بسپۆرەک: داکەتنا بھایێ پەتڕۆلێ مەترسیە ل سەر بۆدجا عیراقێ
ئەڤرۆ نیوز، قائید میرۆ:
داکەتنا بھایێ پەتڕۆلێ د بازاڕێن جیھانێ دا مەترسیە ل سەر بۆدجا عیراقێ پەیداکریە و بسپۆرەکێ کەرتێ پەتڕۆلێ ژی دبێژیت، پێدڤیە حوکمەتا نوکە یا عیراقێ داکەتنا بھایێ پەتڕۆلێ بەرچاڤ بگریت و بەرۆڤا ژی بازاڕ نەیێ جێھگیر بیت دێ کورت ئینانەکا مەزن د بۆدجێ دا چێبیت.
پشتی کو ئەڤ سالە بھایێ پەتڕۆلێ بشێوەکێ بەرچاڤ بلندبوون ب خوەڤە دیتی، چەند رۆژەکە بھایێ پەتڕۆلێ بەر ب داکەتنێ چوویە و روودانێن جیھانێ ژی ئەگەرن چو پێشبینی بۆ بھایێ پەتڕۆلێ نەھێنەکرن.
دکتۆر عەلی بەلو، بسپۆرێ پەتڕۆلێ بۆ ئەڤرۆ نیوز دیار کر کو پەتڕۆلا عیراقێ حەفت دۆلاران کێمتری ژ بھایێ بازاڕی دھێتە فرۆتن، د دەمێ نوکە دا بھایێ ئێک بەرمیلا پەتڕۆلێ یا عیراقێ دبازاری دا ب ٥١ دۆلاران دھێتە فرۆتن، ئەڤ بھایە ژی کێمتر ژ بھایێ پەتڕۆلێ کو د ناڤ پڕۆژە قانوونا بۆدجا گشتی یا عیراقێ دا ھاتیە تەخمینکرن، ژ بەرکو حوکمەتا عیراقێ بھایێ ئێک بەرمیلا پەتڕۆلێ ب ٥٦ دۆلاران تەخمین کریە.
ناڤھاتی ئاماژە دا وێ چەندێ کو ھەکە داکەتنا بھایێ پەتڕۆلێ یا بەردەوام بیت دێ مەترسی ل سەر بۆدجا عیراقێ ھەبیت و کورت ئینانەکا مەزن دێ چێبیت، لەوڕا پێدڤیە حوکمەتا عیراقێ پێداچوونێ د پڕۆژە قانوونا بۆدجێ دا بکەت و نە سەقامگیریا بھایێ پەتڕۆلێ بەرچاڤ بگریت و گۆت: “ل ھەموو وەلاتێن جیھانێ ژی یێن داھاتێ وان ل سەر پەتڕۆلێ ئەڤێ چەندێ بەرچاڤ وەردگرن”.
