ئیسرائیل و سعوودیە ل دژی ئیرانێ رێککەڤتینە
ئەڤرۆ:
ل گۆر راپۆرتەکا ئاژانسا راشا تودەی رێککەڤتنا نھینی د ناڤبەرا بەرپرسێن ئیسرائیلێ و سعوودیێ ھاتیە کرن و ل گۆر وێ رێککەڤتنێ سعوودیە رازی بوویە کو ھەر دەمێ کو پێدڤی بیت ئەو رێ بدەتە ئیسرائیلێ ب رێیا ئاسمانی ھێرشی ئیرانێ بکەن و ل ھەمبەر ڤێ یەکێ ژی بەرپرسێن ئیسرائیلێ سۆز داینە سعوودیێ کو دێ پەیوەندیێن خوە ل گەل وان باشتر ژ جاران بکەن و دێ سەبارەت ب چارەکرنا پرسا فەلەستینێ ژی ھندەک پێنگاڤێن باش ب ھاڤێژن.
د بەردەوامیا راپۆرتێ دا ھاتیە کو سعوودیە رازی بوویە سوتەمەنی و بنگەھێن فرۆکێن شەری بۆ ئیسرائیلێ دابین بکەت کو د دەمێ پێدڤی دا ئەو بشێن ھێرشی ئیرانێ بکەن، چونکو شاھێ نوو یێ سعوودیێ گەلەک ل ھەمبەر ئیرانێ توندە و چەندین جاران د ھەڤدیتنێن ل گەل بەرپرسێن ئورۆپی و ئەمریکی ژی ب ئاشکرایی دیار کریە کو ئەو سەبارەت ب سزادانا ئیرانێ دێ ھاریکاریا ھەر وەلاتەکێ بکەت و دێ بۆ لاوازکرنا ئیرانێ ب ھەموو رەنگەکێ ھاریکاریا ئیسرائیلێ ژی بکەت.
د دووماھیا راپۆرتێ دا ھاتیە دیار کرن کو پەیوەندیێن ئیسرائیلێ ل گەل ئەمریکا نھا گەلەک خرابن و بەرپرسێن ئیسرائیل ل دژی دانوستاندنێن ئەمریکا ل گەل ئیرانێ یە و ژ بەر ھندێ ژی رێککەڤتنا وان ل گەل سعوودیێ دێ کارتەکا فشارێ ژی بیت ل دژی سیاسەتا ئەمریکا.
