ئەرکێ دھۆک و زاخۆ د ڤێ حەفتیێ دا یێ ب زحمەتە
چاڤەرێ دھێتەکرن سوباھی یاریێن گەرا شەشێ ژ خولا پلا نایاب یا ھەرێما کوردستانێ بھێنە ئەنجامدان و نوونەرێن پارێزگەھێ دڤێ حەفتیێ و چاڤ ل سەرکەفتنێن چارێ ل دووڤ ئێکن.
ل یاریگەھا پیرمام بڕیارە سوباھی تیما تەپا پێ یا دھۆک بیتە مێڤانا یانا ئارارات و دڤێ یاریێ دا تیما دھۆک دێ بزاڤێن سەرکەفتنا دویێ ل دووڤ ئێک کەت ژ دەرڤەی یاریگەھا خوە کو تیما دھۆک دێ بزاڤێ کەت بوو جارا دوێ ل دووڤ ئێک سەرکەفتنێ ل باژێرێ ھەولێرێ تومار بکەت پشتی ل حەفتیا بوری شیا د یاریا کلاسیکو یا کوردستانێ دا سەرکەفتی لسەر یانا ھەولێرێ ب دو گولان بەرامبەر گولەکێ.
ھەر ژ یاریێن سوباھی تیما تەپا پێ یا پێشمەرگە یا سلێمانیێ ب سەرپەرشتیا راھێنەرێ خوە یێ نوو سیروان جەبار دێ مێڤانداریا یانا سلێمانیێ کەت و تیما شێروانە ل یاریگەھا خوە دێ د گەل یانا ھەولێرێ کەت.
بریارە رۆژا ھەینیا بھێت بەردەوامی ب یاریێن ڤێ گەرێ بھێتەکرن و تیما تەپا پێ یا زێرەڤانی سەرکێشا خولێ دێ ل یاریگەھا خوە بەرامبەر یانا کەرکوک کەت و نوونەرا سیێ یا پارێزگەھێ تیما زاخۆ دێ یاریەکا ب زحمەت بەرامبەر یانا نەوروز کەت ل یاریگەھا وێ ل باژێرێ سلێمانیێ و دووماھیی یاری ژ ڤێ گەرێ بریارە دناڤبەرا پێشمەرگە یا ھەولێرێ و یانا ھندرین دا بھێتە ئەنجامدان.
