ئەمریکا دڤێت باشوورێ ئیرانێ کونترۆل بکەت
چەند رۆژن ئەمریکا ب توندی ئێرشی باشوورێ ئیرانێ دکەت و گەلەک رێیێن هاتنوچوونێ و پر و ناڤەندێن وزێ ژناڤبرینە و چاڤدێرێن سیاسی ژی وەسا دبینن کو ئەمریکا کار بۆ کۆنترۆلکرنا باشوورێ ئیرانێ دکەت دا وەسا ئیرانێ زێدەتر لاواز بکەت.
مەیسەم مورادی بسپۆرێ کاروبارێن ئیرانێ دیار کر، شەڕێ نها یێ ئەمریکا ل گەل ئیرانێ وەکو شەڕێ ٤٠ رۆژان نینە، بەلکو ئەمریکا ب رەنگەکێ جودا و ب ستراتیژیەکا دی ئێرشی ئیرانێ دکەت، باشوورێ ئیرانێ ناڤەندا هناردەکرنا پەترۆلا ئیرانێ یە و هەروەسا رێیا سەرەکی یا بازرگانیا ئیرانێ یە ل گەل چینێ و ژ بەر دەرتەنگا هورمزێ ژی هەتا نها ئیرانێ شیایە خوە راگریت، ئانکو دەرتپەنگا هورمزێ کارتەکا گەلەک بهێزە د دەستێ ئیرانێ دا و ژ بەر دەرتەنگا هورمزێ ژی هەتا نها ئیرانێ چو داخوازیێن ئەمریکا قەبوول نەکرینە و گۆت: (ئەمریکا گەلەک بزاڤ کرن کو ئیران داخوازیێن وێ قەبوول بکەت و بەری نها شەڕ دا راگرتن، لێ ئیرانێ هەردەم دەرتەنگا هورمزێ وەکو کارتەکا فشارێ ل دژی ئەمریکا بکارئینا و ژ بەر ڤێ یەکێ ژی ئەمریکا یێ کار بۆ کۆنترۆلکرنا باشوورێ ئیرانێ دکەت، ئانکۆ ئەمریکا دڤێت دەرتەنگا هورمزێ ژ دەستێ ئیرانێ دەرخینیت و ئەو یەک ژی بێگومان ساناهی نابیت).
ناڤهاتی د بەردەوامیا ئاخڤتنا خوە دا ئاماژە ب ڤێ یەکێ ژی کر، د چەند رۆژێن بۆری دا ئەمریکا پڕانیا پر و رێیێن هاتنوچوونێ ل باشوورێ ئیرانێ ل گەل دەڤەرێن دی یێن ئیرانێ ژناڤبرینە، ئانکۆ ئەمریکا دڤێت وەسا باشوورێ ئیرانێ ل گەل دەڤەرێن دی یێن ئیرانێ ژێک جودا بکەت و پەیوەندیێن وان نەهێلیت و ژ بەر ڤێ یەکێ ژی نها پڕانیا ئێرشێن ئەمریکا ل سەر باشوورێ ئیرانێ یە و ئەو یەک ژی نیشا ددەت ئەمریکا کار بۆ کۆنترۆلکرنا باشوورێ ئیرانێ دکەت و ئەو یەک ژی بوویە جهێ توورەبوونا ئیرانێ و دیارە ئیران ژی یا ژ دەستێ وێ دهێت ئەنجام ددەت دا ئەمریکا نەچار بکەت دەست ژ کارەک وەسا بەردەت.
چیا عەلیار چاڤدێرێ سیاسی یێ خەلکێ رۆژهەلاتێ کوردستانێ ژی دیار کر، رەوشا نها نیشا ددەت کو دۆنالد ترامپ و بەرپرسێن دی یێن ئەمریکا گەهشتینە ڤێ باوەریێ کو ب رێیا دانوستاندنان ئەو نەشێن پرسێن هەی ل گەل ئیرانێ چارەسەر بکەن، چونکی ئیران ئێدی هەردەم کارتا دەرتەنگا هورمزێ دێ ل دژی ئەمریکا و وەلاتێن دی یێن جیهانێ بکار ئینیت و ژ بەر ڤێ یەکێ ژی ئەمریکا دڤێت وێ کارتا بهێز ژ دەستێ ئیرانێ دەرخینیت و ئێرشێن نها یێن ئەمریکا ل باشوورێ ئیرانێ ژی نیشا ددەن کو ئەمریکا یێ کار بۆ کۆنترۆلکرن و جوداکرنا وێ دەڤەرێ ژ ئیرانێ دکەت.
ناڤهاتی د بەردەوامیا ئاخڤتنا خوە دا ئەو یەک ژی دیار کر، باشوورێ ئیرانێ دەڤەرەک ستراتیژی و گرنگە، دەرگەهێ بازرگانیا ئیرانێ یە ب رێیا دەریایی ل گەل جیهانێ و پڕانیا پەترۆلا ئیرانێ ل باشوورێ وی وەلاتی بۆ چینێ دهێتە ڤەگۆهاستن و هەروەسا هاریکاریێن ئیرانێ بۆ حوسیێن یەمەنێ ژی ب رێیا دەریایی یە و گۆت: (خالا دی یا هەری گرنگ ژی پڕانیا ئاکنجیێن باشوورێ ئیرانێ عەرەبن و ب سالانە زۆرداری ل وان دهێتە کرن، باشوورێ ئیرانێ دەڤەرەکا هەری دەولەمەندە و خەلکێ وێ گەلەک هەژارن و ژ بەر ڤی یەکێ ژی ئەمریکا وەسا دبینیت دشێت وێ دەڤەرێ ژ ئیرانێ جودا بکەت و وەسا ژی دربەکا گەلەک مەزن ل ئابووری ئیرانێ بدەت).
چیا عەلیار چاڤدێرێ سیاسی ئەو یەک ژی دیار کر، هەکە باشوورێ ئیرانێ بهێتە کۆنترۆل کرن دبیت د قووناغێن دی دا کار بۆ دەڤەرێن دی یێن ئیرانێ ژی بهێتە کرن، ب تایبەتی ژی رۆژهەلاتێ کوردستانێ، لێ ئەو یەک ژی ب ساناهی نابیت چونکی نها ئیران ژی ب هەموو هێزا خوە ئێرش دکەت و دڤێت رێگریێ ل ستراتیژیا ئەمریکا بکەت و گۆت: (هەکە ترامپ وەکو جارا دی دیسان شەڕی نەدەتە راگرتن و شەڕ بەرفرەهتر لێ بهێت وی دەمی دبیت ئسرائیل و هندەک وەلاتێن دی ژی پشكداریێ د شەڕی دا بکەن و دێ ئیران گەلەک تەنگاڤ بیت، د چەند رۆژێن بهێت دا دێ گەلەک تشت هێنە ئێکلا کرن).
ل ئالیێ دی گەلەک ژ چاڤدێرێن سیاسی ژی وەسا دبینن هەتا ئسرائیل ب رەنگەکێ ئەکتیف پشکداریێ د شەڕی دا نەکەت ئیران تەنگاڤ نابیت و داخوازیێن ئەمریکا ژی قەبوول ناکەت، چونکی هەتا نها ژی ترامپی دەرگەهێ دانوستاندنان بۆ ئیرانێ ب تەمامی نەدائێخستیە و دەلیڤەیا راگرتنا شەڕی یا هەی و ژ بەر ڤێ یەکێ ژی هەتا نها وەلاتێن هەڤپەیمانێن ئەمریکا ب تایبەتی ژی ئسرائیلێ پشکداریێ د شەڕی دا نەکریە.
