ئەرشیفێ کۆدێن ژەنگار
ئیحسان حەسەن
ئەی بلنداهیا سار
تو ئەرشیفێ وان کۆدێن تاریی
یێن کو ئەندازیارێن سێبەرێ
ل سەر مێزێن بێدەنگیێ
نەخشێ سێدارەدانێ
بۆ خەونێن مە یێن تێهنی دکێشن
بەرێ خوە بدێ
کا چەوا ستەم وەك مەکینەیەکا سار
دگەل ددانێن بازرگانێن خوینێ
کاتژمێرا بێگونەهیێ د ناڤ سینگێ مە دا دهێرن
هوون ئەو ڤایرۆسێن بێدەنگن
د زنجیرا هێڤینێ ڤی نیشتیمانی دا دزڤڕین
هەوە دۆزا مە کرە بیردانکەکا مری
دا داتایێن بێ گیان
ل سەر شاشەیێن بەرژەوەندیێ بفرۆشن
ئەی ئاخا بریندار
مە کۆڤانێن خوە کرینە ئاڤدانا بن ئەرد
دا رەهێن خۆراگریێ نەچرمسن
مە فرمسکێن دایکان کرینە مژ
دا ل سەر برینێن ئاسۆیی بچنین
ئەم ئەو تۆڤێن قەچاخین
یێن ژ ناڤ دەمارێن بکوژێن خوە
ئۆکسجینێ ژ ژیانێ ددزن
ئێدی سەرکەفتن نە بارانە…
نە ژی تۆزەکا گەمارۆکریە
تەقینەکا سپی یە ژ جەستەیێ نەمران د زێت
دا ناڤێن بازرگانێن پاشەرۆژێ
وەک پەڕێن وندا د باهۆزا دەمی دا بفڕینن.
ئیمزایێن وە
تنێ سێبەرێن شەرمێ نە د ئەرشیفێ تاری دا
چ بێهن د دەمارێن ڤێ خاکێ دا بۆ وە نینن
ئەم رەهێن نەمر یێن ڤی ئەردینە
هوین ژی ژەنگا زبلخانەیا دیرۆکێ نە.