رۆلێ پێشمەرگەی و هێزێن ئیراقێ د شكاندنا داعشێ دا بلند هەلدسەنگینین
ل رۆژا چارشەمبی، 10/6/2026، عەلی فالح ئەلزەیدی، سەرۆك وەزیرێن ئیراقێ، د سالڤەگەرا داگیركرنا باژێرێ مووسلێ دا ژ ئالیێ چەكدارێن داعشێ ڤە، پەیامەك بەلاڤ كر.
سەرۆك وەزیرێن ئیراقێ ئاماژە ب وێ چەندێ كر، 10/6/2014 ئێك ژ وەستگەهێن هەرە ب ئازار یێن دیرۆكا نوو یا ئیراقێ یە، چونكو د وێ رۆژێ دا چەكدارێن داعشێ باژێرێ مووسلێ داگیر كر. ڤێ كاری پشكەك ژ پیلانەكا تاوانكارانە دژی ئێكگرتن و سەروەرییا گەلێ ئیراقێ پێك دئینت، و بزاڤەك بوو بۆ تێكدانا پێكهاتەیێ نیشتمانی یێ وەلاتی.
ئەلزەیدی دیار كر، چەكدارێن داعشێ دڕندەترین تاوان دژی خەلكی ئەنجام دان، باژێڕ و گوند وێران كرن و خوونا خەلكێ بێتاوان رشتن. هەروەسا ئاماژە ب وێ چەندێ كر، ئیراق تووشی مەترسیدارترین ئاستەنگێن دیرۆكی بوو، لێ جارەكا دی سەلماند كو وەلاتەكێ وەسایە چو جاران ناهێتە شكاندن.
د پشكەكا دی یا پەیاما سەرۆك وەزیرێن ئیراقێ دا هاتییە، ب دەنگڤەدانا فەتوایا مەرجەعییا بلند یا ئایینی و ئێكگرتنا خەلكی، مل ب ملێ قەهرەمانییا هێزێن چەكدار، دەزگەهێن ئەمنی، حەشدا شەعبی و پێشمەرگەی ب پشتەڤانییا دۆستان، بوو ئەگەرێ نڤیسینا داستانەكا نیشتمانی و شكاندنا تیرۆرێ.
ئەلزەیدی ئەو ژی بەرچاڤكر، حوكمەت دێ بەردەوام بیت د چەسپاندنا ئاسایشێ، ئارامیێ، پاراستنا سەروەرییا ئیراقێ، هێلانا چەكی ب تنێ د دەستێ دەولەتێ دا و بەردەوامیدان ب پرۆسەیا ئاڤەدانكرنێ. ل دووماهیێ ژی سوپاسییا هەلوەستێ وان ئالیێن سیاسی كر یێن پشتەڤانییا پرۆسەیا ئارامیێ و ئاڤەدانكرنێ دكەن.
ل 10/6/2014، چەكدارێن رێكخستییا تیرۆرستییا داعشێ باژێرێ مووسلێ كۆنترۆل كر و پاشی پشكەكا مەزن ژ ئاخا ئیراقێ داگیر كر. د دەمێ دەستهەلاتا داعشێ دا هزاران كەس هاتنە كوشتن و ئاوارە بوون.
پشتی چەندین سالێن شەڕەكێ دژوار ب پشكدارییا هێزێن پێشمەرگەی، لەشكەرێ ئیراقێ و هەڤپەیمانییا نیڤدەولەتی، د سالا 2017ـێ دا ب دووماهی هاتنا داعشێ و رزگاركرنا تەماما ئاخا ئیراقێ هاتە راگەهاندن.
ئەو قۆناغە ئێك ژ دژوارترین سەردەمێن دیرۆكا ئیراقێ بوو و وێرانكارییەكا مەزن ل ناڤچەیێن جودا جودا ب جهـ هێلا.
