برنجێ (ڕووسی) ب ناڤێ یێ كوردی ل دهۆكێ دهێته فرۆتن
سندس سالح سلێڤانهیی:
پتریا جۆتیارێن دهڤهرا ئاكرێ و بهردهڕهش ئهڤ ساله گازنده ژ وێ چهندێ دكهن كو هندهك بازرگانان برنج ژ وهلاتێ (ڕووسیا) ئینایه و ل ڤێره ب ناڤێ برنجێ كوردی دفرۆشنه خهلكهكی و جۆتیارهك ژی دبێژیت: ئهم گهلهك زهحمهتێ دبهین ههتا برنجێ كوردی دچینین و دهێته بهرههم و هندهك كهس ژی هوسا ب ساناهی و ئهرزانی برنجی ژ دهرڤهی وهلاتی بینن و ل ڤێره ب ناڤێ یێ خۆمالی بفرۆشن و پێدڤیه دووڤچوون بۆ ڤێ چهندێ ههبیت و ڕێگریێ ل ئینانا وی برنجی بكهن.
سامان خالد، جۆتیارهكه دبێژیت: چاندنا برنجی و ئاڤدانا وی و چاڤدان ههتا دگههیته دهمێ خۆ و دهێته بهرههمئینان گهلهكا ب زهحمهته و ههموو جۆتیار ژی دزانن چاندنا برنجی نهكارهكێ ب ساناهی یه و ههر جۆتیارهكی شیان نینن برنجی بچینیت، لهورا چاندنا برنجێ كوردی ب هیڤیا چهند جۆتیاران ڤه مایه و ئهڤێ چهندێ ژی زهحمهتهكا مهزن و پارهیهكێ زۆر پێ دڤێت ههتا دبیته بهرههم، لێ مخابن هوسا ب ساناهی هندهك كهس ههبن بچنه ژ دهرڤهی وهلاتی، ب تایبهت ژی وهلاتێ (ڕووسیا) و ل وێرێ هندهك برنجێ ئهرزان و بێ تام و لاواز بینن و ل ڤێره ب ناڤێ (برنجێ كوردی) و ب بهایهكێ گران بفرۆشنه خهلكی، ب ڕاستی ئهز دبینم ئهڤه جۆره تاوانهكه دهرحهقی جۆتیارێن كوردستانێ دهێته كرن و پێدڤییه وهزارهتا چاندنێ ههر زوو بهێته سهر هێلێ و ڕێگریێ ل ئینا وی برنجی بكهن، چنكو ئهو كهس ماف و كهدا مه دخۆن و زێدهگاڤیێ ل یاسایێن چاندنێ دكهن.
مههدی سالم، وهك فرۆشكارهك دبێژیت: ئهز ژ مالباتهكا جۆتكارم و دكهڤندا ئهم برنجێ كوردی دچیننین و دفرۆشین، ههروهسا ژبهركو من ترۆمبێلا (پیكهم) یا ههی ئهز فرۆشكارهكێ گهڕۆكم ژی و سالانه دچمه دهف جۆتیارێن ئاكرێ و بهردهڕهش و رۆڤیا و برنجێ وان دكڕم و دئینمه دهۆكێ دفرۆشم، لێ ئهوا من ئهڤ ساله دیتی زێدهگاڤیهك یا ههی، ئهو ژی ئینانا برنجێ (ڕووسی) یه و فرۆتنا وی ب ناڤێ یێ كوردی یه، ئهڤه ژی جۆره فێلبازیهكا دی یه ژلایێ هندهك كهسان ڤه ل خهلكێ مه دهێته كرن، لهورا پێدڤیه بلهز ڕێگری لێ بهێته كرن و ب مخابنی ڤه دێ بێژم ههتا نوكه پتریا بكڕین برنجی برنجێ كوردی نانیاسن و ههر زوو ب ئاخفتێن هندهك كهسان دهێنه سهرداربن و باوهریێ ب وان دئینن كو ئهڤه برنجێ كوردی یه.
