه و هه‌رێمایه‌تینه، خودانێن وان گڤاشتن و گه‌فان وه‌سا بۆ دچن ب ڤان پێرابوونان دێ شێنه كوردستانێ و سه‌ركرایه‌تیا هه‌رێمێ نه‌چاركه‌ت ده‌ستبه‌رداری ماف و ده‌ستكه‌فتێن خوه‌یێن سروشتی و ده‌ستووری بین!، هه‌روه‌كو ڤان مێژوو نه‌خواندیه، و نزانن كو خودانێن راسته‌قینه‌یێن كوردستانێ ئه‌و سه‌ركرده‌نه یێن خودانێن رێبازا ئه‌ڤه پتر ژ سه‌د و ده‌هـ سالانه په‌یاما رزگاركرنا كوردستانێ راگه‌هاندی و خه‌باتێ بۆ دكه‌ن، و خوه ل به‌ر هه‌می كاودان و بارودوخا دگرن و ده‌ستبه‌رداری خه‌بات و مافێن گه‌لێ كوردستانێ نه‌بووینه و نابن. ئه‌ڤه ئه‌ون یێن به‌ری سه‌د و دهـ سالان داخوازێن نه‌ته‌وایه‌تی ژ سولتانێ ئوسمانی كرین و گه‌رده‌نێن وان خلفا سێدارێ ماچیكرین، ئه‌ڤه ئه‌ون یێن شیاین بارزان بكه‌نه ناڤه‌ندا كوردینیێ و چاكسازیێ و دادپه‌روه‌ریێ و مافێن مرۆڤی و پێكڤه‌ژیانێ و ژینگه‌پارێزیێ، ئه‌ڤه ئه‌ون یێن ده‌ستێ هاریكاریێ بۆ باكور و باشوور و رۆژهه‌لات و رۆژئاڤا درێژكری پشته‌ڤه‌نیا ئه‌رمه‌نی و ئاشوریا كرین، ئه‌ڤه ئه‌ون یێن سه‌را كوردینیێ شازده جاران گوند لێ سووتین و ده‌ربه‌ده‌ر كرین، ئه‌ڤه ئه‌ون یێن پرسێن ئاینی و ئولی و جڤاكی كرینه پرسا ملله‌تی و دوزا نه‌ته‌وه‌یی، ئه‌ڤه ئه‌ون یێن بزاڤێن كوردایه‌تێ ژ ناوچه‌گه‌ریێ ده‌ربازی وه‌لاتی كرین و ره‌هه‌ندێ نه‌ته‌وایه‌تی دایێ و ئارمانج زه‌لال كری، ئه‌ڤه ئه‌ون یێن شۆرش ل دویڤ شۆرشێ كرین و سه‌ركه‌فتن ئیناین و شكه‌ستن دیتین و ل سه‌ركه‌فتنا سه‌ردا نه‌چووین و ل شكه‌ستنا بێ هیڤی نه‌بووین، ئه‌ڤه ئه‌ون یێن ل هه‌می پارچه‌یێن كوردستانێ ب پیا گه‌راین و هشیاریا نه‌ته‌وه‌یی چێكری و توڤێ كوردایه‌تیێ چاندین، ئه‌ڤه ئه‌ون یێن خه‌باتا سیاسی و دیبلوماسی پێكڤه برێڤه‌برین و كوردستان ل جیهانێ داینه نیاسین و دوست بۆ چێكرین، ئه‌ڤه ئه‌ون یێن دوو شۆرشێن چه‌كدار ل بارزان كرین، و ل رۆژهه‌لاتێ پشكداری دئاڤاكرن و پاراستنا كوردستانێدا كری، ئه‌ڤه ئه‌ون یێ خوه نه چه‌ماندی و به‌ر ب یه‌كێتیا سۆڤیه‌تی ڤه چووین و شه‌ڕێ سێ ده‌وله‌تان كرین و ئاراس بری و ده‌رگه‌هێ كریملنێ قوتایی و سه‌رۆكێ ده‌وله‌تێ دیتی، ئه‌ڤه ئه‌ون یێن رێكخستنا سیاسی چێكری و هێزێن پێشمه‌رگه‌ی پێكئینای و ملله‌ت فێری شۆرشگێریێ كری، ئه‌ڤه ئه‌ون یێن هه‌ڤگرتن پێكئینای و لاده‌ر و خوه‌فرۆش شه‌رمزاركرین و رێباز زه‌لالكری، ئه‌ڤه ئه‌ون یێن شۆرشا ئه‌یلولا نشتیمانی كری و كوردستان رزگاركری، ئه‌ڤه ئه‌ون یێن رژیمێن حكمدار نه‌چاركرین دانوستاندنا بكه‌ن و رێكه‌فتناما یازده‌ی ئادارێ موهركه‌ن و دانپێدانێ بمافێن نه‌ته‌وه‌یێن گه‌لێ كوردستانێ بده‌ن، ئه‌ڤه ئه‌ون یێن خوه ل به‌ر پیلانێن ناڤخوه‌یی و ده‌ره‌كی گرتین و رێكه‌فتنا جه‌زائیری ژناڤبری و شۆرشا گولانا پێشكه‌فتنخواز كری، ئه‌ڤه ئه‌ون یێن داستانێن زۆزك و هندرینا و كانیماسێ و دێره‌لوكێ و خواكوركی كرین وخوه لبه‌ر كیمیاباران و ئه‌نفالان گرتی، ئه‌ڤه ئه‌ون یێن ئاشبوونا نیشتیمانی كرین و به‌ره‌یا كوردستانێ پێكئینای و نه‌خشه‌یێ سه‌رهه‌لدانێ دانای و سه‌رهه‌لدان