بكارئینانا وەتسئاپ و ڤایبەری د ناڤبەرا مامۆستا و قوتابیان دا هاتە قەدەغەكرن
دهۆك، دلۆڤان ئاكرەیی:
سەرۆكێ زانكۆیا دهۆك دیاركر، زانكۆیا دهۆك بكارئینانا سۆشیال مەدیایێ د خواندنێ دا قەدەغە كر و پلاتفۆرمەكێ فەرمی ل جهێ وان جێگیر كر.
د. داوود سلێمان ئەترووشی، سەرۆكێ زانكۆیا دهۆك بۆ رۆژنامەیا ئەڤرۆ گۆت: «بەرهەڤی دهێنە كرن بۆ ڤەكرنا چەند پشكێن نوو یێن زانستی و هونەری، كو پەیوەندیكرنا د ناڤبەرا مامۆستا و قوتابیان دا ب رێكا ئەپێن وەكو: (وەتسئاپ، ڤایبەر، مەسنجەر) و سۆشیال مەدیایێ ب تەمامی دێ هێنە قەدەغەكرن، ل جهێ وان پلاتفۆرمێ فەرمی یێ مودل Moodle بۆ پەیوەندییا د ناڤبەرا مامۆستا و قوتابیان دا دێ جێگیر كەین».
گۆت ژی: «ئەڤە پێنگاڤەكا نوویە بۆ نەهێلانا خەمساریێ د ئەركێن ئەكادیمی دا و ب ڤێ رێكێ دێ شێین ب هووری چاڤدێریا پەیوەندییان و كێشەیێن قوتابیان بكەین و ب زوویی كار بۆ چارەسەركرنا وان بكەین، ب دیجیتالكرنا فەرمی یا پەیوەندیێن زانستی، زانكۆیا دهۆك دبیتە نموونەكا پێشەنگ د رێكخستنا سیستەمێ خواندنا بلند و بلندكرنا ئاستێ ئەكادیمی دا ل سەرانسەری هەرێما كوردستانێ».
