بزانە باسکت بولا دھۆک و زاخۆ دێ پشکداریێ چو خول دا کەن
ئەڤرۆ: محەمەد عەلی
داخویانیەکێ دا سەرۆکێ ئێکەتیا باسکتبۆلا ھەرێما کوردستانێ بۆ رۆژناما ئەڤرۆ دیارکر کو د ڤێ ھەیڤێ دا قارەمانیا ھەرێمێ بۆ ھەشت تیمان ژ ھەر چار پارێزگەھێن ھەرێمێ دێ ھێتە رێکخستن، ئەوژی پشتی رازیبوونا لژنا ئۆلۆمپیا کوردستانێ.
زێدەتر سەردار حەیدەری گۆت: ھەرچەندە گەلەک دەم سەرفەچوو بۆ ڤەکرنا خول و قارەمانیێن ھەرێمێ ژبەر قەیرانا دارایی یا کو کاروچالاکیێن مە بۆ دەمێ زێدەتر سێ سالە راوەستاندین، ئەڤرۆ ب سۆپاسی ڤە پشتی چەندین بزاڤ ھاتینە کرن لژنا ئۆلۆمپیا کوردستانێ رازیبوو قارەمانیا ھەرێمێ بۆ ھەشت یانیێن کوردستانێ بھێتە رێکخستن.
ھەروەسا ناڤبری گۆت: مە داخوازنامە بۆ ھەشت یانەیان فرێکریە کو ھەر پارێزگەھەکێ دو یانە پشکداربن، ژ پارێزگەھا دھۆکێ ھەردو یانێن دھۆک و زاخۆ پشکداربن.
ژلایەکێ دویڤە لدۆر ژڤان و سیستەمێ قارەمانیێ گۆت: ئەم یێ کۆمبوونێن جودا دکەین ژبۆ دانانا ژڤانێ قارەمانیێ کو دەمێ وێ ژ ڤێ ھەیڤێ دەرباس نەبیت، ھەردیسان دھێـتە پێشبینیکرن سیستەمێ قارەمانیێ بشێوەیێ کۆمڤەبوون بیت کو یانێن پارێزگەھێن دھۆک وھەولێر جھەک بۆ بھێتە دەستنیشانکرن و ھەروەسا یانێن پارێزگەھێن سلێمانی و کەرکووک ل جھەکێ دی بھێتە دەستنیشانکرن، ئەڤ چەندە ژی ئێکلانەبوویە ژبەرکو بوچوونێن چودا ھەنە لسەر سیستەمێ قارەمانیێ د رۆژێن بھێت دا دێ ئێکلابیت و ھێتە راگەھاندن.
لدوماھیێ سەردار حەیدەری گەشبینیا خۆ دیارکر کو ئەڤ قارەمانیە دێ بیتە پێنگاڤا گەلەک باش بۆ زڤراندنا وەرزشا باسکتبۆلا ھەرێمێ و ئۆمێدەک بۆ ھەموو یاریزانێن ڤێ یاریێ پەیدابیت، بھیڤیا وێ چەندێ و بۆ وەرزێ بھێت خول و قارەمانیێن ھەرێمێ دوبارە بھێنە رێکخستن و بارێ دارایی یێ ھەموو یانەیان باشتر بیت ژبۆ پشکداریکرنێ.
