ئیکۆنۆمیست: ڤالاتیا د ناڤ دەستھەلاتا عەرەبی دا ئەگەرێ پەیدابوونا داعشە
سەرەرای دربێن ئەسمانی ئۆباما شەڕی بۆ ژناڤبرنا داعش ناکەت و دڤێت عەرەبێن سونی ڤی کاری بکەن
رۆژناما (ئێکۆنۆمیست) یا بریتانی د راپۆرتەکا شلۆڤەکاری دا بەحس ل چاوانیا بەرفرەھبوونا داعش دکەت و کا چاوان شیا بۆ خوە دەلیڤان پەیدا بکەت و رێژا خوە ل سووریێ و عیراقێ زێدە بکەت.
ئیکۆنۆمیست دیار دکەت کو د دەمەکی دا کو پتریا موسلمانان (داعش) ب رێکخراوەکا توندڕەو د دەنە ھژمارتن، چاوان گەشێ دکەت و رێژا چەکدارێن خوە ل سووریێ ب تنێ گەھاندینە شەش ھزار کەسان ب گۆرەی ھندەک ئاماران و ھندەک بیرێن پەترۆلێ د دەستێ وان دانە و ل گەل ھژمارەکا چەکی ب تایبەت یێ ئەمریکی کو ل ڤێ دووماھیێ ل عیراقێ ب دەستکەفتی.
خوەیا ژی دکەت کو سەرەرای وێ چەندێ کو ئەمریکا چەندین دربێن ئەسمانی ل چەندین دەڤەرێن چیایێ شنگالێ و سکرێ مووسل وەشاندنە داعش، بەلێ ئۆبامایێ سەرۆک کۆمارێ ئەمریکا دیارکر کو ئەو شەڕی بۆ ژناڤبرنا داعش ناکەن، دڤێت عەرەبێن سونی ب خوە ڤی کاری بکەن.
ڤێ رۆژنامێ ئاشکەرا کریە کو رەفتارا رێکخراوێن جیھادی ل گەل حوکمەتان یا خرابە و ژ بەر حەزێن خوە یێن زێدە ژی وەکو ئاڤاکرنا دەولەتێ، گرێدانا وەلاتیێن سڤیل ژی ب خوە ڤە ژ دەست ددەن، بەلێ بلندبوونا ئایدۆلۆژیا ئیسلامی و ھەبوونا ڤالاتیێن زێدە د ناڤ جیھانا عەرەبی دا، رێ ددەتە ڤان رەنگە گرۆپان چو نەبیت ببنە ئەگەرێ نەرەحەتیێ بۆ ئەوان ھەر وەکو رێکخستیا قاعیدە ل یەمەن و دورگەیا عەرەبی و جیھادیێن مالی.
دایە زانین ژی کو بەرپرسێن رۆژئاڤایی ژی رێکخستیا دەولەتا ئیسلامی ل عیراق و شامێ (داعش) ب ئێک ژ مەترسیدارترین گرۆپێ تیرۆرستی ل سەر ئاستێ جیھانێ ددەنە نیاسین ژ پشتی روودانێن ١١\٩ ل وەلاتێ ئەمریکا.
ئیکۆنۆمیست ناڤەشێریت ژی کو شەرێ سووریێ چو دووماھیێن ئاشکەرا نینن، ئەڤە ژی رەنگە تێکئالۆزیەکێ ل عیراقێ پەیدا دکەت، دبیت د باشترین سیناریۆ ژی دا بھێتە گۆتن کو ئەڤ رێکخراوە د نەڤیێن نوو ژی دا یا کارا بیت و ل ڤی دەمی کێشە نە ب تنێ ل سووریێ و عیراقێ و وەلاتێن ھەڤسۆ دا دێ ھەبیت، بەلکو ھەبوونا وێ رێژا زێدە یا وەلاتیێن بیانی د ناڤ ڤێ رێکخستیێ دا، دەما د ڤەگەرنە وەلاتێن خوە و چەک ھەلگرێن توندڕەو ل گەلەک وەلاتان دێ مەترسیێ پەیدا کەن.
ئا: نیوار محەمەد سەلیم:
