برۆسک ڤەکێشانا خوە ژ نایابا کوردستانێ راگەھاند
ئەڤرۆ، مللەت جەمال:
کارگێریا تیما تەپا پێی یا یانا برۆسک ب فەرمی ڤەکێشانا خوە ژ خولا نایابا ھەرێما کوردستانێ راگەھاند و ئەگەرێن ڤێ چەندێ ژی بو باردوخێ لاوازێ دارایێ یێ یانێ ڤەگەراندن.
ل دۆر ڤی بابەتی ژێدەرەکی ژ یانا برۆسک تایبەت بۆ رۆژناما ئەڤرۆ گوت: ھەتا نوکە نیڤا ھەڤبەستێن وەرزێ بوری یێن یاریکەران لنک کارگێریا یانێ وەکو قەر ماینە و روژانە یاریکەر داخوازا ھەڤبەست و مووچێن خوە دکەن کو ئەڤە بو ماوێ چار ھەیڤانە مووچە نەداینە یاریکەران، لەورا گەھشتیە وێ رادەێ کو ھندەک یاریکەران پارە نەبوون بھێنە یانێ راھێنانان بکەن و ژبەر ڤێ چەندێ ئەڤ بڕیارە ھاتە دان.
زێدەتر ھەمان ژێدەر ئەو چەندە ژی دیارکر کو چەندین لایەنا سوز دابوو ھاریکاریا یانا بروسک بکەن، لێ ھەتا نوکە سوزێن خوە بجە نەئیناینە و یانە روژ بو روژێ بەر ب خرابیێ دچیت.
ل دووماھیێ ناڤبری ئەو چەندە ژی دیارکر کو بریارا دووماھیێ ھاتیە دان کو پشکداریێ نەکەن و ژبەر ڤێ چەندێ کارگێریا یانێ لیستە و پێزانینێن یاریکەرا بو ئێکەتیا تەپا پێی نە ھنارتینە ب ڤێ چەندێ یاریکەرێن تیمێ دێ زەرەرمەندین مەزن بن، چونکو ھەمی یانا بەرھەڤیێن خوە کرینە و چو دەم نەمایە بو دەستپێکرنا خولێ، لەورا دێ دەم یێ کورت بیت کو یاریکەرێن وان بۆ خوە ل تیمەکا دی بگەرن کو یاریێ لێبکەن.
