ئەمریكا و سعوودیێ ب هەڤپشكی هێرشێن ئاسمانی ل سەر بنگەهێن گرۆپێن چەكدار ل ئیراقی ئەنجامدان
سپێدەهییا رۆژا چارشەمبی، 29ێ تەممووزا 2026، هێزێن ئەسمانی یێن ئەمریكا و سعوودیێ د ئۆپەراسیۆنەكا هەڤپشك دا چەندین پێگەه، كۆگەهێن چەك و بنگەهێن حەشدا شەعبی و گرۆپێن چەكدار یێن سەر ب ئیرانێ ڤە ل چەند پارێزگەهێن ئیراقێ بۆردومان كرن، ئەڤ هێرشە وەكو بەرسڤەكێ بوو بۆ زێدەتر ژ 30 هێرشێن درۆنی د دەمێ 72 ساتێن بۆری دا یێن ژ ناڤ ئاخا ئیراقێ ئاراستەی دەزگەهێن پەترۆلی یێن سعوودیێ و بنگەهێن ئەمریكا ل دەڤەرێ هاتینە كرن، ڤێ چەندێ ژی رەوشا ئەمنی یا دەڤەرێ بەر ب ئالۆزییەكا مەزنتر بر. ب گۆرەی پێزانینێن هندەك دەزگەهێن راگەهاندنێ یێن ئیراقی دبیت ئەڤ چەندە ببیتە ئەگەرێ هەلوەشاندن یان پاشئێخستنا سەرەدانا ئەڤرۆ پێنجشەمبی یا عەلی زەیدی، سەرۆك وەزیرێن ئیراقێ بۆ وەلاتێ سعودیێ.
ژ ئالییەكێ دی ڤە جڤاتا ئاسایشا نشتیمانی یا ئیراقێ ب سەرۆكاتییا عەلی فالح زەیدی، كۆمبوونەكا ب لەز ئەنجامدا و تێدا هێرشێن ئەسمانی یێن ئەمریكا و سعوودیێ بۆ سەر ئاخا ئیراقێ پرۆتەستۆ كرن. هەروەسا دوپاتی ل سەر ڤەكێشانا هێزێن هەڤپەیمانان ل دووماهییا سالا 2026 كر . هەروەسا بەغدا پێگیرییا خۆ ب چەسپاندنا ئاشتی و ئارامیێ ل دەڤەرێ دیار كر و ئاماژە كر دڤێت ئیراق ژ ململانێیێن هەرێمی دووربكەڤیت و پەیوەندییێن وێ ل سەر بنەمایێ رێزگرتن و دیپلۆماسیێ بن. هەروەسا داخواز ژ هەموو ئالییان هاتە كرن كو دان ب خۆ دا بگرن و نەبن ئەگەرێ ئالۆزتركرنا رەوشا دەڤەرێ.
دەستەیا حەشدا شەعبی د بەیاننامەیەكێ دا دیار كر، بارەگەهێن وان ل پارێزگەها بەسرە، ئامرلی، نەینەوا و كەربەلا هاتینە ئارمانجكرن و تنێ ل بەسرە 10 چەكدارێن وان هاتینە كوشتن و دوو یێن دی ژی بریندار بووینە، هەروەسا حەشدا شەعبی دوپاتی ل سەر وێ چەندێ كر، هێرشكرن ل سەر بنگەهێن وان یێن فەرمی بڕینا ئاشكرا یا سەروەرییا ئاخا ئیراقێ یە و گەفەكا مەترسیدارە بۆ سەر دەزگەهێن ئەمنی یێن وەلاتی.
ژ ئالییەكێ دی ڤە، عەلی فالح زەیدی، سەرۆك وەزیرێن ئیراقێ، فەرمان دا دەزگەهێن ئەمنی ڤەكۆلینەكا ب لەز د وان بەلگەیان دا بكەن یێن ژ ئالیێ سعوودیێ ڤە هاتینە پێشكێشكرن و دوپات كر، بەغدا رێ نادات ئاخا ئیراقێ ببیتە مەیدانەك بۆ هێرشكرنێ ل سەر وەلاتێن جیران.
د هەمان دەم دا، گرۆپێ «موقاوەمەیا ئیسلامی ل ئیراقێ» بەرپرسیارەتییا خوە د هێرشێن سەر سعوودیێ دا رەت كر و راگەهاند كو ئەو هێرش ژ یەمەنێ هاتینە كرن نە ژ ئیراقێ، هەروەسا هوشداری دا كو هەر هێرشەكا لەشكەری یا سعوودیێ بۆ سەر ئاخا ئیراقێ، دێ ب توندی هێتە بەرسڤدان.
