ئیرانێ كاندیدێ خوە بۆ سه‌رۆك وه‌زیرێن نوو یێ عیراقێ راگەهاند
ئەڤرۆ نیوز ، زنار تۆڤی:
رۆژنامه‌کا سعودی ئاشكرا كریە، کو بالیۆزێ ئیرانێ ل به‌غدا ئیره‌ج مه‌سجیدی داخواز ژ نوری مالكی سه‌رۆكێ هەڤپه‌یمانیا ده‌ولە‌تا قانوونێ كریە، کو مەزنترین فراكسیۆنا په‌رله‌مانی رابگەهینن و هادی عامری سكرتێرێ گشتی یێ رێكخراوا به‌در بۆ سه‌رۆك وه‌زیرێن داهاتی یێ عیراقێ كاندید بكەن.
رۆژناما عوكاز یا سعودی د راپۆرتەكێدا دیارکریه، کو ئیره‌ج مه‌سجیدی دوماهی هه‌لویستێ تەهرانێ دەر‌باره‌ی پێكئینانا حوکمه‌تا داهاتی یا عیراقێ گەهاندیە مالكی و داخواز ژێكریه كو هادی عامری وه‌ك تاكه كاندیدێ سه‌رۆك وه‌زیرێن نوو یێ عیراقێ ده‌ستنیشان بكەت و لەزێ بكەت د پێكئینانا مەزنترین فراكسیۆن دناڤ په‌رله‌مانێ عیراقێ دا، هەمبەری جێبه‌جێكرنا ڤێ داخوازیا ئیرانێ کو عامری بیتە سه‌رۆك وه‌زیر، تەهرانێ سۆزا پێدانا پۆستێ وه‌زیرێ ده‌رڤه یان نافخۆیی یێ عیراقێ دایە نوری مالكی.
هەروەسا ئیره‌ج مه‌سجیدی دووپات كریه كو دوماهی په‌یاما سیستانی هه‌لكرنا گلۆپا کەسکە بۆ هندێ کو هادی عامری ببیته سه‌رۆك وه‌زیرێن حوکمه‌تا نوو یا عیراقێ، هەڤدەم بالیۆزێ تەهرانێ ل به‌غدا ناڤێ چه‌ندین كاندیدان بۆ سه‌رۆک كۆماریێ و سه‌رۆكێ په‌رله‌مانی دایه مالكی، كو ئیرانێ رەزامەندیا خوە ل سەر دایە.
هه‌لبژارتنێن خولا پێنجێ یا پەرلەمانێ عێراق ل 12 گۆلانێ هاتنە ئه‌نجام دان، هه‌رچه‌نده هەتا نوکە ئه‌نجامێن هەلبژارتنان ژ لایێ دادگەها فیدرالی نەهاتینە په‌سه‌ندکرن و هژمارتنا ب ده‌ست یا ده‌نگان یا به‌رده‌وامه، به‌لێ دانوستاندن دناڤبەرا لیستێن سەرکەفتی به‌رده‌وامی هه‌یه و هەتا نوکە چوو لایه‌نەک نه‌گه‌هشتینه رێككه‌فتنێن دووماهیێ.
وەکو دیار پێكئینانا حوکمه‌تا عیراقێ ب بۆچوونا سیاسی و هەموو لایه‌نێن عێراقی یا دوور نینه ژ كاریگه‌ریێن ده‌ره‌كی و هه‌موو دووپاتیێ ل هندێ دکەن، کو تەهران و واشنتۆن دێ بریارێ ل سه‌ر پێكئینانا حوکمه‌تێ و دیاركرنا كه‌ساتیان بۆ پۆستێن هه‌ستیار و گرنگ ده‌ن.