ئینانا مریشک و ھێکان ژ تورکیا ھاتە قەدەغە کرن
ئەڤرۆ:
وەزارەتا چاندن و ژێدەرێن ئاڤێ ل ھەرێما کوردستانێ بریار دا کو ئینانا گوشتێ مریشک و ھێک و بەرھەمێ مریشکان ھەر ژ دوھی 10ى گۆلانا 2015ێ ژ تورکیا بھێتە قەدەغە کرن.
وەزیرێ چاندن و ژێدەرێن ئاڤێ عەبدولستار مەجید د داخۆیانیەکێ دا کو خەندان بەلاڤ کری ئاشکرا کریە کو بریار ھاتیە دان ھەموو جۆرێن گوشت و بەرھەمێ پەلەوەران ژ وەلاتێ تورکیا بۆ ھەرێما کوردستانێ بھێتە قەدەغە کرن، ل دۆر ھوکارێ قەدەغە کرنێ ژی دیارکریە کو ل تورکیا حالەتێن پەیدابوونا نەخۆشیا ئەنفلوەنزا بالندان H5N1 ل دووڤ راپۆرتا ساخلەمیا ئاژەلی یا جیھانی OIE ھاتینە تۆمار کرن.
عەبدولستار مەجید ئەو ژی دیارکریە کو بجھئینانا ڤێ بریارێ دێ یا بەردەوام بیت ھەتا کو رێکخراوا ساخلەمیا ئاژەلی یا جیھانی ب فەرمی ئاگەھداریا وان بکەت کو ئەڤ نەخۆشیە ب دووماھی ھاتیە.
