ئیرانێ ژبەر هەرێما کوردستانێ خەونا خوە یا سەد سالان گوهۆری
ئەڤرۆ نیۆز،زنار تۆڤی:
رۆژناما زە گاردیانا بریتانی ئاشكرا دکەت كو نوکە ئێرانێ ستراتیژیەكا نوو هەیە بۆ كەنارێن دەریا ناڤەراستا سپی، هەروەها كومەکا فاكتەران ئێران نەچاركریە کو ئاراستەیا خەونا خوە یا مێژوویی كو بۆ تێپەربوونێ ب هەرێما كوردستانا عێراقێ و كوردستانا رۆژئاڤا هەتاکو كەنارێن دەریا سپی یا ناڤەراست ب گوهۆریت بۆ ئاراستەیا جۆگرافیا سوونەیان كو ل ژێر ركێفا دەولەتا ئیسلامی یا داعشێ نە و نوکە میلیشیاتێن حەشدا شەعبی و حزبولا یا لوبنانی ل جەنگێ رزگاركرنێ دانە.
هەروەسا دیارکریە،دەمێ کو ئێران بێ هیڤی بووی ژ هەردو هەرێمێن كوردی ل سوریا و عێراقێ،كو هەردو پایەندی هەڤپەیمانێن رۆژئاڤانە و وان پالپشتیی بۆ هەردو هەرێمێن كوردان کریە و هەماهەنگیەکا باش ل گەل هەیە،هەروەسا پرچەككرنا وان بهێزترین رێگری و ستراتیژیەت و پلان بوو كو ئێرانێ و رژێما مەزهەبیا وێ خەون پێڤە ددیت.
پشتی كومبوونا حەفتیا بوری یا قاسم سولەیمانی و ھادی عامری بریارا گوهۆرینێ ل ستراتیژیەتا وان كەفتە وارێ پراكتیکی و ھێزێن حەشدا شەعبی ب ھەڤكاریا تۆپخانە و راوێژکارێن سەربازی یێن سۆپایێ پاسداران كەفتنە جولاندنێ بۆ كۆنترولکرنا دەڤەرێن باكۆرێ مۆسلێ و تەمامکرنا پلانا دویێ كو ھێلا زەمینی یە بۆ باژارێن شەرگات و تەلەعفەر و حمسێ یە ب ئاراستەیا دیمەشقێ و ل وێرێ ژی بۆ بەندەرێ تەرتووس.
پلانا ھێرشێ و رزگاركردنا باژێرێ بەعاج و لێكدانا سنوورێ سوریا و عێراقێ و گەهشتن بۆ باژێرێ دێرەزۆرێ كو ئارمانج ژێ ب ئێكگەهشتنا ھێزێن سۆپایێ پاسداران و حەشدا شەعبی و حزبولا یا لوبنانی یە،کو ئەڤە ل سوریا و عێراقێ پێنگاڤا ئێکێ یە،هەروەسا ئارمانجا وان یا سەرەکی بۆ ڤێ پلانێ لەزکرنە ل ئەنجامدانا پێنگاڤا دویێ و دروستكرنا دەڤەرەکا دیفاكتوو یا جۆگرافی و سیاسی و سەربازییە كو وان دڤێت بەری گەهشتنا ھێزێن ھەڤپەیمانیا نێڤدەولەتی ل دەڤەرێن ناڤەراستا سووریا ئامادەیا خوە نیشان بدەن،ئەو ڤێ چەندێ بکەنە فشارەکا نێڤدەولەتی و سیاسی ب سەر جڤاکێ نێڤدەولەتی دا و ھەر گوهۆرینەکا دیتر كو ل ڤێ دەڤەرێ دا روو بدەت.
