بزاڤ دهێنە كرن پشكا وەرگرتنا گەنمێ جۆتیاران ژ لایێ بەغداڤە بهێتە زێدەكرن
هەولێر، قائید میرۆ:
پەرلەمانتارەكێ فراكسیۆنا پارتی ل پەرلەمانێ ئیراقێ خویا كر، بزاڤ دهێنە كرن، پشكا وەرگرتنا گەنمێ جۆتیاران ژ لایێ بەغداڤە بهێتە زێدەكرن و دبێژیت: نابیت جوداهی د ناڤبەرا پارێزگەهێن ئیراق و هەرێما كوردستانێ دا هەبیت.
بایز زراری، پەرلەمانتارێ فراكسیۆنا پارتی ل پەرلەمانێ ئیراقێ بۆ رۆژناما ئەڤرۆ دیاركر، بزاڤ دهێنە كرن پشكا گەنمێ هەرێما كوردستانێ ژ لایێ بەغداڤە بهێتە زێدەكرن، ژ بەركو ئەو رێژەیا هاتیە دیاركرن گەلەكا كێمە، ب تایبەتی ئەڤ سالە رێژەیا بەرهەمێ گەنمی گەلەك ژ سالا بۆری پترە و گۆت: «گەنمێ ل دەرڤەی پلانا چاندنا ئیراقێ دڤێت بكەڤیتە د ناڤا پلانێ دا، هەموو بزاڤەك ژی دهێتە كرن جوداهی د ناڤبەرا پارێزگەهێن ئیراق و هەرێما كوردستانێ دا بۆ وەرگرتنا گەنمی نەمینیت».
گۆت ژی: «حوكمەتا ئیراقێ جوداهیێ د ناڤبەرا پارێزگەهێن ئیراقێ و هەرێما كوردستانێ دا دكەت، ئەڤە ژی بوویە ئەگەر هەر سال بەرهەمێ جۆتیارێن باشوور و ناڤەڕاستا ئیراقێ ل سایلۆیان بهێتە وەرگرتن، پشكا هەرێما كوردستانێ ژی گەلەك كێم بهێتە وەرگرتن».
