ئەڤرۆ کۆنفرانسێ ماددێن ھۆشبەر ل دھۆکێ دێ ھێتە گێڕان
ئەڤرۆ نیوز، رێوار مزیری:
ل ژێر درووشمێ (نە بۆ بکارئینانا ماددێن ھۆشبەر) زانکۆیا پۆلیتەکنیکی یا دھۆک ب ھەماھەنگی دگەل رێڤەبەریا گشتی یا رەوشەنبیری و ھونەری ل دھۆکێ دێ کۆنفرانسێ ئێکێ یێ بەرھەنگاربوونا بەلاڤبوونا بکارئینانا ماددێن ھۆشبەر ل ھەرێما کوردستانێ ئەڤرۆ رۆژا ٧/٤/٢٠١٩ێ ل دەمژمێر ١٠:٠٠ سپێدێ ل زانکۆیا پۆلیتەکنیکی – پەیمانگەھا تەکنیکی یا دھۆک ل ھۆلا ئازادی گێڕیت و بۆ دەمێ دو رۆژان دێ یێ بەردەوام بیت.
ئاواز نھێلی، بەرپرسا پشکا راگەھاندنێ ل رێڤەبەریا گشتی یا رەوشەنبیری و ھونەری ل دھۆکێ بۆ ئەڤرۆ نیوز دیار کر کو د ڤی کۆنفرانسی دا دێ چەندین چالاکیێن جوراوجور ھێنە ئەنجامدان و گۆت: “د ڤی کۆنفرانسی دا دێ ھەوەکا ھشیارکرنێ دەستپێکەت و زیانێن بکارئینانا ماددێن ھۆشبەر ژ لایێ جڤاکی و مرۆڤی ڤە دێ ھێنە بەحسکرن، ھەروەسا دێ پەنەلێن جودا ژلایێ مامۆستایێن زانکۆیێ و چالاکڤانان ڤە ھێنە پێشکێشکرن”.
ناڤھاتیێ ئاماژە دا وێ چەندێ کو ل سالا بۆری ژی رێڤەبەریا گشتی یا رەوشەنبیری و ھونەری ل دھۆکێ ب ھەماھەنگی دگەل زانکۆیا دھۆک ھەوا بەرھەنگاربوون و ھشیارکرنێ راگەھاندبوو.
