ئۆرۆپا بەر ب گوهۆڕینێن مەزن ڤە دچیت
بسپۆرەکێ پەیوەندیێن نێڤدەولەتی دیار دکەت کو سیستەمێ نها ل ئۆرۆپا د قەیرانێ دایە و خوەنیشادانێن دهێنە کرن ژی بۆ گوهۆڕینا سیستەمی نە، هەکە ئەڤسالە سیستەمێ گەلەک وەلاتان نەهێتە گوهۆڕین سالا بهێت هەلبژارتن هەنە و دێ گوهۆڕینێن مەزن روو دەن.
د. ئەکرەم ئۆنەن بسپۆرێ پەیوەندیێن نێڤدەولەتی بەحسێ خوەنیشادانێن ل فرەنسا و ئالۆزیێن ڤێ دووماهیێ کر و ئاماژە ب ڤێ یەکێ کر کو، سیستەمێ ئۆرۆپا د قەیرانێ دایە و دڤێت ئۆرۆپا خوە ژ سیستەمێ نیو لیبرال قورتال بکەت و گۆت: (بەلکو ژ بۆ گەلەک کەسان ئۆرۆپا جهەکێ گەلەک باش بۆ ژیانێ بیت، لێ خوەنیشادانێن نها ل فرەنسا کو دهێتە چاڤەرێکرن دەربازی گەلەک وەلاتێن دی ژی ببیت نیشا ددەت کو سیستەمێ ئێکەتیا ئۆرۆپا تووشی قەیرانەکا مەزن بوویە و رەوشا نها ژی نیشا ددەت کو ئۆرۆپا بەر ب گوهۆڕینێن مەزن ڤە دچیت).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، بەری نها زانایێ مەزن فرانسیسکو فۆکۆیاما د پەرتووکا خوە دا بەحسێ سیستەمێ تەک جەمسەری ل جیهانێ کربوو، لێ رەوشا نها نیشا ددەت کو جیهان بەر ب سیستەمەکێ نوو ڤە دچیت و ئەو ژی سیستەمێ پر جەمسەری یە و دبیت گوهۆڕینێن نها ل ئۆرۆپا کاریگەریا خوە ل هەموو جیهانێ ژی بکەن و گۆت: (خەلک ژ دەستهەلاتێن نها ل ئۆرۆپا رازی نینن، هەکە دەستهەلاتێن نها ب رێیا خوەنیشادانێن ژی نەهێنە گوهۆڕین سالا بهێت ل گەلەک وەلاتێن ئێکەتیا ئۆرۆپا هەلبژارتن هەنە و پارتی و هەڤپەیمانیێن نها ل سەر دەستهەلاتێ د هەلبژارتنێن سالا بهێت دا نەشێن زێدەتر ژ ١٥% دەنگان ژی بدەستڤە بینن و دێ وەسا ژ دەستهەلاتێ چن و بێگومان دێ هەلبژارتنێن سالا بهێت ل ئۆرۆپا بنە ئەگەرێ گوهۆڕینێن گەلەک مەزن، ئانکۆ سالا ٢٠٢٧ دێ بۆ هەموو وەلاتێن ئێکەتیا ئۆرۆپا سالەکا چارەنڤیسساز بیت).
ناڤهاتی ئەو یەک ژی دیار کر، سیستەمێ چەندین سالێن بۆری ل ئۆرۆپا ئاریشە بۆ وان وەلاتان ژی دروست کرینە، نها رۆسیا و ئەمریکا چو حسابەکێ بۆ ئۆرۆپییان ناکەن و بریارە ناڤەراستا مەها بهێت ل چینێ کۆمبوونەکا گەلەک مەزن و گرنگ سەبارەت ب پرسێن نها ل جیهانێ بهێتە ساز کرن و بێگومان سەرۆکێن هەر سێ وەلاتێن ئەمریکا، چین و رۆسیا دێ بریارێ ل دۆر جیهانێ دەن، وەلاتێن ئێکەتیا ئۆرۆپا گەلەک توورە نە و دبێژن چاوا دبیت دەمێ بریارێن وەسا چارەنڤیسساز دهێنە دان کەس چو حسابان بۆ مە ناکەت، ئەو یەک ژی نیشا ددەت کو وەلاتێن ئێکەتیا ئۆرۆپا هەست دکەن د سیستەمێ نها یێ جیهانی دا پێدڤیا وان ژی ب گوهۆڕینان هەیە دا ئەو بشێن ل گۆر راستیا نها ل جیهانێ کار بکەن و گۆت: (دیرۆکێ ژی سەلماندیە کو کەس نەشێت رێگریێ ل گوهۆڕینان بکەت، ئێکەتیا ئۆرۆپا ژی بەر ب گوهۆڕینان ڤە دچیت و ئەڤسالە هەتا دووماهیا سالا بهێت دێ گوهۆڕینێن گەلەک مەزن ل ئێکەتیا ئۆرۆپا دروست بن، هەر کەس ژی دزانیت دەمێ گوهۆڕین ل ئۆرۆپا دروست بیت دێ کاریگەریا خوە ل سەر هەموو جیهانێ هەبیت و نها هەموو وەلاتێن جیهانێ ب هەستیاری دووڤچوونا گوهۆڕینێن ل ئۆرۆپا دکەن).
د. ئەکرەم ئۆنەن ئاماژە ب ڤێ یەکێ ژی کر کو، خوەنیشادانێن نها ل فرەنسا تنێ ژ بەر بابەتێ ئابووری نینە، سیستەمێ گەلەک وەلاتێن ئێکەتیا ئۆرۆپا ل سەر بنەمایێ سیستەمێ نیو لیبرالی هاتبوو دروست کرن و وان گرنگی ب پرسێن نەتەوەیی نەددان، لێ خەلکێ ئۆرۆپا نها خوەدان ل بهایێن خوە یێن نەتەوەیی دەردکەڤن و سیستەمێن هەی قەبوول ناکەن، دەمەکە ژی ل گەلەک وەلاتێن ئێکەتیا ئۆرۆپا پارتێن کو ل سەر بنەمایێن نەتەوەیی کار دکەن شیاینە پێگەهێ خوە بهێز بکەن و گۆت: (پێدڤیا ئۆرۆپا ب سەرۆکێن نیشتمان پەروەر و کاریزما و خوەدان دەستهەلات هەیە دا بشێن خوەدان ل بهایین خوە دەرکەڤن و ئالۆزیێن هەی ژی چارەسەر بکەن).