كری، ئه‌ڤه ئه‌ون یێن ئوتونومی بده‌ستڤه‌ئینای و فیدرالیه‌ت راگه‌هاندی و ریفراندوما سه‌ربه‌خویا كوردستانێ بجهئینای، ئه‌ڤه ئه‌ون یێ هه‌رێم دامه‌زراندی و هه‌لبژاردن كرین و په‌رله‌مان و حكومه‌ت داناین و ئاسایش و سه‌قامگیری بنه‌جهكرین، ئه‌ڤه ئه‌ون یێن هه‌رێم جێگیركری و پاراستی و گه‌شه‌یی پێكری، ئه‌ڤه ئه‌ون یێن شه‌رێن ناڤخوه‌ه‌یی نه‌هێلاین و شرعیه‌ت پاراستی و دژمن دیركرین، ئه‌ڤه ئه‌ون یێ دكتاتوریه‌ت هه‌ڕفاندی و ئیراق كریه كۆماره‌كا دیموكراتیا فیدرالیا ده‌ستووری و مافێن هه‌رێمێ جێگیركرین، ئه‌ڤه ئه‌ون یێ نه‌هێلای هه‌رێم بكه‌ڤیت و ئیرادا كوردستانێ لاوازبیت و چاره‌نووسێ وێ شێلی ببیت، ئه‌ڤه ئه‌ون یێن دشێن گوتنا بكه‌نه كریار و چاكسازیان بكه‌ن و كێم وكاسیا ژناڤببه‌ن، ئه‌ڤه ئه‌ون یێن بووین داكو خۆدانێن بریارێ بن و وه‌لاتی رزگاربكه‌ن و ملله‌تی ئازادبكه‌ن و خه‌لكی ژقه‌یرانان قورتال بكه‌ن و سه‌رفرازبكه‌ن.
هه‌لبه‌ت دژمن و نه‌یارێن كوردستانێ دێ دژمناتیا هه‌لگرێن په‌یاما رزگاركرنا كوردستانێ كه‌ن و ب هه‌می رێكا و ئامیرا دێ ئاسته‌نگا بۆ چێكه‌ن و گه‌فا لێكه‌ن و مه‌ترسیا بۆ چێكه‌ن.
یا دیاره دژمن و داگیركه‌ر ناهێلن كوردستان ب مافێن خوه شادببن و ل چ پارچه‌یێن داگیركری قه‌واره‌یه‌كێ سیاسیێ خومالی لێچێبیت، له‌وان ب هه‌می رێكان دژمناتیا هه‌رێما كوردستانێ دكه‌ن، دژمناتیا راسته‌وخۆ، ب رێكه‌فتنێن هه‌رێمایه‌تی و برێكا نوكه‌رێن خوه ، ب گڤاشتنێن سیاسی، ئابۆری و ئاسایشێ دكه‌ن، و نهو ژی برێكا بریارین یاسایی و زێده‌رویێن ده‌ستووری، ب مه‌به‌ستا لاوازكرنا هه‌رێمێ و بێده‌ستهه‌لاتكرنا دامه‌زراوێن وێ كاردكه‌ن
دێ بێژین ئه‌وا ده‌ستهه‌لاتدارێن ڤان ده‌وله‌تان دكه‌ت، دژمناتیه‌كا مێژوویه، ژ نه‌تێگه‌هشتنا وانه بۆ به‌ها و مافێن مرۆڤی و یێن ملله‌تان و گه‌له‌كا ب زیان و ئێش و نه‌خوشه، لێ یا نه‌خوشتر و ب ئێشتر ل ڤی سه‌رده‌مێ هشیاربوونه‌ڤێ و زه‌لالیێ هشتا ژ توخمێ مرۆڤی هه‌بن ده‌ستكیسی و نوكه‌راتیا بیانیا و دژمنان بكه‌ن بۆ بجهئینانا ئارمانجین وان.
ئه‌ڤ پرسه به‌رپسیاریه‌كا ته‌ڤایه، ملله‌ت و هێزێن سیاسی و بژارده‌یێن وێ یێن جڤاكی و ئابۆری و ره‌وشه‌نبیرییه، ژ هه‌میان دهێت خواستن د چارچووڤێ كارنامه‌كا نه‌ته‌وه‌یی و نیشتیمانیدا ب هه‌ڤرا كاربكه‌ن بۆ به‌رسینگرتنا وان گڤاشتن و گه‌ف و مه‌ترسیان و سڤككرنا بارێ خه‌لكی و باشكرنا ره‌وشا وی.
هه‌ر چاوا بیت ژیان ململانه‌كا به‌رده‌وامه، و یێ سه‌رفرازی بڤێت دێ وه‌ستیێت و قوربانیێ ده‌ت، و دڤی بیاڤیدا، ملله‌تی و رێبوارێن ڤێ رێبازێ خۆ گه‌له‌ك وه‌ستاندیه و گه‌له‌ك قوربانی داینه تا رێره‌وا شۆرشێ ل سه‌ر رێبازا وێ یا راسته‌قینه دانای و پێشڤه‌بری.
ژبه‌ر هندێ ب باوه‌ری ڤه دبێژین ئه‌ڤ رێبازا پر سه‌ربۆڕ و كار و خه‌بات و قوربانیدان یا خۆڕاگره و ژ هه‌می پیلانێن دژمنان ب هێزتره و یا به‌رده‌وامه، و دێ مینیت و گه‌شه‌یێ كه‌ت، و بهیڤینه دێ ملله‌تی ژڤان قه‌یرانان ده‌ربازدكه‌ت و وه‌لاتێ ئازادكه‌ت و ملله‌تی سه‌رفراز كه‌ت و خه‌لكی به‌خته‌وه‌ركه‌ت.
