باشترينێ جيهانێ ئه‌ڤرۆ دێ هێته هه‌لبژارتن
ئەڤرۆ:
ئەڤرۆ دێ چاڤ ل ئاھەنگا باژێرێ زیورخ یێ سویسری بن بو خەلاتکرناباشترین یاریکەرێ سالا ٢٠١٤ کو ھەڤرکی مایە د ناڤبەرا سێ یاریکەران دا ئەوژی یێ پرتوگالی و یانا ریال مەدرید کریستیانو رونالدو و یێ ئەرژەنتینی و یانا بەرشەلونە لیونێل میسی و گولچیێ ئەلمانی و یانا بایرن میونخ مانویل نویێر.
د ڤێ ئاھەنگی و خەلاتکرنا باشترینێ سالێ ئەوا دھێتە رێکخستن ژلایێ ئێکەتیا نێڤدەولەتی یا تەپا پێ و گوڤارا فرانس فوتبول یا فرەنسی وەسا پێشبینی دھێنە کرن کو دەلیڤا یاریکەرێ پرتوگالی یێ ٢٩ سالی ئەوێ دو جاران ئەف ناسناڤە بری زێدەتر بیت تایبەت پشتی سەرکێشیا یانا خوە کریە بو بدەستڤەبرنا ناسناڤێ قارەمانیا ئوروپا، زێدەباری کاسا شاھێ ئسپانیا و کاسا یانێن جیھانێ و خالا ب تنێ کو گومان ل سەر ھەی و نە د بەرژەوەندا وی دا ئەوە نە پێشکێشکرنا ئاستێ داخوازکری د موندیالا بەرازیل دا ل گەل ھەلبژارتیێ وەلاتێ خوە و تایبەت پشتی ل قوناغا ئێکێ قارەمانی ب جە ھێلای.
ڤی یاریکەری ل وەرزێ بوری د قارەمانیا ئوروپا دا شیا نمرا پیڤای یا تومارکرنا گولان ب ١٧ گولان بشکێنیت و رولەکێ کاریگەر ھەبوو ل سەر برنا ناسناڤێ ڤێ قارەمانیا ئوروپی.
ژلایێ خوە ڤە لونێل میسی یێ ٢٧ سالی سەرکێشیا ھەلبژارتیێ وەلاتێ خوە کریە و گەھاندیە یاریا دووماھیا موندیالا بەرازیل ھەر چەندە ناسناڤ ب دەستڤە نەبر و بو نوێر و ھەڤالێن وی د ھەلبژارتیێ بەرازیل دا ھێلا، لێ میسی شیا ٥٨ گولان د ٦٦ یاریان دا ل سالا بوری ل گەل یانا بەرشەلونە و ھەلبژارتیێ وەلاتێ خوە تومار بکەت و دیسان شیا ناڤێ خوە ل گەل وان یاریکەران تومار بکەت یێن د مێژویا تەپا پێ دا ھاتینە نیاسین و نمرا یاریکەرێ بەرێ یێ ریال رائول گونزالیسی بشکێنیت د قارەمانیا ئوروپا دا ب تومارکرنا ٧٤ گولان زێدەباری ناسناڤێ گولکەرێ مێژوی یێ خولا ئسپانی ئەوا ل سەر ناڤێ جیڤانوکا یانا ئەتلەتیکو بلباو تیملو زارا ب ٢٥١ گولان بشکێنیت.
نویێر یێ ٢٨ سالی ل دووڤ راپورت و راوەرگرتنێن ھەتا نوکە ھاتینە کرن کێمترین چەنس و دەلیڤا برنا ڤە ناسناڤی یێن ھەین سەرەرای وێ چەندێ کو ناسناڤێ کاسا جیھانێ ل گەل ھەلبژارتیێ وەلاتێ خوە بریە و دیسان دو ناسناڤ ل گەل یانا خوە یێن خول و کاسا ئەلمانیا، چونکو جھێ وی یێ کرنا یاریێ گەلەک نە یێ جەماوەری یە ل ھەمبەر یێن ھێرشبەر و بەرھەڤکەرێن گولان و ب تنێ جارەکێ دیاریا باشترینێ جیھانێ بو گولچیێ ئێکەتیا سوڤێتی لیف یاشین ل ١٩٦٣ ھاتیە دان.
د ڤی دەربارەی دا ڤی گولچی دان پێدان کریە کو وی چەنسەکێ زێدە وەکو میسی و رونالدوی نابیت ڤی خەلاتی بەت و ل ھەمبەر راھێنەرێ ھەلبژارتیێ ئەلمانیا خواستیە کو خەلات بو نویێری بھێتە دان چونکو ژ ھەژی ناسناڤی یە و دیسان میشێل پلاتینی سەروکێ ئێکەتیا تەپا پێ یا ئوروپی پشتەڤانیا خوە بو ڤی گولچی دیارکریە.
