ئۆتێلێن پێنج ستێر دشێن ل رەمەزانێ خوارنگەهان ڤەكەن
ئەڤرۆ، سالار دۆسكی:
سەرۆكێ لقێ هەولێرێ یا كۆمەلا خوارنگه‌ه و ئۆتێلان دیاركر كو ل دووڤ بەرنامێ هەیڤا رەمەزانا پیرۆز هەر خوارنگەهەكێ یان كافترییەكێ ماف هەیە دەستووريێ وەربگریت بۆ ڤەكرنا خوارنگەها خوە پشتی بجهئینانا مەرجێن سازیێن پەیوەنديدار.
زیرەك ، سەرۆكێ لقێ هەولێرێ یا كۆمەلا خوارنگه‌ه و ئۆتێلان بۆ ئەڤرۆنيوز گۆت: گەلەك خوارنگەهان داخازكرینە بۆ هەیڤا رەمەزانا پیرۆز دڤەكری بن، ب تنێ مەرجێ مە ئەوە ل رۆژێن جەژنێ ژی دڤێت بۆ گەشتیاران خوارنگەهێن خوە ڤەكەن.
ئاشكراكر ژی كو نابیت خوارنگەه ب ئاشكرا دڤەكری بن و دڤێت رێز ل هەیڤا رەمەزانا پیرۆز بهێتە گرتن، ئوتێلێن پێنچ ستێر ماف هەیە خوارنگەهێن خوە ڤەكەن بۆ گەشتیاران.
زیرەكی گۆت ژی : هاتنا گەشتیاران گەلەك كێم بوویە هەتا گرۆپ ژی كێم بووینە، ئەڤە دمینيت ل سەر پەیوەندیێن هەرێمێ و بەغدا هه‌كه دباش بن، دێ گەشتیار زێدەبن، چونكى پتریا گەشتیارێن مە ژ ناڤەراست و باشوورێ عیراقێ سەره‌دانا هەرێمێ دكەن.
زیرەك گۆت ژی كو (580) ئۆتێل و مۆتێل و كافتریا ل پارێزگەها هەولێرێ يێن هه‌ين، هندەك خوارنگەه ل هەولێرێ هەنە دماوێ ئێك دەمژمێر دا دشین پێشوازیا دو هزار مرۆڤان بكەن.
