ئێدی پانزینا حكومـی ب رێیا كۆبوونان دێ هێتە بەلاڤكرن
دهۆك، دلۆڤان ئاكرەیی:
ئێك ژ بەرپرسێن پشكنین و دووڤچوونێ ل ڕێڤەبەریا نەفت و كانزایان ل هەرێمێ دیاركر، هەمی ئامادەكاری بۆ بەلاڤكرنا پانزینێ ب سیستەمێ كۆبوونان ب دوماهی هاتینە و د پاشەڕۆژەكا نێزیك دا وەلاتی دێ شێن ب ڕێیا كۆبوونان پانزینا حكومی وەربگرن.
سالار مەحەمەد، بەرپرس ل پشكنین و دووڤچوونێ ل ڕێڤەبەریا نەفت و كانزایان ل هەرێمێ بۆ رۆژنامەیا ئەڤرۆ گۆت: «بڕیارە حوكمەتا ئیراقێ ڕۆژانە 50 هزار بەرمیلێن نەفتێ بۆ هەرێما كوردستانێ بهنێریت، 36% ژ وێ بڕێ بۆ پانزینێ دێ هێتە پارزنین و ل سەر پارێزگەهان هێتە بەلاڤكرن، ب گەهشتنا ڤێ پشكێ بۆ پارێزگەهان دێ هەتا رادەیەكی كێشەیا كێمی و گرانیا پانزینێ ل هەرێمێ چارەسەر بیت».
گۆت ژی: «د نوكە دا ئاستەنگ ل پێشیا بارهەلگران بۆ ئینانا پانزینێ هاتینە راكرن، پانزینا حكومی ژی ل پانزینخانەیان زێدە بوویە، ئەڤ چەندە ژی دێ كارتێكرنێ ل بهایێ پانزینێ كەت و ل رۆژێن بهێن دێ بهایێ وێ ئەرزان بیت».
