باخچەلی: یا پێدڤی بۆ قووناغا ئاشتیێ ل تورکیا دهێتە کرن
دەولەت باخچەلی سەرۆکێ پارتا بزاڤا نەتەوەپەرست یا تورکیا بۆ دەزگەهێن راگەهاندنێ دیار کر، قووناغا ئاشتیێ ب رەنگەکێ باش بەردەوام دکەت، کارێن گەلەک مەزن هەتا نها هاتینە کرن و هەموو ئالیێن پەیوەندیدار ل تورکیا یا پێدڤی بۆ پێشڤەبرنا قووناغا ئاشتیێ ئەنجام ددەن و گۆت: (هندەک ئالی دبێژن بۆچی هەتا نها هەموو تشت ب دووماهی نەهاتینە، ئەڤ کارە وەسا ب ساناهی نینە دڤێت چاڤەرێ بین، بێگومان دێ د دەمەکێ نێزیک دا تشتێن باش روو دەن، لێ گرنگە هەموو هێزێن سیاسی هەست ب بەرپرسیاریا خوە یا دیرۆکی بکەن).
سەبارەت ب رۆلێ ئۆجەلانی ژی دەولەت باخچەلی دیار کر، ئۆجەلانی رۆلەک مەزن بۆ قووناغا ئاشتیێ ل تورکیا گێرایە و مافێ وی یە ببیتە بەرپرسیارێ برێڤەبرنا قووناغا ئاشتیێ.
ناڤهاتی د دووماهیا ئاخڤتنا خوە دا ئەو یەک ژی دیار کر، هندەک هێز ناخوازن رەوشا تورکیا ئارام بیت و دخوازن بەردەوام ئالۆزیان بۆ تورکیا دروست بکەن، وان دڤێت ئاستەنگیێ ل هەمبەر قووناغا ئاشتیێ دروست بکەن، لێ دەولەتا تورکیا و هەموو ئالیێن پەیوەندیدار ب هشیاری سەرەدەریێ دکەن و دڤێت وەلاتیێن تورکیا بزانن کو یا پێدڤی بۆ پێشڤەبرنا قووناغا ئاشتیێ ل تورکیا دهێتە کرن.