ئەندامەکێ دی یێ کۆنگرێسێ ئەمریکا پالپشتیێ ل سەربەخۆیا کوردستانێ دکەت
ئەڤرۆ نیۆز،زنار تۆڤی:
ئەندامەکێ دی یێ کۆنگرێسێ ئەمریکا پالپشتیا خۆ بۆ سەربەخۆیا کوردستانێ راگەهاند و ئاماژێ ب هندێ ژی دکەت کو دەولەتا سەربەخۆیا کوردستانێ دێ بیتە هەڤپەیمانەکا گرنگ بۆ واشنتن ل ڤێ دەڤەرێ دا.
ستیڤ کینگ، ئەندامێ کۆنگرێسێ ئەمریکا ب رێیا بەلاڤکرنا راگەهاندنەکێ دبێژیت کوردێن عێراقێ ئەو پرسیار ژێ دهێتەکرن،کو ئایا هەوە دڤێت پەیوەندیێن هەوە ل گەل عێراقێ ب دوماهی بهێن و ببنە دەولەتەکا سەربەخۆ،ئەز هیڤی دکەم وان مفا ژ ڤێ دەرفەتا مێژوویی بۆ بریاردانێ ل سەر مافێ چارە نڤیسێ خۆ وەرگرتبیت.
کینگ ئەندامەکێ پارتا کۆماریانە و ل سالا 2003 وەرە ئەندامێ کۆنگرێسیە،دبێژیە پێشمەرگە هێزا شەرکەرێ کوردە و ل شەرێ دژی تیرۆریستێن ئیسلامی یێن رادیکال کو دەولەتا ئیسلامی ل عێراق و سووریا ڤەدگریت،یێ کاریگەر بوویە،کورد گەلەکێ سەربەخۆ و سەر بلندن و ماوەکێ زۆرە دهێنە چەوساندن و مافێ پێکئینانا دەولەتەکا سەربەخۆ ژی ب دەستکەفتیە.
هەروەسا دبێژیت کورد دێ بنە هەڤپەیمانێن ماوە درێژ بۆ ئەمریکا،هەکە سەربەخۆیی هەلبژێرن و داخوازێ ژێ دکەم کو مافێ کێمینە و ئاینەکان بپارێزن،ژ وان ژی مەسیحیێن دەشتا نەینەوا و ئێزدیێن شنگالێ.
ل 48 دەمژمێرێن بوری پشتەڤانیا کۆنگرێسمەنێن ئەمریکا ب هەردو پارتێن دیموکرات و کۆماری بۆ گشتپرسیا سەربەخۆیا کوردستانێ زێدەبووینە و ژ وان ژی چاک شومەر، رێبەرێ دیموکراتیان ل جڤاتا پیران بوو کو راگەهاندیە:دڤێت ئەمریکا پشتەڤانیا دەولەتا سەربەخۆیا کوردستانێ بکەت و رێزێ ژی ل ئەنجامێن گشتپرسیا کوردستانێ بگریت،هەروەسا پێدڤیە ب زووترین دەم کورد ببنە خودانێن دەولەتا خۆ یا سەربەخۆ.
