بریارەکا رێکخراوا بۆکۆ حەرام ئەمریکا و ئورۆپا دلگران دکەت
ئەڤرۆ:
رێکخراوا تیرۆرستی یا بۆکۆ حەرام د داخۆیانیەکی دا دیار کریە کو ئەو پشتەڤانیێ ل رێکخراوا داعش دکەن و ئەبوبەکر بەغدادی ژی وەک خەلیفێ خوە ناس دکەن، پشتی ڤێ یەکی وەزارەتا دەرڤە یا ئەمریکا د داخۆیانیەکێ دا راگەھاند کو رێکخراوێن تیرۆرستی یێن وەک داعش، قاعیدە و بۆکۆ حەرام وەک ئێک کار دکەن و چو جوداھی د ناڤبەرا وان دا نینە و بزاڤا نھا بۆکۆ حەرام دکەت مەترسیێن ل سەر رۆژھەلاتا ناڤین و ئەفریقیا زێدەتر دبن و ژ بەر ڤێ یەکێ ژی دڤێت ھەموو وەلاتێن جیھانێ ل ھەمبەر تیرۆرێ ببنە ئێک، چونکو تیرۆر مەترسیە بۆ ھەموو مرۆڤاتیێ و دڤێت ل دژی تیرۆرێ ئەم پێکڤە شەری بکەین.
ل ئالیێ دی سەرۆکێ پەرلەمانێ ئورۆپا مارتین شولز ژی د داخۆیانیەکێ دا راگەھاند کو مەترسیا تیرۆرێ ل ئەفریقیا و رۆژھەلاتا ناڤین گەلەک زێدە بوویە و بەرێ خوە ددەتە ئورۆپا و بزاڤا دووماھیێ یا رێکخراوا تیرۆرستی یا بۆکۆ حەرام ژی دێ وەسا بکەت کو چالاکیێن تیرۆرستی بەرفرەھتر لێ بھێن و ژ بەر ڤێ یەکێ ژی فەرە ھەڤپەیمانیا کو ل دژی داعشێ ھاتیە پێکئینان چالاکیێن خوە ڤەگوھێزیتە نیجێریا و ل دژی وێ رێکخراوێ شەری بکەن و نەھێلن کو ئەو پتر خوە ب ھێز بکەن و گۆت: (نەبوونا ستراتیژیەکا ھەڤپشک یا شەرێ دژی تیرۆرێ ل ئاستێ نێڤدەولەتی وەسا کریە کو گرۆپێن جودا جودا یێن ھشکباوەر دروست ببن و پاشی خوە ب ھێز بکەن و نھا پتر ئەو دخوازن خوە نێزیکی داعشێ بکەن و مەترسیا وان دێ زێدەتر بیت و ژ بەر ھندێ دڤێت چاوا ھێزێن ھەڤپەیمان دژی داعشێ شەری دکەن ئەو شەرە ل دژی بۆکۆ حەرام ژی بھێتە کرن).
