ئەڤە چ هەستە كەتیم تێدا ؟
مهاباد ئەنوەر یاسین
تاریاتی یە، هەمی جهـ تاریی نە. ڕەش. خۆە تشتەكی نابینم. نزانم هێشتا دخەوم یان چاڤێن من گرتی نە، بەس تشتەكی نابینم ژ ترسێن تاریێ دا، چاڤێن خۆە جارەكا دی دگرم. ب نەرمی دەستێن خوە ب ئەردی دا دخشینم؛ ل تێلەفونا خوە دگەرهم و نابینم.
ئەڤە نە ژۆرا منە جهەكێ تاریی یە. زیندانەكە یان سندوقەكا چوار گۆشەیە؟ نە… نە یا چوارگۆشەیە، پتر وەكی لاكێشێ یە. تشتەك یێ روویدایی لێ چی یە؟ ما كەنگی ئوقیانووس هۆسا دكویرن؟ ما چاوا ئاڤ دبیتە ڕەشاتی؟ هاتم دا بژیم… دا بگەهم ڕۆناهیا دلێ خوە، ئەڤە چ تاریاتی یە؟ دوماهی جار ئەم بەرەف سنوورێن وەلاتان دچووین بۆ داگیركرنێ، نە، نە! ئەزێ خەلەتم. دوماهی جار ئەز ل گۆرەپانا غاردانێ بووم، بەرەف سەركەڤتنا ئێكێ پێنگاڤا دهاڤێژم؛ پشتا من ڕاستە؛ ڕاستەوخو راست بەرەف ئارمانجێ دكەم غار. دەنگێ هەوار هەوارا پشتەڤانا بلند بوویە.
چەند ئەڤ جهە یێ تاری یە، ل ڕۆژێن بەری ڤێ سپێدێ دگەل هەلاتنا ڕۆژێ ل سەر تەختێ خوە رادبووم، قەهوەكا تەحل دناڤ باغچەیی دا ڤەدخوار دا خەو دلێ من بەردەت، دو دەمژمێرا ل سەر جادەیا بێدەنگ دگرە غار و پاشی دهاتم ژۆرا خوە بێهنەكێ لسەر كورسیكێ درونشتم، هەر چ ئاسنەك و یاریەكا گران د ژۆرا من دا هەبا دكر و پاشی ئاڤەكا سار ب خوەدا دكر، هەكە هەیڤێ جارەكێ ژی هەڤالەكێ من هاتبا دا سەر تەختێ منێ دوویێ روینیت كو یێ تایبەتە ب مێهڤانانڤە، ب ڕەنگێ سپی و گولێن كەسك هاتیە چێكرن، ئەڤ قوماشە بەلكی یێ داپیرا منە مایی، هندەك جارا ژی ب دەمژمێرا ب پێیان دچم و 190دەرەجكا دبڕم هەتا دگەهم كەنیسا سەد سالی ئەوا د نیڤا چیایی دا، ژ ناڤدا لایێ ویێ چەپێ ژۆرەكا تاریی هەیە، جهێ هەلكرنا شەمالكایە، ب زلكێ شخارتێ شەمالكا غەریبیا خوە هەلدكەم هەتا دوماهیێ نقۆمی خوە دبم. ئارامی دهێتە ئاسمانێ روحا من پتر نێزیكی هەبوونگەریێ دبم، بتنێ دخوازم زڤڕیبامە وێ سەركەڤتنا منا ئێكێ و ل وێرێ ڕاوەستابام.
هەمی تشت دوبارەنە، هەتا بێهنا ئاخێ، یا بارانێ و یا پاییزێ… تشتێ دهێتە گوهۆڕین: پیستێ منە مەزن دبیت. گەلەك بزاڤێ دكەم ژ ڤێ تاریاتیێ دەربكەڤم! نەشێم، دەمژمێر ژی هەر خوە نوی دكەن لێ ڕۆناهی ناهێت. چ كابوسە وەسا یا درێژ؟ چ شەڤە یا بێ دوماهی؟ نزانم! دەم ڕاوەستایە یان تێدا فالنجی بوومە؟ هەكە وەسایە پا چاوا دشێم دەستێ خوە بلڤینم؟ بەلكی ژی نا لڤینم. هەما هەست پێ دكەم كو دلڤینم.
