بزاڤێ دكەین هەموو كێشەیێن هەلاویستی ل گەل هەرێما كوردستانێ چارە بكەین
وەزیرێ پەترۆلا ئیراقێ راگەهاند كو دۆسەیا هەرێما كوردستانێ خودان گرنگییەكا تایبەتە و وەزارەت بزاڤێ دكەت هەموو كێشەیێن هەلاویستی یێن د ناڤبەرا هەولێرێ و بەغدایێ دا د بیاڤێ پەترۆل و غازێ دا چارەسەر بكەت، دا كو ئەڤ سامانێن سروشتییە ب شێوەیەكێ دادپەروەرانە د خزمەتا بەرژەوەندییا گشتی دا بهێنە بكارئینان.
باسم محەمەد خوزەیر ئەلعەبادی، وەزیرێ نوو یێ پەترۆلا ئیراقێ، ئاشكرا كر كو ل دووڤ پلانا عەلی ئەلزەیدی، سەرۆك وەزیرێن ئیراقێ، ئەو دێ هەموو هەولێن خۆ مەزێخن بۆ ئێكلاكرنا وان كێشەیێن كو هەتا نوكە د ناڤبەرا حوكمەتا فیدرال و حوكمەتا هەرێمێ دا ب هەلاویستی ماینە. وی ئاماژە ب وێ چەندێ دا كو دۆسەیا هەرێمێ د ئەجێندایا وان دا جهەكێ گرنگ هەیە.
وەزیرێ پەترۆلێ دوپاتی ل سەر وێ چەندێ كر كو پێدڤییە پیشەسازییا پەترۆلێ ل هەرێما كوردستانێ بهێتە رێكخستن ب شێوەیەكێ كو هەڤشێوەیێ دەڤەرێن ناڤەڕاست و باشوورێ وەلاتی بیت. هەروەسا دیار كر كو ئەو د پشتەڤانن هەرێما كوردستانێ بگەهیتە تێكگەهشتنەكێ بۆ زێدەكرنا شیانێن بەرهەمئینانا پەترۆلێ و غازێ ل هەموو زەڤیێن پەترۆلی دا.
د پشكەكا دی یا ئاخڤتنێن خۆ دا، وەزیرێ نوو یێ پەترۆلێ گوت: «پەترۆل و غاز مولكێ هەموو گەلێ ئیراقێ یە، ژبەر هندێ ئارمانجا مە یا سەرەكی چەسپاندنا بنەمایێن دادپەروەریێ یە بۆ هەموو وەلاتییان».
عەباسی زێدەتر گوت: «ئەم دخوازین وەلاتیێن هەرێما كوردستانێ د هەمان بارودۆخێ ژیارا پارێزگەهێن دی یێن ئیراقێ دا بژین و سامانێن وەلاتی ب تمامی بۆ خزمەتا نیشتمانی بهێنە بكارئینان».
