ئێک ئارمانج ھەیە سێ یانێن دھۆکێ د یاریێن ڤێ حەفتیێ دا
ئەڤرۆ،ھەژار مەعروف:
چاڤەرێ دھێـتەکرن ئەڤرۆ و سوباھی شەش یاری ژ خولا پێشمەرگەی کوردستانێ بھێنەکرن ژ چارچوڤێ یاریێن گەرا شەشێ کو سێ یانێن پارێزگەھێ ڤی حەفتیێ دێ یاریێن خوە کەن و ئێک دێ یا چاڤەرێکری بیت ھەردو یانێن گارە و زاخۆ دێ ژ دەرڤەی یاریگەھا خوە یاریێن خوە کەت و دھۆک دێ ل یاریگەھا خوە کەت.
د یاریێن ئەڤرۆ یێن رۆژا پێنج شەمبی ژ کوما دوێ یانا گارە ئەوا ھەتانوکە نەشیێ سەرکەفتنێ توماربکەت دێ یاریا خوە بەرامبەر ھندرین کەت کو تیما گارە بۆ ڤێ یاریێ ھەمی بزاڤا کەت ھەر چو نەبیت ب خالەکێ ڤەگەریت ژبەرکو ئەو باش دزانیت کرنا یاریێ بەرامبەر یانا ھندرین ل یاریگەھا وێ دێ گەلەک یا ب زحمەت بیت ل دۆر ڤێ یاریێ ھەوار محەمەد یاریزانێ یانا گارە بۆ رۆژناما ئەڤرۆ دیارکر بۆ یاریا ئەڤرۆ ئەوان چو کێماسی نین تیما ئەوان بەرھەڤە بۆ سەرکەفتنا ئێکێ ھەر چەندە ئەو باش زانن کرنا یاریێ بەرامبەر یانا ھندرین ل یاریگەھا وێ یا ب سانەھی نابیت لێ نوکە ئەو ژێ د رەوشەکا باش دانە ھیڤیا ئەوان یا سەرەکی ئەوە سێ خالێن یاریێ و بێ خوسارەتی ژ باژێرێ ھەولێر ڤەگەرن.
ژلایەکێ دیڤە ل یاریگەھا کەرکوک تیما تەپا پێ یا زاخۆ ئەوا ل حەفتیا بوری شیای سەرکەفتنا ئێکێ ب دەستخوڤە بینت دێ ئەڤرۆ بیتە مێڤانا یانا سەرکێشا کومێ تیما کەرکوک بۆ ڤێ یاریێ راھێنەرێ یانا زاخۆ محەمەد یوسف بەری یاریێ بۆ رۆژناما ئەڤرۆ گوت: یاریا مە یا ئەڤرۆ گەلەک یا ب زحمەتە ژبەرکو تیما کەرکوک ل وەرزێ ئەڤ سالە تیمەکا باش دروستکریە و ھەڤرکەکا ب ھێزە و ھەریسان بۆ یاریا ئەڤرۆ مە کێماسی ژێ ھەنە کو ئەو یاریزانێن یاریا بوری پشکدری ل گەل مەکری یێن تیما خولا عیراقێ نەشێن پشکداریێ بکەن بتنێ یاریزانەک نەبیت ئەوژێ مەحمود.
راھێنەرێ زاخۆ ئەو چەندە ژێ دیارکر دبیت ئەڤ یاریە بۆ ئەوان گەلەک یا گرنگە ژبەرکو سەرکەفتنا ئەوان دێ ھیڤێن ئەوان گەش کەت بۆ دەربازبوونێ ھەر چەندە ھێشتا مایە ئەو بەحس ل دەربازبوونێ کەن لێ ئەو باش زانیت سێ خالێن ڤێ یاریێ گەلەک گرنگترن ژ گەلەک یاریێن دێ چونکو کەرکوک ھەڤرکەکا ب ھێزە بۆ دەربازبوونێ .
د یاریەکا دی دا سیروان نوو دێ ل یاریگەھا خوە مێڤانداریا یانا ئارارات کەت کو ھەردو یانە خودانێن چار خالانە .
بریارە سوباھی بەردەوامی ب یاریێن گەرا شەشێ یێن خولا پێشمەرگەی کوردستانێ بھێنەکرن ل یاریگەھا خوە یانا دھۆک ئەوا ل چار بوری شیای سەرکەفتنەک وەکھەڤیەک ل گەل دو خوسارەتیا دەستخوڤە بینت دێ ئەڤرۆ یاریەکا گرنگ بەرامبەر گاز باکور کەت کو سەرکەفتی ڤێ یاریێ دێ رێیا خوە خوشتر کەت بۆ دەربازبوونا چار گوشا زێرین و ھەر ئەنجامەکێ دی ژبلی سەرکەفتنێ د بەرژوەندیا یانا دھۆک دا نینە دێ رەوشا وێ خرابتر لێ کەت بۆ دەربازبوونێ ھەردیسان مەترسیا پاشڤەزفرینی کەڤیتە سەر ژبەرکو یانا دھۆک بتنێ چار خال ھەنە یانێن ھەڤرک دێ ژێ دورکەڤن بۆ ھەکە د یاریێن سوباھی دا سەرکەفتن تومارکرن و دھۆک ئەنجامەکێ نە چاڤەرێکری ب دەستخوڤە ئینا .
ژلایەکێ دیڤە د یاریەکا بھێز دا ھەر سوباھی تیما نەوروز سەرکێشا کوما ئێکێ ب ١٢ خالان دێ ل یاریگەھا خوە مێڤاندریا یانا ھەولێر کەت خودانا رێزا دوێ ب شەش خالان و ل یاریگەھا خوە ل پیرمام پێشمەرگا ھەولێر دێ ل گەل یانا برایەتی کەت.
