بنگه‌هێ لالش داخوازى یێن هه‌ین
ئه‌ڤرۆ نیوز: كاروان باعه‌درى
بنگه‌هێ لالش یێ روشنیرى و كومه‌لایه‌تى ل دهۆكێ د به‌یاننامه‌كێ دا هیڤى خواستیه كو باشیك و به‌حزان ژى بهێنه رزگاكرن.
ده‌قێ به‌یاننامێ:
داخوازێ دكه‌ین بێهن فره‌هیێ بپارێزن و ل سه‌ر وان به‌لگه‌یا كو ئه‌وا ب سه‌رێ خه‌لكێ مه هاتى جینۆسایده و ب سه‌رپه‌رشتیا مه‌یدانى و ب شێوه‌یه‌كى راسته‌وخۆ ژلایێ سه‌رۆكێ هه‌رێمێ ڤه رێزدار (مه‌سعود بارزانى) بشیان و قوربانیدانا قاره‌مانێت هێزێن پێشمه‌رگه‌ى شنگال خۆشتڤى هاته پاقژكرن ژ چه‌په‌لێن چه‌كدارێن داعشێن تیرۆرستى پشتى داستانه‌كا دیرۆكى كو دوو رۆژا به‌رده‌وام كرى شنگال ب ئازادانا زڤرى بۆ باوه‌شا كوردستانێ.
ئه‌و رۆژه‌كا دیرۆكى و جێوازه ب تایبه‌تى بۆ ئێزدیان و بۆ گه‌لێ كوردستانێ ب گشتى،سه‌رۆك بارزانى سۆزا خۆ یا كود اى ل گه‌له‌ك بیره‌وه‌ریا دا ب جێهئانى ده‌مێ گۆتى هێزێن پێشمه‌رگه‌ى دێ شنگالێ ئازاد كه‌ن بهایێ قوربانیێ چه‌ند گران بت و ئه‌م پیرۆزباهیێ ل سه‌رۆك بارزانى و په‌رله‌مان و حكومه‌ت و گه‌لێ كوردستانێ دكن ب ڤێ سه‌ركه‌فتنێ و هه‌روه‌سا پیرۆزباهیێ ل كوردێن ئێزدى ژى دكن ئه‌م داخوازێ ژ هه‌موو شه‌رڤان و خه‌لكێ خۆ یێ شنگالێ دكن بێن فره‌هیێ بپارێزن و نه‌كه‌ڤنه دداڤێن دوژمنێن مرۆڤایه‌تیێ دا و هه‌روه‌سا هیچ كاره‌كێ تۆلڤه‌كرنێ دژى چ لایه‌نه‌كى قه‌بوول ناكه‌ین،به‌لكو داخوازا پابه‌ندیێ ب یاسایێ دكه‌ین كویاسا دێ پێ رابوونا به‌رامبه‌ر هه‌موو وان كه‌س و لایه‌نێن ده‌ست دتاوانێن كوشتن و سه‌رژێكرن و ره‌ڤاندن و په‌قاندنا مالان و تالانكرنا ملك و مالێ شنگالێ كت.
هه‌روه‌سا داخوازێ دكه‌ین ب شێوه‌یه‌كى هوربین ره‌فتار بێته كرن ل دۆر تاوانا داگیركرنا شنگالێ و پاراستنا گۆرێن ب كۆم ده‌ستكارى تێدا نه‌ئێته كرن و كار و ده‌رفه‌ت بۆ پسپپرێن ڤى بوارى بێته دان،چنكو دیارترین و گرنگترین به‌لگه‌نه ژبۆ هاریكاریا ئه‌وا ب سه‌رێ خه‌لكێ شنگالێ هاتى كو تاوانا جینۆسایدێ یه و گازیا خۆ دگه‌هیننه حكومه‌تا هه‌رێما كوردستانێ ژبۆ هنارتنا تیمێن تایبه‌ت دڤى بوارى دا و ب زووترین ده‌م ژبۆ ڤه‌دیتنا وان گۆرا و ئه‌نجامدانا تاقیكرنێن تایبه‌ت ژبۆ ناسینا قوربانیا.
هه‌روه‌سا هیڤیدارین تیمێن ئه‌ندازیاریێن تایبه‌ت ژ هێزێن پێشمه‌رگه‌ى رابن ب پاقژكرنا شنگالێ ژ مین و ته‌قه‌مه‌نى و تێنتیا و ئاماژێ ده‌ینه په‌یڤا سه‌رۆك بارزانى و به‌یانناما سه‌رۆكێ حكومه‌تا هه‌رێما كوردستانێ رێزدار نێچیرڤان بارزانى ل دۆر پرسا ئاڤاكرنا شنگالێ و دووباره ئاڤاكرنا ژێرخانا وێ و له‌زكرن دپرسا كاراكرنا خزمه‌تكاریێن بنه‌ره‌تى.
هه‌روه‌سا دووپان دكه‌ین كو ئه‌م دگه‌شبینین ب هه‌ولێن سه‌ركردایه‌تیا هه‌رێمێ ژبۆ پارێزگه‌هبوونا شنگالێ و هه‌روه‌سا راكرنا وێ زوولم و زۆردارییا دیرۆكیا ل سه‌ر خه‌لكێ وێ ، هه‌روه‌سا دووپات دكه‌ین هه‌موو جڤاكێ ئێزدى چاڤه‌رێیى بابه‌تێ ئه‌وان ره‌ڤاندیێن ئێزدیا و كریارا ئازادكرنا وان ژ ناڤ ده‌ستێ هۆڤێن سه‌رده‌مى و دڤێت ئه‌ڤ هه‌ولێن هه‌نێ ژبۆ رزگاركرنا وان بێته كرن.
ل داویێ ئاماژێ دده‌ین كو ئه‌م ب هیڤینه ئۆپه‌راسیۆنێن ئازادكرنا ده‌شتا نه‌ینه‌وا ب شێوه‌یه‌كى گشتى و باشیك و به‌حزانێ ب شێوه‌یه‌كى تایبه‌ت ل سه‌ر ده‌ستێن هێزێن پێشمه‌رگه‌یێن قاره‌مان و ب سه‌ركردایه‌تیا سه‌رۆك بارزانى ب زووترین ده‌م بهێته رزگاركرن ،داكو ب هزاران خێزانێن ئاواره‌یان بزڤرنه سه‌ر جه و وارێن خۆ دگه‌ل ئاڤاكرنا وێ چه‌ندا هاتى خرابكرن و زڤراندنا ژێر خانا وێ.
سلاڤ و خۆ چه‌ماندن بۆ گیانێ شه‌هیدێن پێشمه‌رگه‌یێن گیانێ خۆ داین ژبۆ پاقژكرنا شنگالێ.
ساخبوونا بله‌ز بۆ هه‌موو بریندارا
سلاڤ بۆ گیانێ شه‌هیدێن كاره‌ساتا شنگالێ
سلاڤ بۆ ره‌ڤاندى و دیلێن مه ل كێده‌رێ بن
سه‌رشۆرى و شه‌رمزارى بۆ چه‌ته‌یێن داعشا تیرۆرست
ده‌سته‌یا بلندا بنگه‌هێ لالش یێ ره‌وشه‌نبیرى و كۆمه‌لایه‌تى/دهۆك