ئیراق و هەرێما كوردستانێ لیژنەیەكا هەڤپشك بۆ دانوستاندنان ل گەل توركیایێ ل سەر هنارتنا پەترۆلێ پێكدئینن
وەزارەتا پەترۆلا ئیراقێ راگەهاند كو لیژنەیەكا بلند یا هەڤپشك پێكئینایە بۆ دانوستاندنان ل گەل توركیا، دەربارەی ئیمزاكرنا رێككەفتنەكا نوو یا پەترۆلێ. ژ گرنگترین تایبەتمەندیێن ڤێ لیژنەیێ، پشكدارییا راستەوخۆ یا نوونەرێن حوكمەتا هەرێما كوردستانێ یە ل گەل نوونەرێن وەزارەتێن پەترۆل، دەرڤە و دارایی یێن ئیراقێ دا.
سەلیم ریكابی، پەیڤدارێ فەرمی یێ وەزارەتا پەترۆلا ئیراقێ بۆ مالپەرێ (بەغداد ئەلیوم) راگەهاند «حوكمەتا ئیراقێ لیژنەیەكا بلند پێكئینایە كو نوونەرێن حوكمەتا هەرێما كوردستانێ ژی تێدا نە، ئەڤ لیژنەیە ئەركێ برێڤەبرنا دانوستاندنان ل گەل ئالیێ توركی پێ هاتیە سپاردن بۆ دارشتنا رێككەفتنەكا نوو یا هنارتنا پەترۆلا خاڤ كو جهێ رێككەفتنا كەڤن بگریت».
ریكابی ئاماژە ب وێ چەندێ ژی كر كو لیژنە پشكدارییا كارا یا ئالیێن پەیوەندیدار ب خۆ ڤە دگریت، ئەڤە ژی بۆ گەهشتن ب تێگەهشتنەكا رۆهن كو بەردەوامبوونا پرۆسەیا هنارتنا پەترۆلێ ب رێیا بۆرییا ئیراق-توركیا مسۆگەر بكەت و ئارامییا هنارتنێ بۆ بازارێن جیهانی بپارێزیت.
پەیڤدارێ وەزارەتا پەترۆلێ دووپات كر كو نێزیكبوونا ژڤانێ ب دوماهیهاتنا رێككەفتنا نوكە وەكریە كو بزاڤ بۆ بلەزكرنا دانوستاندنان زێدەتر لێ بهێن، ب وی رەنگی كو نوونەراتییا هەڤپشك د ناڤبەرا بەغدایێ و هەولێرێ دا دشێت چارەسەرییا پێدڤی بۆ بەردەوامی و زێدەكرنا ئاستێ هنارتنێ ببینیت، ب تایبەت كو ئیراقێ پلان هەیە ئاستێ هنارتنێ ب رێیا بەندەرێ جەیهان بۆ پتر ژ 350 هەتا 400 هزار بەرمیلان د رۆژەكێ دا بلند بكەت.
