ئەلمۆنیتەر: د گەشتەكا چارەنڤیسساز دا تۆم بەڕاك دێ بزاڤێ كەت ئیراقێ ژ هەژموونا ئیرانێ دەربێخیت
تۆم بەڕاك، هنارتیێ تایبەتێ سەرۆكێ ئەمریكا بۆ سووریێ و ئیراقێ و باڵیۆزێ وی وەلاتی ل توركیا، د گەشتەكا چارەنڤیسساز دا دێ سەرەدانا هەولێرێ و بەغدایێ كەت. ئەڤ سەرەدانە، كو ئێكەم گەشتە پشتی وەرگرتنا پوستێ وی، د دەمەكیدایە واشنتۆنێ دڤێت گڤاشتنێ ل سەر بەغدا بكەت بۆ ژ چەككرنا میلیشیایێن سەر ب ئیرانێ ڤە و دیتنا رێڕەوەكێ نوو یێ بازرگانی بۆ قەرەبووكرنا زیانێن دائێخستنا ئاڤتەنگا هورمز.
پێگەهێ «ئەلمۆنیتەر» یێ دەنگوباسان راپۆرتەك بەلاڤ كریە و تێدا ئاماژە دایێ، بڕیارە رۆژا دووشەمبی ، تۆم بەڕاك ل بەغدا ل گەل عەلی ئەلزەیدی، سەرۆك وەزیرێن ئیراقێ و بەرپرسێن بلند كۆم ببیت. ل گۆرەی ژێدەران، بەڕاك دێ داخوازا هەلوەشاندن و ژ چەككرنا وان میلیشیایان كەت یێن د مەها نیسانێ دا هێرش ل سەر دیپلۆماتكارێن ئەمریكی كرین.
ل گۆرەی راپۆرتێ، رۆژا سێشەمبییا بهێت، هنارتیێ ترەمپی دێ گەهیتە هەولێرێ و دێ ل گەل سەرۆك بارزانی، نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێمێ كۆم بیت. ئێك ژ پێشهاتێن هەرە گرنگ، چاڤەڕێ دهێتە كرن كو بەڕاك ل هەولێرێ ل گەل مەزلووم عەبدی، فەرماندەیێ گشتی یێ هێزێن سووریا دیموكرات (هەسەدە) كۆم ببیت.
وی پێگەهی ئاماژە ب وێ ژی كریە، ئەڤ سەرەدانە د دەمەكێ هەستیار دا دهێت، ژ بەر ئالۆزیێن ئاڤتەنا هورمز ودۆرپێچا ئەمریكا، هنارتنا پەترۆلی یا ئیراقێ ژ 3.3 ملیۆن بەرمیلا بۆ تنێ 600 هزار بەرمیلان د رۆژەكێ دا داكەتییە. بەڕاك دێ بزاڤێ كەت ئیراقێ بەرەڤ هەڤكارییا وزەیێ و بازرگانیێ ل گەل توركیا و سووریێ ئاراستە بكەت، بۆ وێ چەندێ پشتبەستنێ ب ئیرانێ كێم بكەت.
ئەلمۆنیتەر ئاماژە دا، هەرچەندە هێزێن سەر ب موقتەدا سەدر و هندەك گرۆپێن وەك «عەسائیب ئەهلولحەق» بەرهڤییا خۆ بۆ رادەستكرنا چەكی نیشادایە، لێ چاڤدێر ب گومان ڤە دنێڕنە ڤێ پێنگاڤێ و پێ دچیت تەكتیكەكا ئیرانی بیت بۆ كێمكرنا گڤاشتنان د دەمێ دانوستانێن ئەتۆمی دا.
تۆم بەڕاك بەری گەشتێ، ل گەل هاكان فیدان، وەزیرێ دەرڤە یێ توركیا كۆم بوویە و بزاڤێ دكەت ئیراقێ ژ هەژموونا تەهرانێ دەربێخیت، بەری كو هێزێن ئەمریكا د مەها ئیلۆنا بهێت دا ب تمامی ژ ئیراقێ ڤەكێشن.
