ئەمریکا دڤێت ب رێیا سعوودیێ چارەیەکێ بۆ یەمەنێ پەیدا کەت
ئەڤرۆ:
ئاژانسا BBC د راپۆرتەکێ دا دیار دکەت کو سەرەدانا سەرۆکێ ئەمریکا باراک ئۆباما بۆ سعوودیێ د دەمەکێ دا کو قەیرانا یەمەنێ مەزنتر لێ ھاتیە و بھایێ پەترۆلێ ژی ھاتیە خوارێ گرنگیا خوە ھەیە، ھەرچەندە سەرەدانا ئۆباما ژ پشکداری کرن د رێورەسمێ مرنا شاھێ سعوودیێ بوو، لێ د ھەمان دەمی دا سەرۆکێ ئەمریکا ل گەل شاھێ نوو یێ سعوودیێ شاە سەلمان سەبارەت ب پرسا یەمەنێ و ئیرانێ ئاخڤینە.
ل گۆر راپۆرتا ھەمان ئاژانسێ سەرۆکێ ئەمریکا داخواز ژ شاھێ نوو یێ سعوودیێ کریە کو نەھێلن یەمەن بھێتە پارچەکرن، چونکو پارچەکرنا یەمەنێ دا ئالۆزیێن ل دەڤەرێ مەزنتر کەت و ژ بەر ڤێ یەکێ دڤێت سعوودیە رۆلەکێ باش بۆ ئارامیا وی وەلاتی ب گێریت و شاھێ سعوودیێ ژی دیار کریە کو سعوودیە ھەڤپەیمان و دۆستێ ئەمریکایە و ئەم ناھێلین چو دەمەکێ بەرژەوەندیێن ئەمریکا ل دەڤەرێ بکەڤنە ژێر مەترسیێ دا.
د بەردەوامیا راپۆرتێ دا ھاتیە دیار کرن کو شاھێ نوو یێ سعوودیێ داخواز ژ ئۆبامای کریە کو سیاسەتا خوە یا ل ھەمبەر ئیرانێ بدەتە گوھۆرین، چونکو ئیرانێ نەڤێت ب رێیا دانوستاندنان پرسا ئەتۆمی بھێتە چارەکرن و نێرینا ئیرانێ سەبارەت ب ئەمریکا و ھەڤپەیمانێن وێ نەھاتیە گوھۆرین و ھەکە سزایێن توند ل سەر ئیرانێ نەھێنە سەپاندن دێ ئیرانێ جارەکا دی بزاڤێ کەت کو ئارامیا دەڤەرا رۆژھەلاتا ناڤین تێک بدەت و ئەو یەک مەترسیا خوە بۆ ئەمریکا ژی ھەیە.
چاڤدێرێن سیاسی دیار دکەن کو شاھێ نوو یێ سعوودیێ ب توندی دژبەریا ئیرانێ دکەت و ناخوازیت کو ئەو وەلاتە پەیوەندیێن خوە ل گەل ئەمریکا و رۆژئاڤا سروشتی بکەت، چونکو ھەکە ئیران ڤێ یەکێ بکەت دێ سەنگێ سعوودیێ ل دەڤەرێ لاواز بیت و سعوودیە چارەکرنا پرسا یەمەنێ و قەیرانا پەترۆلێ وەک کارتەکێ ل دژی ئەمریکا سەبارەت ب پرسا ئیرانێ بکار دھینیت.
