ئەم دەست ژ مافێن خوە یێن نەتەوەیی بەرنادەین
ب، سه‌رجان مەحمود:
هژمارەک ژ پارتێن سیاسی یێن رۆژئاڤایێ کوردستانێ ب تایبەتی ژی پارتێن د ناڤ ئەنجوومەنێ نشتیمانی یێ کوردی دا دیار دکەن کو پرسا کوردی ل سووریێ نەهاتیە چارەسەرکرن و دڤێت هەموو مافێن گەلێ کورد د دستوورێ نوو یێ سووریێ دا بهێنە گەرەنتیکرن.
نوونەرێ ئەنجوومەنێ نشتیمانی یێ کوردی ل سووریێ ل شامێ دیار کر، ٧٠ سالێن کورد ل سووریێ خەباتێ بۆ بدەستڤەئینانا مافێن خوە یێن رەوا دکەن و ڤێ دووماهیێ هندەک گوهۆڕینێن باش ل سووریێ روو داینە، لێ هێشتا ژی ب کریاری گەلەک تشت نەهاتینە کرن و دڤێت هەموو مافێن گەلێ کورد د دستوورێ نوو یێ سووریێ دا بهێنە گەرەنتیکرن، هەتا ئەو یەک نەهێتە کرن ئالۆزیێن هەی ژی چارەسەر نابن و وەکو ئەنجوومەنێ نشتیمانی یێ کوردی ل سووریێ کو ژ گەلەک پارتێن سیاسی یێن کوردی پێکهاتیە ئەو دەست ژ مافێن نەتەوەیی یێن گەلێ کورد بەرنادەن و دێ خەباتا وان بۆ بدەستڤەئینانا مافێن نەتەوەیی یێن گەلێ کورد بەردەوام بیت.
ئەو یەک د دەمەکێ دایە کو بەری نها ژی چەندین جاران ئەنجوومەنێ نشتیمانی یێ کوردی ل سووریێ دیار کریە ئەو ب چو رەنگەکێ دەست ژ مافێن نەتەوەیی یێن گەلێ کورد ل سووریێ بەرنادەن و ئەنجوومەنێ نشتیمانی یێ کوردی ل سووریێ کو ژ چەندین پارتێن سیاسی یێن کوردی پێک دهێت کو خەباتێ بۆ بدەستڤەئینانا مافێن نەتەوەیی یێن گەلێ کورد ل سووریێ دکەن، هەردەم ئەنجوومەنێ نشتیمانی یێ کوردی ل سووریێ داکۆکی ل هندێ کریە دڤێت کورد ل سووریێ بگەهنە هەموو مافێن خوە.
ل ئالیێ دی چەندین پارتێن دی یێن کوردی ل سووریێ ژی ب داخویانیێن جودا جودا دیار کرن، دڤێت بەری هەر تشتەکێ زمانێ کوردی ژی وەکو زمانێ عەرەبی ل سووریێ ببیتە زمانێ فەرمی و هەروەسا دڤێت پەروەردەیا ل هەموو دەڤەرێن کوردی ل سووریێ ب زمانێ کوردی بیت و نابیت ب زۆرێ ل سەر زارۆیێن کورد بهێتە فەرزکرن کو ب زمانێ عەرەبی بخوونن و ئەو یەک ب چو رەنگەکێ ناهێتە قەبوول کرن.
هەر سەبارەت ب رەوشا نها یا ل رۆژئاڤایێ کوردستانێ دوهی هژمارەک ژ کەسایەتیێن رۆژئاڤایێ کوردستانێ ژی دیار کرن، پرسا گەلێ کورد ل سووریێ ب ئینتیگراسیۆنێ و رێبازێن دوور ژ راستیێ ناهێتە چارەسەرکرن و دڤێت هەموو مافێن نەتەوەیی یێن گەلێ کورد د دستوورێ نوو یێ سووریێ دا بهێنە گەرەنتیکرن، هەتا نها ئەو یەک نەهاتیە کرن، رێککەفتنا هەسەدێ و شامێ نەهاتیە بجهئینان و هەتا نها ب فەرمی هەبوونا گەلێ کورد ل سووریێ ژی نەهاتیە قەبوول کرن و ئەو یەک ژی بوویە جهێ دلگرانیا هەموو کوردان و دڤێت هەموو هێز و ئالیێن سیاسی یێن رۆژئاڤایێ کوردستانێ پێکڤە لیژنەیەکێ ئاڤا بکەن و ل گەل شامێ دەست ب دانوستاندنان بکەن، هەتا شام ب فەرمی هەبوونا گەلێ کورد ل سووریێ قەبوول نەکەت نە پرسا کوردی دهێتە چارەسەرکرن و نە ژی کەس دشێت بەحسێ مافێن نەتەوەیی یێن گەلێ کورد بکەت.
کەسایەتیێن رۆژئاڤایێ کوردستانێ ئاماژە ب ڤێ یەکێ ژی دکەن کو د شەڕێ ل دژی داعشێ دا کوردان چەند هزار شەهید داینە و پێدڤی بوو کوردان ل سووریێ ستاتۆیا خوە یا فەرمی هەبا، مخابن ئەو یەک دروست نەبوو و نها ژی مەترسی ل سەر کوردان هەنە، روودانێن ڤێ دووماهیێ ل حەسەکێ و سەرێکانیێ نیشا ددەن کو گرۆپێن توندرەو ل سووریێ ناخوازن کورد ژی وەکو وەلاتیێن دی یێن سووریێ د ناڤا ئاشتی و ئارامیێ دا بژین و دخوازن هەردەم ئالۆزیان دروست بکەن.
چاڤدێرێن سیاسی یێن کورد ل رۆژئاڤایێ کوردستانێ ژی دیار دکەن کو مەترسی ل سەر کوردان ل سووریێ هەیە و دڤێت د زووترین دەم دا لیژنەیەکا کوردی بهێتە ئاڤا کرن و ل گەل شامێ دەست ب دانوستاندنان بکەن، نها شام یا لاوازە و گەلەک ئاریشەیێن خوە هەنە، دڤێت کورد ڤێ دەلیڤەیێ ژ دەست نەدەن و ل گەل شامێ دەست ب دانوستاندنان بکەن دا شام نەچار بیت داخوازیێن کوردان قەبوول بکەت، هەکە نها ئەو یەک نەهێتە کرن پاشی دێ گەلەک ب زەحمەت بیت، چونکی رێککەفتنا بەری نها هاتیە کرن چو ئەنجامێن خوە نەبووینە و هەتا نها ژی شامێ قەبوول نەکریە کو ل دەڤەرێن کوردی پەروەردە ب زمانێ کوردی بیت، هەروەسا گرۆپێن توندرەو ژی بەردەوام ئاریشەیان دروست دکەن و هەتا نها ژی رێ ناهێتە دان کو هەموو ئاوارەیێن عەفرینێ ڤەگەرنە ڤە جهێن خوە، ئەو یەک ژی هەکە نها نەهێتە چارەسەرکرن دێ پاشی گەلەک یا ب زەحمەت بیت.
