بزانە راموس چو گوتن ھەیە بۆ قارەمانیا موندیالا یانێن جیھانێ
ئەڤرۆ نیوز:
دوھی ب شەڤ شاندێ یانا ریال مەدرید گەھشتە وەلاتێ ئیمارات ب مەرەما پشکداری کرنێ د قارەمانیا موندیالا یانێن جیھانێ و بریارە ل رۆژا چار شەمبیا بھێت یاریا خوە یا ئێکێ ژ قارەمانیێ ھەمبەری یانا کاشیما قارەمانا ئاسیا بکەت .
سێرجیو راموس د داخویانیەکێ دا بۆ مالپەرێ فیفا یێ فەرمی دیارکر ئەو گەلەک یێ کەیفخوشحالە جارەکا دی ھاتیە باژێرێ ئەبو زەبی یێ ئیماراتی بوو پشکداری کرنێ د موندیالا یانێن جیھانێ دا ل گەل تیما خوە و ڤەگەراندنا ئەوان وێ چەندێ د گەھینت کو ئەوان ل وەرزێ بوری شیاینە ئاستەکێ بلند پێشکێش بکەن و برنا چامپیونیز لیگ بوو ئەوان دبیتە دەرگەھەکێ مەزن پشکداری د ڤێ قارەمانیێ دا بکەن.
ناڤبری دیارکر ژی ئارمانجا ئەوان یا سەرەکی ئەوە ب ڤەگەرنە مەدرید ب ناسناڤێ چارێ یێ موندیالێ و ناسناڤەکێ دی ل مێژویا یانێ توماربکەین و ھەردیسان ناسناڤێ خوە یێ ٢٠ ل گەل ریال مەدرید .
راموس دیارکر ژی ئەوان رێز بوو ھەر یانەکا د قارەمانیێ دا ھەیە و ھەر یانەکا پشکدار بێ گومان یاریزانێن خودان شیان ل گەل دا ھەنە و خودان ناسناڤ مێژویەکا مەزن ل سەر ئاستێ کێشوارێن خوە لێ ئەو ھاتینە وەلاتێ ئیمارات بتنێ بوو برنا ناسناڤێ قارەمانیێ .
ھەژی گوتنێ یە یانا ریال مەدرید پێنچ جاران پشکداری د ڤێ قارەمانیێ دا کریە و شیا سێ جاران ناسناڤی ب دەستخوڤە بینت ئەوژی ل سالێن ٢٠١٤ و ھەردیسان ل ھەردو قارەمانیێن دووماھیی دا ٢٠١٦ و ٢٠١٧.