ئەڤ سالە بزاڤا بازرگانی 10% دناڤبەرا ھەرێمێ و تورکیا دا کێمتر لێ ھاتبوو

ئەڤرۆ نیوز، رێوار مزیری:

سەرۆکێ ژوورا بازرگانی و پیشەسازی ل دھۆکێ بۆ ئەڤرۆ نیوز دیار کر کو ژ ئەگەرێ دانانا خالێن گۆمرکی د ناڤبەرا ھەرێمێ و پارێزگەھێن عیراقێ دا ئەڤ سالە نێزیکی 10% بزاڤا بازرگانی ل دەرگەھێ سنووری یێ ئیبراھیم خەلیل بەراورد ل گەل سالا بۆری کێم ببوو.

ئەیاد حەسەن، سەرۆکێ ژوورا بازرگانی و پیشەسازی ل دھۆکێ ئاشکرا کر کو ئەڤ سالە حوکمەتا عیراقێ خالێن گۆمرکی د ناڤبەرا ھەرێمێ و پارێزگەھێن دی یێن عیراقێ دا دانابوون و ب ڤێ چەندێ ژی دو گۆمرک ژ بازرگانان دھاتنە وەرگرتن ئێک ل ئیبراھیم خەلیل و یا دی ژی ژ لایێ عیراقێ ڤە دھاتە وەرگرتن ژ بەر ڤێ بارگرانی دکەڤتە سەر بازرگانان و نەچاردبوون کەرەستێن خوە ب رێیا بەسرا بیننە د ناڤ پارێزگەھێن عیراقێ دا، چونکی ل وێرێ بتنێ ئێک گۆمرک ژێ دھاتە وەگرتن و ڤێ چەندێ ژی کارتێکرن ل گۆمرکا ئیبراھیم خەلیل کربوو.

ناڤھاتی ئاماژە دا وێ چەندێ کو مەرەما حوکمەتا عیراقێ ژ دانانا خالێن گۆمرکی د ناڤبەرا ھەرێما کوردستانێ و پارێزگەھێن دی یێن عیراقێ دا ئەو بوو کو شەرێ ئابووری ل گەل ھەرێمێ بکەت، ھەروەسا بزاڤا بازرگانی ژ ھەرێما کوردستانێ ب تایبەتی ل دەرگەھێ سنووری یێ ئیبراھیم خەلیل ڤەگوھێزیتە بەسرا و سنوورێن دی یێن عیراقێ و گۆت: “ل دووڤ وان ئامارێن ل بەر دەستێ مە بزاڤا بازرگانی ئەڤ سالە نێزیکی 10% ژ سالا بووری د ناڤبەرا ھەرێما کوردستانێ و وەلاتێ تورکیا دا کێمتر لێ ھاتبوو”.

ئەیاد حەسەن، سەرۆکێ ژوورا بازرگانی و پیشەسازی ل دھۆکێ

کۆمێنتا تە