ئەڤرۆ رۆژا ئێکێ یا رۆژیێن ئێزی یە
ئەڤرۆ نیوز، بارزان مزووری:
بەرپرسێ نڤیسینگەھا لالش بۆ ئەڤرۆ نیوز دیار کر کو ئەڤرۆ رۆژا 11/12/2018ێ رۆژا ئێکێ یا رۆژیێن ئێزی یە و ئەڤ رۆژیە دێ ھەتا رۆژا 13/12/2018 ێ د بەردەوام بن و رۆژا ئەیینی 14/12/2018ێ رۆژا ئێکێ یا جەژنا رۆژیانە.
لوقمان سلێمان، بەرپرسێ نڤیسینگەھا لالش دیار کر کو د ڤێ جەژنێ دا رێورەسمێن ئایینی ل پەرستگەھا لالش ناھێنە گێڕان بتنێ ل گوندێن ئێزدیان ئەڤ رێورەسمە دھێنە ب رێڤەبرن و گۆت: “ئەڤ جەژنە دکەڤیتە د ئەینیا ئێکێ دا ژ کانوونا ئێکێ ب ھژمارا رۆژھەلات”.
ناڤھاتی خویا کر کو ل رۆژا بەری رۆژی دەست پێ بکەن ھەموو مالێن ئێزدیان پەزی سەر ژێ دکەن، لێ گەلەک مال ھەنە رەوشا وان یا ئابووری یا لاوازە دێ مریشکەکێ سەر ژێ کەن”.
ناڤھاتی خویا کر کو ئەڤ رۆژیە گەلەک د کەڤنن، ھزرا گرتنا ڤان رۆژیان دزڤرتە وێ چەندێ کو ژ کەڤن دا دەمێ دیتین رۆژ بۆ رۆژێ رۆژ یێ کورت دبن، کەفتنە د گۆمانا ھندێ دا کو رۆژ ئێدی نامینن و تاریستان دێ جھێ رۆناھیا رۆژێ گریت و وەکو ھیڤیەک ژ خودێ کرن، رابوون سێ رۆژی گرتن، داکو چاڤێ رۆژێ بەرزە نەبیت و ھەردەم ب خێر و بەرەکەتا وێ شادبین.
