بارزانى سه‌را ئه‌فسه‌رێن ئافره‌ت ل ئه‌كادیمیا سه‌ربازیا زاخۆ دا
ئه‌ڤرۆ نیوز،زنار تۆڤى:
ل رۆژا سێشه‌مبى 6/10/2015 مه‌سعود بارزانى سه‌رۆكێ هه‌رێما كوردستانێ ب مه‌به‌ستا ئاگه‌هداربوون ژ كاروبارێ ئه‌كادیمیا سه‌ربازى ل زاخۆ و ره‌وشا خۆلا سه‌ربازى و بتایبه‌تى ئێكه‌م خۆلا پێگه‌هاندنا ئه‌فسه‌رێن ئافره‌ت سه‌ره‌دانا ئه‌كادیمیا سه‌ربازێن زاخۆ كر.
د ڤێ سه‌ره‌دانێ دا سه‌رۆك بارزانى د مه‌راسیما نمایشكرنا سه‌ربازیا ئه‌فسه‌رێن ئافره‌تان دا ئاماده‌بوو، پاشى دگه‌ل فه‌رمانده و مامۆستا و سه‌رپه‌رشتیارێن ئه‌كادیمیێ كۆمبوو.
لدووڤدا بارزانى په‌یڤه‌ك بۆ قوتابیێن ئافره‌تێن به‌شدارى خۆلێ پێشكێشكر و تێدا سۆپاسیا ستافێ سه‌رپه‌رشتیا ئه‌كادیمیا زاخۆ كر، كو دماوێ 19 سالێن بۆریدا ژماره‌كا زۆر یا ئه‌فسه‌ران بۆ وه‌لاتى پێگه‌هاندینه و گۆت ژى پێدڤیه كچ ژى مل ب ملێ كۆران ب زانستێ سه‌ربازى بهێنه په‌روه‌رده‌كرن، بۆ هندێ به‌شداربن ژبۆ به‌رگریكرنێ ژ وه‌لاتێ خوه،هه‌روه‌سا دڤێت نیشا جیهانێ بده‌ین كو مه كۆمه‌لگه‌هه‌كێ ڤه‌كرى هه‌یه و جۆداهیێ دناڤبه‌را كۆر و كچان دا ناكه‌ت و ب هیچ ره‌نگه‌كى كچ كێمتر نینه ژ كۆرى.
ب مه‌به‌ستا گرنگى پێدان ب رۆلێ ئافره‌تێ ل به‌رگریكرنێ ژ وه‌لاتى و په‌روه‌رده‌كرنا وان ب زانستێ سه‌ربازیێ سه‌رده‌مانه ئێكه‌مین خۆلا پێگه‌هاندنا ئه‌فسه‌رێن ئافره‌ت ب به‌شداریا 202 كچان ل ئه‌كادیمیا سه‌ربازیا زاخۆ ماوێ چه‌ند هه‌یڤانه ده‌ستپێكریه و ل هه‌یڤا چار ل سالا بهێت دێ بدوماهى هێت.