وەزارەتا بەرگرییا سعوودیێ ژی د بەیاننامەیەكێ دا ئاماژە ب وێ چەندێ كر، هێرش ب هەماهەنگی ل گەل فەرماندەییا ناڤەندی یا هێزێن ئەمریكا (سێنتكۆم) هاتینە كرن و ئارمانج ژ وان هێرشان پاراستنا سەروەری و بەرژەوەندییێن سعوودیێ یە.
توركی مالكی، پەیڤدارێ وەزارەتا بەرگرییا سعوودیێ، ئەو گرۆپە وەكو «میلیشیایێن تیرۆرستی» ناڤكرن و دوپاتكر كو وەلاتێ وی مافێ بەرسڤدانێ هەیە.
جڤاتا وەزیرێن سعوودیێ ئاماژە ب وێ چەندێ كر، وەلات د پاراستنا ئاسایشا خوە دا كێمتەرخەمیێ ناكەت و ل گورەی یاسایێن ناڤنەتەوەیی یێن مرۆڤی و بنەمایێ هەڤسەنگیێ، بەرسڤەكا توند دێ دەتە هەر كارەكێ دوژمنكارانە، جڤاتێ داخواز ژ حوكمەتا ئیراقێ كر كو پێرابوونێن پێدڤی وەربگریت بۆ رێگریكرنێ ژ بكارئینانا ئاخا ئیراقێ وەكو ژێدەرەك بۆ هێرشكرنێ.
ئەڤ گوهۆڕینە د دەمەكێ دایە كو هێزێن بەرگرییا سعوودیێ راگەهاندبوو، د دەمێ دوو رۆژێن بۆری دا چەندین درۆنێن دی یێن تێك شكاندین یێن بەر ب دەزگەهێن پەترۆلی یێن دەڤەرا رۆژهەلاتا سعودیێ و ریازا پایتەخت ئاراستە ببوون.
فەرماندەییا ناڤەندی یا هێزێن ئەمریكا (سێنتكۆم) راگەهاند، فرۆكەیێن شەڕی یێن ئەمریكا و سعوودیێ هێرشێن كرینە سەر جهێن هەلگرتنا چەكی و پێدڤیێن لۆجستی یێن گرۆپێن چەكدار یێن سەر ب ئیرانێ ل چەند دەڤەرێن ئیراقێ (بەسرە، بابل، كەربەلا و نەینەوا). سێنتكۆم ئاشكرا كر كو ئەڤ گرۆپە رێنمایی ژ لەشكەرێ پاسداران یێ ئیرانێ وەرگرتینە و تنێ د ناڤبەرا مەها شواتێ تا نیسانا 2026، زێدەتر ژ 600 بزاڤێن هێرشكرنێ بۆ سەر بەرژەوەندییێن ئەمریكا داینە.
دەستەیا حەشدا شەعبی د راگەهاندنەكێ دا ئاشكرا كر، هێرشێن هەڤپشك یێن ئەمریكا و سعوودیێ، بارەگەهێن فەرمی یێن حەشدێ ل پارێزگەهێن (بەغدا، واست، نەینەوا، بەسرە، كەركووك، كەربەلا و دیالە) ئارمانج گرتینە.
ئاماژە ب وێ چەندێ ژی دایە، د ئەنجامێ هێرشێن هەڤپشك یێن ئەمریكا و سعوودیێ بۆ سەر بارەگەهێن فەرمی یێن دەستەیا وان ل چەند پارێزگەهێن ئیراقێ، 20 چەكدارێن وان هاتینە كوشتن و 32 یێن دی ژی بریندار بووینە.
د راگەهاندنێ دا هاتییە «ژبلی زیانێن گیانی، هێرش بووینە ئەگەرێ گەهاندنا زیانێن ماددی یێن جۆراوجۆر ب پشكەك ژ بارەگەهـ، ئۆتۆمبێل و ئامێر و كەلوپەلێن لەشكەری یێن حەشدی».
حەشدێ دوپاتكر كو هەژمارا كوشتی و برینداران، ئامارەكا سەرەتایی یە و ل گەل بەردەوامبوونا پرۆسەیا گەڕیان و ب دووڤچوونێ و تەمامكرنا راپۆرتێن مەیدانی، ئەگەر هەیە هەژمارا قوربانییان زێدە ببیت.
ئەڤ پێشهاتا لەشكەری پشتی وێ چەندێ دهێت كو دۆنالد ترەمپ، سەرۆكێ ئەمریكا، بۆ دەمێ چار رۆژان هێرشێن ئەسمانی یێن بۆ سەر ئیرانێ راگرتبوون دا كو دەرفەت بۆ دانوستاندنێن دیپلۆماسی بهێتە دان، لێ ل گورەی راپۆرتان، هێرشێن رۆژا چارشەمبی دووماهئی ب وێ ئارامییا دەمكی یا ل دەڤەرێ چێبووی ئینا.
