بهریكانه و خهلاتێن ئهدهبی
عهبدولخالق سولتان
بهری بیست و پێنج سالان من خهلاتهكێ ناڤنهتهوەی ب كورته چیرۆكهكا خۆ وهرگرت، پشتی من پشكداری د بهریكانهیهكا كورتهچیڕۆكێ دا كری، كو ل وهلاتێ ئیتالیا هاتبوو رێكخستن، ل وی دهمی كهیفا من وهكو نڤیسهرهكێ گهنج گهلهك هات. ئهو پشكداریه بوو دهرگهههك ئهز پتر و كویرتر بچمه دناڤ جیهانا كورتهچیڕۆكێ دا، ههروهسا باوهریهكا مهزن د ناخێ من دا پهیدا بوو، كو ئهز ژی دشێم كارهكی ئهنجام بدهم كو بهایێ خۆ ههبیت لسهر ئاستێ جیهانی!
ئهوێ بهریكانهیێ وهرچهرخانهك دئاراستهكرنا كهساتیا من یا ئهدهبی دا پهیداكر، ژ لایهكی ڤه من پتر پهرتووكێن گرێدای هونهرێ كورتهچیڕۆكێ كۆمكرن و خواندن، دیسان من ژمارهیهكا زۆر یا گۆتارێن رهخنهیی ل دۆر تهكنیك و هونهر و ئاڤاهیێ كورتهچیڕۆكێ نڤیسین، و د كۆڤارا (گولان العربی) دا بهلاڤكرن. ههروهسا پشتی هینگێ ب دهمهكێ كێم من كۆمهلهیا خۆ یا ئێكی یا كورتهچیڕۆكان چاپكر و بهلاڤكر.
ئهڤا لسهری من گۆتی نه بۆ وێ یه دا رێكلامهكێ بۆ خۆ و بهرههمێ خۆ بكهم! یان دا پارچهیهكێ ژ ژیانا خۆ یا ئهدهبی بۆ ههوه بدهمه نیاسین! بهلكو بۆ وێ یهكێ یه دا ئهزموونهكێ كو ئهز ب خۆ تێدا بۆریمه بهرچاڤ بكهم، و من ئهنجامێن وێ ب زهلالی دیتینه، ئهو ژی كاریگهریا رێكخستنا بهریكانه و خهلاتێن ئهدهبی لسهر پروسێسا داهێنانێ و بهرههمئینانێ. ب گۆتنهكا دی، ئهگهر ئهو خهلاته نهبایه دبیت من وهكو نڤیسهر – ل وی دهمی – ئهو پهڕێ باوهریێ نهدبوو كو كۆمهلهیهكا كورته چیڕۆكان ب ناڤێ خۆ بهلاڤ بكهم! ژبهركو بهلاڤكرنا بهرههمێن ئهدهبی جۆرهكێ جهسارهت و جرئهتی پێدڤێت.
ههروهسا وێ پشكداریێ و خهلاتبرنێ، ئهز هاندام پتر بچمه دناڤ جیهانا كورتهچیڕۆكێ دا، و ب شێوهیەكێ كویرتر هزران د تهكنیكێن وێ دا بكهم، نهخاسمه ئهو فۆرم و شێوازێن نڤیسهرێن نوی بكاردئینان. و ئهڤه بۆ ئهگهر ئهز گهلهك جۆرێن تهكنیكان د كورتهچیڕۆكێن خۆدا بكاربینم، و د بازنهیێ دوبارهكرنێ دا نهمینم. ژلایهكێ دیڤه كۆمهكا خواندن و ڤهكۆلینێن رهخنهیی لسهر هونهرێ چیڕۆكێ من وهكو خواندن و ڤهكۆلین د كۆڤارێن جودا دا بهلاڤكرن، كو ل دویماهیێ بوونه هێڤێنێ پهرتووكهكێ و هاته چاپكرن. ئانكو بهریكانه نهتنێ بۆ خهلاتكرن وبهرزكرنا وی كهسیه ئهوێ ئهم دیاریێ ددهینێ! بهلكو، ئهگهر ئهو كهس ب دروستی ژ ههژی وی خهلاتی بیت، هینگێ دێ ئهو خهلات مینا كلیلهكێ بیت و دهرگههێن داهێنانێ د ناخێ وی دا ڤهكهن، و دێ پهقینهكا مهزن یا هێزێ ل دهڤ وی دا پهیدا كهت! كو دێ بیته رێخۆشكهرهك بۆ ئافراندنا چهندین بهرهەمێن سهرنجڕاكێش و كارتێكهر بۆ جڤاكی.
دیسان برنا خهلاتێن ئهدهبی، بهرپرساتیهكێ بۆ وی كهسی پهیدا دكهت ئهوێ خهلاتی دبهت، ههست دكهت یێ بوویه خودان نامه! و دڤێت نامهیا خۆ بگههینیت. ئهڤجا دێ ههول دهت نڤیسینێن وی یێن بهری خهلات وهرگرتنێ وهكی یێن پشتی وهرگرتنا خهلاتی نهبن، دێ د نڤیسینێن خۆ دا پتر یێ رژد و بهرپرسیار بیت، و دبیت زێدهتر ژ دو جاران بهرههمێن خۆ بخوینیت بهری بهلاڤ بكهت! چنكو دزانیت جهماوهر دێ ب بهرچاڤكهكا دی ل بهرههمێن وی نێڕیت. ئهڤجا بهرههمێن وی بشێوهیەكێ نهراستەوخۆ دێ ژ ئاستێ نۆرمال دهركهڤن و بهرهڤ ئاستهكێ بهرزتر و تایبهتمهند ڤه چن، وهكی چهوا كهسهك باوهرنامهیا ماستهرێ یان دكتۆرایێ ب تایبهتمهندیهكێ وهرگریت، و لدویڤ وێ تایبهتمهندیێ رهفتار دگهل دا دهێته كرن، ب ههمان رهنگ دێ رهفتار دگهل گۆتار و بهرههمێن وی كهسی ژی هێته كرن ئهوێ خهلاتهكێ ناڤدار دبهت!
ئهڤجا، فهره هندهك سازیێن تایبهت ههبن، بهریكانه و خهلاتێن ئهدهبی یێن بها و ئاست بلند پێشكێش بكهن، و ب شێوهیەكێ زهلال و ل دویڤ پیڤهرێن زانستی بههلسهنگینن، كو سهنگهكی بدهنه وێ بهریكانێ و خەلاتێ تێدا دهێته بهخشین، سهرهرای كو دێ رهخنه ههر لێ هێنه كرن! لێ دڤێت ئهڤ جۆرێ بهریكانهیان ههبیت، ژبهركو پالدهرهكێ ههره گرنگه بۆ بهردهوامیكرنا بزاڤێن ئهدهبی، و پێشڤهچوونا ئاستێ رهوشهنبیری ل دهڤهرێ. نهخاسمه ئهگهر خهلات ژ ئالیێ سازیهكا خودان سهنگ بیت د ناڤ جڤاكی دا، و جهێ باوهری و متمانهیا جهماوهری بیت، و خودان كهساتیهكا سهربهخۆ و ئازاد بیت.
